Buumi Bunyina Mapenzi Ncisyomezyo Cisyomeka

“[Leza] uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:4.

SENA cisyomezyo eeci cikkazyika moyo ceelede kusyomwa? Amuyeeye ncenjezyo imwi njaakapegwa mwaalumi kumatalikilo. Leza wakaambila Adamu ikuti naa wamuzangila, “ncobeni uyoofwa.” (Matalikilo 2:17) Kweelana ambwaakaamba Leza, wakafwa ncobeni. Akaambo kaceeci, alimwi alufwu akupenga nkobakakona bantu boonse, ncitondezyo cakuti Leza weelede kusyomwa. Sena kuli kaambo keelede kutupa kudooneka cisyomezyo ca Leza cakuleta buumi bulondokede anyika?

Alimwi amuyeeye bube bwa Leza ibwaambwa mucibalo cainda. Kuyanda kwesu kwakuti mapenzi amane tutondezya bube bwa Leza bwalweetelelo, luyando, alimwi abululami. Kuyungizya waawo, zyintu zicitika munyika alimwi abantu mbobayeeya akulimvwa zisinizya kuti ciindi cakuti Leza abweze ntaamu cilaafwaafwi kusika.—Amubone kabbokesi kajisi mutwe wakuti:  “Ino Ndilili Zyintu Eezyi Noziyooba?”

Nkaambo nzi Jehova Leza ncali nguweelede kumana mapenzi aabantu? Amuyeeye buyo mbwaakabikka bubambe bwakugusya zyintu zipa kupenga kwiinda mukubelesya Jesu, Mwanaakwe.

Zyintu zyakulisalila. Kusala nkwaakacita taateesu Adamu kwakaleta mapenzi mapati kubana bakwe boonse. Mwaapostolo Paulo wakalemba kuti: “Zilenge zyoonse zilatongela lyoonse akuba amacise caantoomwe kusikila lino.” (Baloma 8:22) Leza uyoobambulula zyintu munzila yaluyando alimwi iitakatazyi. Lugwalo lwa Baloma 6:23 lwaamba kuti: “Cakuvwola ncocipa cibi ndufwu, pele cipego ncapa Leza mbuumi butamani kwiinda muli Kilisito Jesu Mwami wesu.”

Jesu, imuntu uulondekede kunyina naakacita cibi. Ilufwu lwakwe acisamu cakupenzezya lwakaangulula bantu basyomeka kuzwa kucibi alufwu. Lino tulijisi bulangizi bwakuyoopona buumi butamani munyika mwalo munoonyina bubi bweendelezya mizeezo yesu kutegwa tutasali camaano. Ibantu bapenzya bantunyina abalo tabakabiko “nkaambo basizibi ba[yoo]nyonyooka.”—Intembauzyo 37:9.

Zyintu zicitika cakutayeeyelwa alimwi akutalondoka. Mwami uusalidwe a Leza, Jesu Kristo, ulijisi nguzu zyakweendelezya nguzu zyabubumbo. Mumwaanda wamyaka wakusaanguna C.E., Jesu alimwi abaapostolo bakwe bakali mubwato kabazuba nswi ciindi “nikwakaba guwo pati, amayuwe akali kulipwaya kubwato, aboobo maanzi akatalika kunjila mubwato cakunga bwakatiibbile.” Ciindi nibakamulomba kuti abagwasye, Jesu “wakabuka akukalalila guwo akwaambila lwizi kuti: ‘Umuna! Batama!’ Mpoonya guwo lyakaleka, alimwi  kwakaumuna wi.” Baapostolo bakwe bakagambwa akwaamba kuti: “Noliba guwo alwizi zilamumvwida.”—Maako 4:37-41.

Mubulelo bwa Jesu, babombe myoyo “bayookala kabotu, bayooba aluumuno cakutayoowa bubi.” (Tusimpi 1:33) Eeci cilabikkilizya antenda zilicitikila buyo. Kuyungizya waawo, ikutaibamba kabotu nyika, ikutayaka kabotu maanda, alimwi akubula luzyibo lwanguzu zyabubumbo, alimwi akulubizya kwabantu, zyoonse ziyoomana. Kunyina muntu uuyakupenga akaambo kazyintu zicitika cakutayeeyelwa.

Naakacili anyika, Jesu wakatondezya cintu cikonzya kumana mapenzi aaliko lino akaambo kazyintu zilicitikila, izicitika cakutayeeyelwa. Jesu wakaamba kuti: “Mebo ndendime bubuke alimwi abuumi.” (Johane 11:25) Masimpe ngakuti, Jesu ulijisi nguzu alimwi aluyandisisyo lwakuyoobusya mamiliyoni abantu ibakafwa akaambo kazyintu zilicitikila buyo. Sena eeci ncisyomezyo buyo? Ciindi naakali anyika, Jesu wakapa kuti lusyomo lwesu mububuke luyume kwiinda mukubusya bantu. Mu Bbaibbele kulilembedwe bantu botatwe mbaakabusya.—Maako 5:38-43; Luka 7:11-15; Johane 11:38-44.

“Mweendelezi wanyika eeyi.” Kristo Jesu wakasalwa a Leza kuti “akonzye kumunyonyoona ooyo uujisi nguzu zyakuleta lufwu, nkokuti, Diabolosi.” (Bahebulayo 2:14) Jesu wakaamba kuti: “Lino nyika eeyi ilabetekwa; eelyo mweendelezi wanyika eeyi uyootandwa.” (Johane 12:31) ‘Uyoonyonyoona milimo ya Diabolosi’ kwiinda mukugwisya muuya wa Diabolosi uuli munyika eeyi. (1 Johane 3:8) Amuciyeeyele buyo mbokuyooba munyika ciindi muuya wa Saatani wabulyato, lweeno, alimwi akuliyanda noziyoogwisyigwa!

[Kabbokesi kali apeeji 9]

 “Ino Ndilili Zyintu Eezyi Noziyooba?”

Basikutobela Jesu bakamubuzya kuti: “Ino ndilili zyintu eezyi noziyooba alimwi ncinzi ciyooba citondezyo cakubako kwako acamamanino aabweende bwazyintu?” (Matayo 24:3) Ibwiinguzi bwa Jesu, kubikkilizya a Magwalo amwi aakalembwa kafwide kale Jesu, zilatondezya ciyoocitika ciindi Leza aakumanizya kupenga ino-ino. * Amweezyanisye businsimi buli ansi aawa abukkale buliko mazuba aano.

● Nkondo yanyika yoonse—Matayo 24:7; Ciyubunuzyo 6:4.

● Nzala amalwazi—Luka 21:11; Ciyubunuzyo 6:5-8.

● Kunyonyoona nyika—Ciyubunuzyo 11:18.

● “Bayandisya mali”—2 Timoteyo 3:2.

● “Batamvwidi bazyali”—2 Timoteyo 3:2.

● “Bayandisya zyakulikondelezya kwiinda kuyandisya Leza”—2 Timoteyo 3:4.

Bakamboni ba Jehova bayookkomana kumugwasya kutegwa muzyibe kuti buumi butakwe mapenzi buli afwaafwi. Amubalembele Bakamboni bali kubusena nkomukkala. Bayookkomana kapati kwiiya Bbaibbele andinywe aŋanda yanu alimwi akubusena nkomuyanda.

[Bupanduluzi buyungizidwe]