Ibbaibbele Ndibbuku Ndyomukonzya Kusyoma—Cibeela 7
Ibbaibbele Ndibbuku Ndyomukonzya Kusyoma—Cibeela 7
Bwami Bweendelezya Nyika Yoonse Bwaciloba
Eeci ncibalo camamanino mumulongo wazibalo zyamu “Sinsimuka!” izili ciloba izibandika masi aayendelezya nyika yoonse aali ciloba aambwa mu Bbaibbele. Makanze ngakutondezya kuti Bbaibbele lilasyomeka alimwi lyakasololelwa a Leza akuti mulumbe uuli mumo ulapa bulangizi bwakuti mapenzi oonse aaboola akaambo kalunya lwabasikudyaaminina bantunyina ayoomana.
TUPONA muciindi cilibedelede alimwi ciyandika kapati muciindi cesu—calo citondezya bwami bweendelezya nyika yoonse bwaciloba bwamuciindi ca Bbaibbele. Kuyungizya waawo, oobu mbobwami bulikke bulembedwe mu Bbaibbele kabuli businsimi buyo, pele mami aambi aali cisambomwe zimwi ziindi akalembwa kaayindide kale. Kujatikizya “bami” aaba bali ciloba, Ibbaibbele lyakasinsima kuti: “Kuli bami bali ciloba: bosanwe bakawa, omwe nkwali lino, ooyo umbi tanasika pe, pele aakusika uyookkala buyo kwakaindi kaniini.” *—Ciyubunuzyo 17:10.
Myaka iili 1,900 yainda, ciindi majwi aaya naakalembwa, bami bosanwe naa mfwulumende zyatwaambo twacisi, ‘zyakaliwide kale.’ Zyakali Egepita, Asuri, Babuloni, Mediya a Persia, alimwi a Gilisi. Majwi aakuti “omwe nkwali lino” aamba Roma. Pele Roma tanaakali kuyookkala ciindi cilamfwu. Kwakali kuyooba bwami abumbi bomwe, alimwi businsimi bwakaamba kuti: “Ta[bu]nasika pe.” Kweelana abusinsimi bwamu Bbaibbele, ‘mwami’ waciloba wakasika. Ino wakazooba ni? Sena wakali kuzoolela kwaciindi coonse kukabe kutamani? Ikuti naa tabusyi oobo, ino mbuti alimwi muunzila nzi mbwayoozwa? Ibbaibbele lilapandulula.
Businsimi Busyomeka
Bwami bwaciloba bwakatalika kulibonya ciindi England naakaba aanguzu kuzwa kunyika lwaambo mu Bwami bwa Roma. Kuzoosika muma 1760, insumbu eeyi yakaba Bwami bupati bwa Britain. Britain wakazumanana kusumpuka mumakwebo amubweendelezi, mpoonya mumwaanda wamyaka wa 19, cakaba cisi civwubide kapati alimwi cilaanguzu kwiinda munyika yoonse. Ibbuku limwi lyaamba kuti: “Bwami bwa Britain bwakali bwami bupati kwiinda munyika yoonse.” Alimwi lyaamba kuti mubwami oobu “mwakali bantu bali 372,000,000 alimwi buyale bwanyika bwakali kusika makkilomita aali 28,000,000.”
Mpoonya, nkondo yanyika yakusaanguna (1914-1918) yakapa kuti Britain abe aacilongwe cilibedelede a United States, yalo musyule yakali aansi abweendelezi bwa Britain. Ino ncinzi cakacitika akaambo kacilongwe eeci? Bwami oobu bwakazooba bwami bwa Anglo-America, bulelo bwanyika yoonse bwamasi obilo imuli bantu baambaula mwaambo wa Cingisi bwalo ibweendelezya kusikila asunu.—Amubone kabbokesi kajisi mutwe wakuti “Cilongwe Cilibedelede.”
