Ncolyaamba Bbaibbele

Ino Buzuba Bwalubeta Ninzi?

Bbaibbele lyaamba kuti Leza “wabika buzuba mbwati kabeteke nyika.” (Incito 17:31) Bantu banji tabakukkomanini kubetekwa. Sena andinywe mbomulimvwa oobo?

IKUTI kakuli boobo, inga mwakkomana kuzyiba kuti Buzuba Bwalubeta mbubambe bwaluyando ibuyakuleta zilongezyo kubantu—kubikkilizya abafwide. (Matayo 20:28; Johane 3:16) Ino nkaambo nzi Buzuba Bwalubeta ncobuyandika? Ino ncinzi cini ciyakucitika ‘mubuzuba’ oobo?

Buzuba Bwalubeta—Ino Nkaambo Nzi Ncobuyandika?

Ciindi Leza naakabikka bantu anyika, tanaakacita boobu kutegwa abasunke kubona kuti naa baleelela kuyakukkala kubusena bumbi. Wakalenga bantu kuti bakkale anyika kukabe kutamani. Nokuba kuti bakalilondokede, banabukwetene bakusaanguna bakazangila Leza. Aboobo, bakasweekelwa bulangizi bwabo bwabuumi butamani alimwi bakaletela bana babo boonse cibi alufwu.—Matalikilo 2:15-17; Ba-Roma 5:12.

Buzuba Bwalubeta, myaka iili cuulu, nciindi bantu mobayakuba acoolwe cakuba aceeco Adamu a Eva ncobakasowa. * Amubone kuti Incito 17:31 iyazubululwa atala aawa, yaamba kuti Buzuba Bwalubeta buyakubajatikizya bantu bapona ‘anyika.’ Aabo bayakujanika kuti baliluleme bayakupona kukabe kutamani anyika alimwi bayakukkala kabotu. (Ciyubunuzyo 21:3, 4) Aboobo, Buzuba Bwalubeta bugwasya kuzuzikizya makanze Leza ngaakajisi kumatalikilo kujatikizya bantu alimwi anyika.

Mubetesi uusalidwe a Leza ngu Kristo Jesu. Bbaibbele lyaamba kuti Jesu “uuyoobeteka baumi abakafwa.” (2 Timoteo 4:1) Ino “baumi” bayakubetekwa mbaani? Ino mbuti bafwide mbobayakupona alimwi ‘anyika’?

Jesu Ubeteka “Baumi”

Lino mamanino aabweende bwazyintu oobu aakasinsimwa, alaafwaafwi akusika, ciindi Leza nayakunyonyoona mbazu zyoonse zyabantu bampelenge alimwi abasizibi. Bantu bayakufwutuka mamanino aabweende bwazyintu oobu  ‘mbobaumi’ ibayakubetekwa.—Ciyubunuzyo 7:9-14; 19:11-16.

Muciindi calubeta, iciyakutola myaka iili cuulu, Kristo Jesu antoomwe abamaalumi abamakaintu ibali 144,000 ibayakupona kujulu bayooendelezya nyika. Bayakuba bami abapaizi, akupa zilongezyo zyacinunuzyo ca Jesu alimwi buce-buce baya kugwasyilizya bantu kuti balondoke kumubili amumizeezo.—Ciyubunuzyo 5:10; 14:1-4; 20:4-6.

Mubuzuba Bwalubeta, Saatani alimwi amadaimona bayakwaangwa kuti batayungi bantu. (Ciyubunuzyo 20:1-3) Nokuba boobo, kumamanino aa Buzuba Bwalubeta, Saatani uyakuzumizigwa kusunka lusyomo lwabantu boonse bapona. Aabo bayakuzumanana kusyomeka kuli Leza mbobaya kuzwidilila mumusunko ooyo Adamu a Eva ngobakaalilwa. Bayakweelela kutambula buumi butamani mu Paradaiso iipilusidwe anyika. Aabo ibayakuzangila Leza bayakunyonyoonwa cakumaniina, mbubonya mbuli Saatani amadaimona aakwe.—Ciyubunuzyo 20:7-9.

Kubeteka “Bakafwa”

Bbaibbele lyaamba kuti Mubuzuba Bwalubeta, bafwide “bazooima” naa kubusigwa. (Matayo 12:41) Jesu wakaamba kuti “ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya, abo abakacita kabotu bayoobusigwa kubuumi, abaabo abakacita bubi bayoobusigwa kukubetekwa.” (Johane 5:28, 29) Eeci tacaambi myuuya yabantu bakafwa. Bafwide tabazyi cintu nociba comwe pe, alimwi kunyina muuya naa cintu cimwi cizumanana kupona muntu afwa. (Mukambausi 9:5; Johane 11:11-14, 23, 24) Jesu uyakubabusya bafwide kuti bakapone alimwi anyika.

Sena bantu ibayakubusigwa bayakubetekwa kweelana azyintu nzyobakacita kabatanafwa? Peepe. Ibbaibbele liyiisya kuti “mufu waangunwidwa mulandu wazibi” naa kuti muntu wafwa waangununwa kucibi cakwe. (Ba-Roma 6:7) Aboobo, mbubonya mbuli basikufwutuka mamanino aabweende bwazyintu oobu, aabo ibayakubusigwa bayakubetekwa kweelana a “milimo yabo” njobayakucita Mubuzuba Bwalubeta. (Ciyubunuzyo 20:12, 13) Kweelana azyintu nzyobayakucita kusikila kumamanino, kubusyigwa kwabo kuyakuba kwakubuumi butamani naa kwakuyakunyonyoonwa. Bunji bwabaabo ibayakubusigwa, eeci nceciya kuba ciindi cakusaanguna kumuzyiba Jehova Leza alimwi anzyayanda kuti bacite kutegwa babe abuumi. Bayakuba acoolwe cakupona kweelana azyintu Leza nzyayanda alimwi akutambula buumi butamani anyika.

Tatweelede Kubuyoowa Buzuba Bwalubeta

Buzuba Bwalubeta tacikabi buyo ciindi cakuyiisyigwa a Leza pele alimwi cinooli ciindi cakuti aabo bapona babelesye nzyobaiya akutambula zilongezyo ziyakuboola akaambo kakucita boobo. Amuyeeye buyo mbomuya kukkomana kuyanzana alimwi abayandwa benu batikabusyigwe alimwi akuyabulondoka antoomwe ambabo!

Kumamanino aa Buzuba Bwalubeta, Leza uyakuzumizya Saatani kusunka bantu. Pele tatweelede kulibilika naa kuyoowa. Kumamanino aa Buzuba Bwalubeta, bantu boonse bapona banoolibambilide musunko ooyu wamamanino. Aboobo, Buzuba Bwalubeta buyakuba cibeela cakuzuzikizigwa kwamakanze aa Leza aakugwisya bubi buliboonse ibwakaboola akaambo kakuzangila Leza kwakacitika mumuunda wa Edeni.

Bupanduluzi buyungizidwe

SENA KULI NOMWAKALIBUZYIDE KUTI:

● Ino Buzuba Bwalubeta ninzi?—Incito 17:31.

● Ino mbaani bayakubetekwa?—2 Timoteo 4:1.

● Ino Buzuba Bwalubeta buyakutola ciindi cilamfwu buti?—Ciyubunuzyo 20:4-6.

[Majwi aakwelelezya sikubala aali apeeji 11]

Amuyeeye buyo mbomuya kukkomana kuyanzana alimwi abayandwa benu batikabusyigwe

[Cifwanikiso icili apeeji 10]

Mubweendelezi bwa Kristo, aabo bakafwa bayakubusigwa kuti bapone muparadaiso anyika