Amube Aluyandisisyo

“Ikuti muntu kayanda kuleka kufweba, ikulyaaba ncintu ciyandika kapati calo icakagwasya baabo ibakacikonzya kuleka kufweba.”—Mbolyaamba bbuku litegwa “Stop Smoking Now!”

MUBUFWAAFWI, ikuti kamuyanda kuleka kufweba, mweelede kuba aluyandisisyo lwakucita boobo. Ino ncinzi cikonzya kumugwasya kuba aluyandisisyo luli boobu? Amuyeeye mbomuya kugwasyigwa mwaakuleka kufweba.

Muyakucikonzya kuyobola mali. Kuula tombwe abuzuba kulakonzya kupa muntu kusowa mali manji mpuuyakumanina mwaka. “Tiindakalizyi kuti ndakali kunyonyoona mali manji kuula tombwe.”—Ba Gyanu, baku Nepal.

Muyakuba bantu bakkomene kapati mubuumi. Ba Regina, baku South Africa bakaamba kuti: “Kuzwa nindakacileka kufweba, buumi bwangu bwakabota alimwi buya bwiindila kubota.” Ciindi bantu nobaleka kufweba, balakonzya kununkizya akulabila kwiinda ciindi nobakali kufweba, balaba anguzu alimwi mibili yabo iboneka kabotu.

Mulakonzya kuleka kuciswa-ciswa. “Ikuleka kufweba kulakonzya kubagwasya bamaalumi abamakaintu bamisela yoonse.”—Kabunga kaku United States ikakwabilila bantu kumalwazi, ikategwa The U.S. Centers for Disease Control and Prevention.

Muyakucikonzya kulyeendelezya. “Ndakacileka kufweba nkaambo tiindakali kuyanda kuti tombwe ube nguundeendelezya. Ndakali kuyanda kuti kandilyeendelezya ndemwini.”—Ba Henning, baku Denmark.

Mukwasyi wenu alimwi abeenzinyoko bayakugwasyigwa. “Kufweba . . . kubikka buumi bwabantu mbomukkala limwi muntenda. . . . Buvwuntauzi butondezya kuti amwaka bantu bali zyuulu balafwa akaambo kamalwazi aakumoyo alimwi akkansa yakumapwaapwa akaambo kakuyoya busi bwatombwe.”—Kabunga kalanga-langa makani aajatikizya bulwazi bwakkansa ikategwa American Cancer Society.

Muyakukkomanisya Mulengi wenu. “Nubayandiki, . . . atulisonzole busofwaazi boonse nibuba bwamubili.” (2 Ba-Korinto 7:1) “Mutuule mibili yanu, ibe cipaizyo cuumi, cisalala, ciyandisi kuli-Leza.”—Ba-Roma 12:1.

“Nindakazyiba kuti Leza tayandi zyintu zisofwaazya mubili, ndakacileka kufweba.”—Ba Sylvia, baku Spain.

Nokuba boobo, kanji-kanji, iluyandisisyo lulikke talugwasyi. Inga kwayandika kuti bantu bambi batugwasye, eeci cilabikkilizya banamukwasyi abeenzuma. Ino ncinzi ncobakonzya kucita?