Businsimi buli ku Ciyubunuzyo 17:10 buleendelana abusinsimi abumbi ibujanika mubbuku lya Daniele. Daniele wakalemba kujatikizya “cikozyanyo cipati” Mwami wa Babuloni Nebukadinezara ncaakabona mucilengaano calo ncaakatondezyegwa a Leza. (Daniele 2:28, 31-43) Daniele wakamuyubunwida mwami kuti zibeela zyamubili wacikozyanyo eeci zyakali kwiiminina mami alo aakatalikila aali Babuloni, ibwakali bulelo bwanyika yoonse ciindi eeco. (Ibwami bwa Egepita abwa Asuri bwakalimanide kale.) Makani aazyakaindi lino alazuminizya zyintu eezyi zitobela:
Mutwe wangolida wakali kwiiminina Bwami bwa Babuloni.
Camba amaboko aansiliva akali kwiiminina Bwami bwa Mediya a Persia.
Cikungu azibelo zyamukuba zyakali kwiiminina Bwami bwa Gilisi wansiku.
Myeendo yabutale yakali kwiiminina Bwami bwa Roma.
Zituta zyabutale ibuvwelene abulongo, zyakali kwiiminina kutakamantana ikwakali kuyooba akati kamasi kuciindi cabulelo bwa Anglo-America ibweendelezya nyika yoonse.
Kweelana a Ciyubunuzyo 17:10, bulelo bwanyika yoonse bwaciloba bweelede “[k]uyookkala buyo kwakaindi kaniini.” Ino eeci cakali kuyootola ciindi cilamfwu buti? Ino mbuti mbobweelede kuleka kweendelezya munyika? Alimwi ino ncinzi ciyoocitika bwaakuleka kweendelezya? Daniele ulatupa bwiinguzi kumibuzyo eeyi.
Bbaibbele Lilapa Bulangizi Busyomeka
Naakamana kupandulula cikozyanyo icaambwa atala aawa, Daniele wakalemba kuti: “Kwakakolomonwa ibbwe, kutali amaanza aamuntu, nkabela lyakauma cikozyano azituta zyaco, izyakali zyabutale buvwelene abulongo, lyakazipwayaula.” (Daniele 2:34) Ino cintu eeci cigambya ciiminina nzi?
Daniele ulazumanana kwaamba kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” * (Daniele 2:44, 45) Amubone twaambo ootu tuyandika kapati:
1. Bwami ibwakazunda, ibwakali mbuli bbwe lipati, bwakabikkwa a Leza mwini, “kutali amaanza aamuntu.” Aboobo, buleelela kwiitwa kuti Bwami bwa Leza.
2. Bwami bwa Leza “buyoopwayaula” mami aabantu oonse, kubikkilizya abwami bwanyika yoonse bwaciloba. Nkaambo nzi? Akaambo kakuti boonse bayookaka kuleka kulela alimwi bayootalika kukazyanya a Leza lyankondo mpati yamamanino kubusena bwiitwa kuti Amagedoni mumaambilambali. Ibbaibbele litondezya kuti eeyi nkondo ijatikizya “bami bamunyika yoonse.”—Ciyubunuzyo 16:13, 14, 16.
3. Kwiindana amfwulumende zyabantu zyalo zitakkali ciindi cilamfwu, kubikkilizya amami aali ciloba, Bwami bwa Leza “ta[bu]kooyoonyonyoonwa abuniini mane kukabe kutamani.” Alimwi buyoolela nyika yoonse.—Daniele 2:35, 44.
Lunyonyooko lwamamanino lwabasikukazyanya a Leza luyoozuzikizya businsimi bulembedwe mulugwalo lwa Matalikilo 3:15, ibwakaambwa mucibeela cakusaanguna muzibalo eezyi. Jesu Kristo, ilunyungu lwa mwanakazi, uyoomupwaya muzoka wacikozyanyo, Saatani alunyungu lwakwe. (Bagalatiya 3:16) Lunyungu lwa Saatani lubikkilizya bantu boonse ibatobela bukkale bwakwe bubyaabi alimwi ibakulwaizya muuya wakulilela kabali basikukazya bulelo bwa Leza a Kristo.—Intembauzyo 2:7-12.
