Amulombe Lugwasyo

“Alimwi bantu bobile balakonzya kuzunda mundike, pele omwe ulakonzya kuzundwa kulinguwe.”—Mukambausi 4:12.

IKUTI bantu bambi batugwasya kulwana sinkondoma naa cintu cimwi citulwana, tulalangilwa kuzunda—kufwumbwa naa sinkondoma ooyu nguni alimwi naa cintu eeci ncinzi. Aboobo ikuti kamuyanda kuzwidilila mumakanze eenu aakuleka kufweba, inga caba cabusongo kuti mwalomba banamukwasyi abalongwe benu kuti bamugwasye—naa muntu uumwi buyo uukonzya kumugwasya alimwi akumukkazikila moyo.

Amusole kulomba lugwasyo kuli baabo bakaleka kufweba mbokunga balo balakonzya kumweetelela alimwi akumugwasya. Ba Torben, Banakristo ibakkala ku Denmark bakaamba kuti: “Bantu bakandigwasya kapati.” Ba Abraham, ibakkala ku India bakalemba kuti: “Luyando lwini-lwini ndobakanditondezya Banakristoma alimwi abanamukwasyi lwakandigwasya kucileka kufweba.” Pele nokuba kuti banamukwasyi abalongwe bapa lugwasyo, zimwi ziindi inga kakuciyandika lugwasyo alumbi.

Baalumi bamwi ibaitwa kuti Bhagwandas bakaamba kuti: “Ndakali kufweba kwamyaka iili 27, pele akaambo kakwiiya ncolyaamba Bbaibbele kujatikizya zilengwa zibi, ndakayeeya kucileka kufweba. Ndakasola kucesya ziindi zyakufweba. Ndakaleka kumvwana abeenzuma mbotwakali kufweba limwi. Ndakaunka kuya kulomba lugwasyo kuli basyaazibwene. Kunyina cakabeleka pe. Kumane busiku bumwi ndakapaila, ndakamwaambila Jehova Leza zyoonse zili mumoyo wangu alimwi ndakamulomba kuti andigwasye kuti ndileke kufweba. Inzya, aciindi aawa ndakacikonzya!”

Icimbi ciyandika nkuzyiba mbomuya kulwana buyumu-yumu mbomulangilwa kuyakujana. Ino mbuyumu-yumu nzi? Cibalo citobela cilapandulula.

[Kabbokesi kali apeeji 5]

SENA MUYAKUBELESYA MISAMU?

Bantu banji babelesya misamu mbuli nicotine patch, kuti ibagwasye kuleka kufweba. Kamutanasala kuti mubelesye misamu eeyi, amulange-lange mibuzyo iitobela:

Ino nimpindu nzi njomukonzya kujana? Bantu baamba kuti muntu uubelesya misamu eeyi ulalangilwa kuzwidilila nkaambo bunji bwamisamu eeyi icesya buyumu-yumu mbobajana bantu ibasola kuleka kufweba. Nokuba boobo, kuli kukazyanya kuliko kujatikizya ziya kucitika kulibaabo ibaibelesya kwaakwiinda ciindi cilamfwu.

Ino nintenda nzi ziliko? Misamu imwi ilakonzya kupa muntu kuciswa naa kutalimvwa kabotu, ulakonzya kumvwa kuvwundaukwa kumoyo, kutyompwa alimwi akuba amizeezo yakulijaya. Kamuyeeyede kuti kubelesya misamu njobaamba kuti igusya musamu uutegwa nicotine mumubili, ncimwi buyo akuubelesya musamu ngomunya, alimwi iletela ntenda mbubwenya mbuli musamu wini kuugama. Aboobo, mubwini, muntu uubelesya misamu eeyi ucili muzike.

Ino ninzila nzi zimwi ziliko? Mubuvwuntauzi bumwi bwakacitwa, kwakajanika kuti bantu banji ibakacikonzya kuleka kufweba bakaamba kuti bakainda akucileka kufweba kakunyina kubelesya misamu nokuba kuti bakajana buyumu-yumu buboola ikuti muntu wacita boobu.