Kukkomana Nokuba Kuti Ndililemenyi Kapati

Akaluulwa aba José Godofredo Várguez

Ndakazyalwa buyo kabotu alimwi ndakali kukomena buyo kabotu mbuli bana boonse. Kandijisi myaka yakuzyalwa iili 17, ndakatalika kubeleka mulimo wakuumpilila zibulo. Nokwakainda myaka yobile, kanduumpilila zibulo zyakali afwaafwi antambo zyamalaiti, imvwula yakatalika kuwa. Mpoonya canguzu malaiti akandikwela akundisowela ansi kuzwa atala aalampa mamita aali 14 mpondakali kubelekela alimwi akandisiya kandinetukide. Ndakakkala muciimo eeci alimwi ndakabuka nokwakainda myezi yotatwe. Ndakali kukonzya buyo kunyanyaazya mutwe. Ndakaba mulema uutakonzyi kubelesya maanza amaulu, alimwi eeci cakandipa kuusa kapati!

KUMATALIKILO, ndakamunyemena Leza alimwi ndakali kumubuzya ncaatakandilekela buyo kuti ndifwe. Ndakali kuyeeya kulijaya. Ndakasola kuyandaula lugwasyo muzikombelo ziindene, pele kunyina cikombelo cakanduumbulizya nokuba kundipa nzyondakali kuyandika kumuuya. Mubwini, muzikombelo eezyi kunyina nobakali kukulwaizya bantu kuti kabapona kweelana anjiisyo alimwi azyeelelo zyamu Bbaibbele. Nobakafwa bamaama mu 1981, ndakatalika kunywa bukoko alimwi akuuma njuka. Ndakali kuyeeya kuti mbokunga ndililemenyi, Leza wakali kukonzya kundeetelela alimwi akundilekelela akaambo kakukolwa. Alimwi ndakatalika kutalilemeka kwiinda mukukkala amukaintu ngotwatakakwetene limwi.

Kucinca Kupati Mukuyeeya

Kandijisi myaka yakuzyalwa iili 37, ndakayaana ciindi cakusaanguna a Bakamboni ba Jehova. Akaambo kazyintu zibi bantu nzyobakali kwaamba, lyoonse bamaama bakali kwaamba kuti Bakamboni ba Jehova ncecikombelo ciinda kubija. Nokuba boobo, ndakabatambula muŋanda yangu—kandijisi makanze aakubatondezya kuti balabeja mbokunga ndakali kuyeeya kuti ndililizyi kapati Bbaibbele. Ndakagambwa kuzyiba kuti anu kunyina ncondakazyi. Alimwi icakandigambya ncakuti, beenzu bangu aaba bakali kubelesya Bbaibbele kuvwiila mibuzyo yangu yoonse. Tiilyakalampa, ndakasyoma kuti ndakajana kasimpe.

Cuusisya ncakuti, mukaintu ngotwakali kukkala limwi walo waakaka kuzumina zyintu nzyondakatalika kusyoma, aboobo twakaandaana. Kutegwa nditobele njiisyo zyamu Bbaibbele, ndakazumanana kucinca bukkale bwangu bubi alimwi ndakacinca mbondakali kuzibona zyintu ambondakali kuyeeya. Kwiinda mukugwasigwa a Leza, ndaleka kukatazigwa amizeezo iijatikizya ntenda yakandicitikila—cakunga kwamyaka iili 20, ndakonzya kujana  lukkomano mukucita mulimo wakukambauka ciindi coonse. Kubona mbondilemenyi, bantu banji balagambwa alimwi balabuzya kuti naa ndikkwanisya buti kucita mulimo ooyu alimwi akuzumanana kukkomana. Tandili ndelikke pe. Ndikkala amusyoonto wangu, Ubaldo walo uuciswa bulwazi bwakutakomena kabotu alimwi akutakkwana kabotu, (Down syndrome). Awalo Ubaldo waakazumina kasimpe kamu Bbaibbele, alimwi tulaamwi mukubelekela Jehova.

Tulamvwana kapati alimwi tulabikkilana maano. Ciindi notuli mumulimo wakukambauka, Ubaldo ulandikuba ancinga yabalema alimwi ulandikonkomoneda amulyango, alimwi ciindi nondibandika abamukamwini ŋanda, ulandigwasya kujalula Bbaibbele alimwi ulabatondezya mabbuku aaelede. Alimwi ulandigwasya kucita zyintu azimbi. Ndime ndimulela kwiinda mukusambala mafwuta aakulibotesya kumeso. Kuyungizya waawo, bakwesu abacizyi bamumbungano yesu ya Bakamboni ba Jehova, balatugwasya kujika akucita milimo imwi yaaŋanda, alimwi anotuunka kuya kubonana abadokotela—mebo a Ubaldo tulalumba kapati akaambo kazyeezi zyoonse!

Mumbungano ya Bunakristo, ndijisi coolwe cakuba mwaalu, alimwi bakwesu balilisungwide kundigwasya kuvwuntauzya makani aamu Bbaibbele. Kwiinda mukubelesya pensulo iili mukanwa, ndilakonzya kweengela twaambo tupati-pati mumabbuku ngotwiiya.

Ikuti bantu bandibuzya kuti naa ndikkomene, lyoonse ndilabamvwiila amoyo woonse kuti inzya! Ino ncinzi cikonzya kundilesya kukkomana? Ndaijana mpindu yabuumi, alimwi ndilangila kuciindi citaliboteli eeco Leza ncaakasyomezya bakombi bakwe ibasyomeka—kuba abuumi bulondokede mu Paradaiso yaanyika iiboola.—Isaya 35:5, 6; Luka 23:43.

[Cifwanikiso icili apeeji 23]

Ba José kabajisi myaka yakuzyalwa iili 18, mwaka omwe kaitanacitika ntenda

[Cifwanikiso icili apeeji 24]

Mebo amusyoonto wangu Ubaldo katubeleka antoomwe mumulimo wakukambauka ku Mexico

[Cifwanikiso icili apeeji 24]

Kambonima undigwasya kujana tupango mu Bbaibbele ciindi nondipa makani ku Ŋanda ya Bwami

[Cifwanikiso icili apeeji 24]

Bantu bamumbungano yesu batugwasya kujika alimwi akucita milimo imwi yaaŋanda