Eeci citupa kubuzya mubuzyo uuyandika kapati ooyu wakuti: Ino lunyonyooko lwamamanino luyoocitika lili? Nkokuti, ndilili “ibbwe”—Bwami bwa Leza—neliyoogwisya zibeela zyoonse zyabulelo bwabantu? Ibbaibbele lilawiingula mubuzyo ooyu kwiinda mukupa “citondezyo” calo cakali ikuyootondezya kuti tupona kumazuba aamamanino.—Matayo 24:3.
Amucizyibe “Citondezyo”!
Citondezyo cakumamanino cibikkilizya nkondo yanyika yoonse, “mizuzumo yanyika mipati,” “zilwazi anzala.” (Luka 21:10, 11; Matayo 24:7, 8; Marko 13:8) Alimwi citondezyo “camazuba aamamanino” nkwaalilwa kutobela zyeelelo zya Leza zyakulilemeka alimwi azyabukombi. (2 Timoteyo 3:1-5) Sena “zyintu zyoonse eezyi” zyakacitika? (Matayo 24:8) Inzya—cakuti bantu banji balayoowa kujatikizya zyakumbele. Imuteende wiitwa kuti The Globe and Mail wakaamba kuti: “Basyaazibwene banji mumakani aasayaansi alimwi amubukkale bwabantu baamba makani aayoosya kujatikizya mamanino aamusyobo wabantu.”
Pele, kuli kaambo komwe kapati katondezya kuti makani ngobaamba bantu aaba taali aamasimpe—musyobo wabantu taukamani pe. Masimpe ngakuti kuboola kwa Bwami bwa Leza kuyoopa kuti bantu batakamaninini. Ciindi Jesu Kristo naakali kupa citondezyo camazuba aakumamanino, wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.” (Matayo 24:14) Ino mbuti businsimi oobu mbobuzuzikizigwa?
Mumasi aayinda ku 230, Bakamboni ba Jehova balakambauka Bwami bwa Leza. Nkakaambo kaako mutwe wamagazini njobabelesya kwaambilizya Bwami oobu ngwakuti Ngazi Yamulindizi Yaambilizya Bwami bwa Jehova—Jehova ndezyina lya Leza limugeme. (Intembauzyo 83:18) Bubambe bwakuyiisya Bbaibbele bwa Bakamboni bulagwasya bantu banji amikwasyi yabo kucinca bukale bwabo bubyaabi akutalika kulilemeka alimwi akuba aluumuno kweelana azyeelelo zya Leza. (1 Bakolinto 6:9-11) Akaambo kaceeci, bantu banji nyika yoonse balijisi lusyomo lwakuti Leza uyoobakwabilila ciindi Bwami bwakwe bwaakutalika kweendelezya bantu.
Masimpe, bayoolibonena kuzuzikizyigwa kwamupailo wacikozyanyo wa Kristo, zimwi ziindi wiitwa kuti Mupailo wa Mwami, iwaamba kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:10) Sena kuli nomwakalibuzyide kujatikizya buumi mbobuyakuba ciindi bantu boonse nobayoomuyanda akumulemeka Leza? Magwalo aatobela ayoomugwasya kumvwisya kaambo ncaayelela majwi aakuti “makani mabotu.”
Ciindi Luyando lwa Leza Lwaakucitwa Anyika . . .
● Kuyooba luumuno lwini-lwini, kutali buyo kuti kunoonyina nkondo pe. “Jehova . . . ulalesya inkondo mane kusikila kumamanino aanyika, uladunsaula mata akutyolaula masumo; ulatenta inkalaki mumulilo.” (Intembauzyo 46:8, 9) “Babombemyoyo bayoovuba nyika, bayookondwa muluumuno lunji.”—Intembauzyo 37:11.
