Ndakaleka Kubelekela Mubwato Bwankondo Akutalika Kubelekela Jehova

Akaluulwa aba Andrew Hogg

Mupati wabasikalumamba bakali kubelesya bwato oobu wakaamba kuti: “Ikuti naa tubelesye zilwanyo zyankondo izya nuclear, nkokuti twaalilwa kubeleka mulimo wesu.” Majwi aaya akapa kuti kube mibandi, kusola kuzyiba naa cakali kweelela kubelesya zilwanyo eezi. Pele ino ncinzi cakapa kuti ndinjile mulimo ooyu wabusikalumamba iwakubelekela mubwato bweendela ansi amaanzi walo ngotwakali kubeleka cakusisikizya nkaambo tiitwakali kuyanda kuti bantu bazyibe ncotucita alimwi ankotubede?

NDAKAZYALWA mu 1944, mudolopo lya Philadelphia ku Pennsylvania mu U.S.A. Nindakali kuyabukomena, bataata, bakaapa bazyala bamaama alimwi abaacisya ibapati babamaama, bakali kundikulwaizya kunjila mulimo wabusikalumamba akaambo kakuti boonse bakaubeleka mulimo ooyu alimwi bakali kuubona kuba mulimo waatala kapati. Nkecili mulombe, ndakaunka kuyakuswaya munkambi yabasikalumamba babelesya mato aankondo alimwi eeci ncicakali cakusaanguna kubona bwato bwankondo ibweendela ansi amaanzi. Kuzwa ciindi eeci, ndakaba amakanze aakuti ndikabe sikalumamba uubelekela mubwato bwankondo. Nindakali mubbuku lyamamanino kusekondali, ndakatambulwa kuya kwiiya mulimo wabusikalumamba bwamumaanzi kucikolo ca U.S. Naval Academy. Nokwakainda myaka yone, mu June 1966, ndakamanizya cikolo.

Ndakatalika kwiiya kubamba zilwanyo zya nuclear izyamu mato aankondo alimwi amilimo iimwi yamumato aaya (Naval Nuclear Propulsion Program). Mpoonya mu April 1967, twakakwatana a Mary Lee Carter, alimwi tucikwetene kusikila sunu. Kumane mu March 1968, makanze aangu akazuzikizyigwa ciindi nindakapegwa mulimo wakubelekela mubwato bwankondo butegwa USS Jack. Kwiinde buyo mwaka omwe, Mary wakatumbuka mwaneesu mutaanzi—imusimbi ngotwakaulika kuti Allison.

Mu 1971, ndakasumpulwa kuba Mupati-pati wabasikubamba (Engineer Officer) bwato ibutegwa USS Andrew Jackson, ibwakali kweendelezyegwa amupati wabasikalumamba iwakaamba majwi aali kumatalikilo aacibalo eeci. Katuli mulwizi, mubwato oobu ibwakajisi mabbomba aakufwusa (missiles), cakutayeeyelwa kwakacitika cintu ncobayoowa basikalumamba babelesya mato—kwakavwutuka mulilo. Kwakaindide buyo ciindi cisyoonto kuzwa akaandabwe kabusiku, katwiizya abasikalumambama, twakamvwa mbuli kuti kuli cabboloka mubwato. Mpoonya kwakalila mulangu kuzyibya kuti kuli cacitika alimwi twakamvwa kwaambilizya kwakuti: “Kwabbuka mulilo mukaanda muli mincini!”

Akaambo kakuti ndime ndakajisi mulimo wakulanganya mbwiibeleka mincini mubwato oomu, ndakalunduka kuya kubona cacitika. Kwakatalikide mulilo mumuncini umwi uupompa muya wa oxygen ngotwakali kuyoya mubwato. Cakufwambaana, mebo abeenzuma bamwi botatwe, twakasama zibelesyo zyakuyoyela akunjila mukati kugusya zyintu zyakali kukonzya kujatila mulilo. Mucoolwe kunyina wakalicisa. Nokuba kuti kwakacitika ntenda eeyi, twakacikonzya kuzumanana mulweendo lwesu lwakugadela—Icitondezya kuti twakayiisyigwa kabotu mulimo ooyu.