● Bantu boonse banoojisi zyakulya zinji. “Maila avule ansi, atala lyazilundu.”—Intembauzyo 72:16.
● Bantu boonse bayooba abuumi bulondokede. “Takukooyooba naba omwe akati kabantu banyika uuamba kuti, Ndaciswa.”—Isaya 33:24.
● Bantu boonse banoojisi maanda mabotu. “Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe.”—Isaya 65:21, 22.
● Mapenzi oonse ayoomana. “Tente lya Leza lili aabantu, . . . eelyo uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.”—Ciyubunuzyo 21:3, 4.
Sena zisyomezyo eezyi zilamukkomanisya? Ikuti naa mboobo, Bakamboni ba Jehova balamukulwaizya kwiiya zinji mu Bbaibbele. Masimpe, kwiinda mukucita boobo muyoolibonena kuti muuya walunya wabasikudyaaminina bantunyina ulaafwaafwi kumana. Alimwi muyoobona kuti Bbaibbele ndibbuku ndyomukonzya kusyoma, kuti masimpe lyakasololelwa amuuya wa Leza.—2 Timoteyo 3:16. *
[Bupanduluzi buyungizidwe]
^ munc. 4 Mbwaanga mfwulumende izyaambwa mu Bbaibbele ziindi zinji zyakali kweendelezyegwa abami, imfwulumende eezyi kanji-kanji zyakali kwiitwa kuti “bami,” naa “mami,” alimwi zimwi ziindi mabala oonse obilo akali kubelesyegwa antoomwe.—Daniele 8:20-22.
^ munc. 18 Kutegwa muzyibe zinji kujatikizya Bwami bwa Leza bwakujulu, amubone zibalo 8 a 9 mubbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova.
^ munc. 35 Kuti kamuyanda kwiiya zinji kujatikizya Bbaibbele, amwaambile Bakamboni ba Jehova kubusena nkomukkala, amubalembele kwiinda mukubelesya kkeyala iili apeeji 5, naa akkeyala ya Intaneti ya www.watchtower.org.
[Kabbokesi/Cifwanikiso icili apeeji 19]
CILONGWE CILIBEDELEDE
Amuswaangano ngobakajisi beendelezi bobilo, baleli bapati baku Britain ba David Cameron alimwi aba Barack Obama ibaku United States mu July 2010, bakaamba kuti: “Tacidoonekwi buya. Cisi ca United States a United Kingdom zijisi cilongwe cilibedelede. Tujisi cikono comwe. Tujisi bukkale bomwe. . . . Cilongwe cesu nciyumu akaambo kakuti tubelekela antoomwe kutegwa makanze eesu azwidilile. . . . Ciindi United States a United Kingdom nobabelekela antoomwe, bantu besu—alimwi abantu bamunyika yoonse—balakwabililwa alimwi balakkala kabotu. Mubufwaafwi, United States tajisi mulongwe umbi mwini-mwini kwiinda Great Britain.”
[Cifwanikiso icili apeeji 18]
(Kutegwa mubone bwini mbwaakkede mabala, amubone bbuku lini)
Babuloni
Mediya a Persia
Gilisi
Roma
Britain a United States
[Cifwanikiso icili apeeji 20]
Ibbaibbele lisyomezya kuti kuyooba luumuno lwini-lwini mubweendelezi bwa Bwami bwa Leza
[Nkotwakajana cifwanikiso icili apeeji 17]
Mujulu, aali zifwanikiso zyabami: Aakalembedwe makani abwaanda ku Egepita alimwi acifwanikiso ca Nero: Zyakazumizyigwa aba British Museum; Aakalembedwe makani abwaanda ku Persia: cakazumizyigwa aba Musée du Louvre, ku Paris