Ndakasala Kubala Makani Aajatikizya Siluumuno

Kutegwa tukonzye kuzumanana kubeleka mulimo ooyu uukatazya, twakali kukulwaizyigwa kuti ansondo katubala makani aajatikizya zilengwa zyabantu  kwamawoola aali mbwaabede. Bunji bwaziindi ndakali kubala makani aamba buumi bwabasikalumamba bamwi bakajisi mpuwo. Pele aciindi eeci ndakayeeya kubala makani aajatikizya muntu umwi uuzyibidwe kuti ngusiluumuno—Jesu Kristo. Ndakatalika kubala Makani Mabotu mu Bbaibbele ndyondakapegwa ciindi nindakamanizya lwiiyo lwabusikalumamba bwamu maanzi. Pele muciindi cakujana bwiinguzi eeci cakapa kuti ndibe amibuzyo minji. Ndakali kuyandika lugwasyo.

Notwakali kuya kumamanino alweendo lwesu, mupati wabasikalumamba mubwato oomu wakaita muswaangano kumane wakaambilizya kuti: “Nobalombwanama, sikulanganya mincini mubwato muno wapegwa mulimo wiinda kubota akati kamilimo yabasikalumamba bamu United States ibabelekela mumato. Waba Mupati-pati Wabasikubamba bwato bwankondo bupya.” Kaambo aaka kakandiyumya mukanwa!

Ooyu mulimo mupya wakandipa kulongela ku Newport News, mu Virginia, ikwakali kubambilwa bwato bwankondo ibutegwa USS Los Angeles. Mulimo wangu wakali kubikkilizya akusola mincini kubona naa ibeleka kabotu, kubamba mabbuku aatondezya mbwiibeleka ambwiikonzya kubambwa mincini alimwi ndakali kubamba mapulogilamu akuyiisya bantu. Mulimo ooyu wakali kukatazya kapati pele wakali kundikkomanisya. Aciindi aawa, mukaintu wangu wakatumbuka mwaneesu mulombe ngotwakaulika kuti Drew. Lino twakaba abana bobile, alimwi ndakatalika kuyeeya Leza akulibuzya kuti: ‘Ino uyeeya buti kujatikizya nkondo? Ino ncinzi cicitika muntu afwa? Sena kuli mulilo uutamani?’

Limwi Ndakabujana Bwiinguzi!

Aciindi mpoonya aawa, mukaintu wangu wakatalika kwiiya Bbaibbele a Bakamboni ba Jehova bobile. Bumwi buzuba, nkeli kumulimo, ndakatuma luwaile kuŋanda, eelyo Mary Lee wakandaambila kuti: “Bamakaintu bobile ibayiisya Bbaibbele nkobali.”

Ndakabuzya kuti: “Ino mbacikombelo nzi?”

Wakaingula kuti: “Mbaakamboni ba Jehova.”

Tiindakabazyi pe Bakamboni, pele ndakali kuyandisya kulimvwisya Bbaibbele. Mpoonya ndakamwaambila kuti: “Kobaambila kuti bakaboole alimwi.” Nokwakainda buyo mazuba masyoonto, umwi wabo wakaboola abalumi bakwe. Mebo amukaintu wangu twakatalika kwiiya Bbaibbele.

Lino ndakatalika kujana bwiinguzi bwamibuzyo iyakali kundikatazya kwamyaka minji. Mucikozyanyo, ndakazyiba kuti bafwide “tabezi cintu niciba comwe,” mbuli kuti baloona—icikozyanyo ncaakabelesya Jesu. (Mukambausi 9:5; Johane 11:11-14) Aboobo, bafwu tabali mulukkomano naa mukupenzyegwa, pele ‘baloona’ mulufwu akulindila bubuke.

Twakatalika kwiinka kumiswaangano ya Bunakristo ku Ŋanda ya Bwami. Twakabona Bakamboni—ibazwa kumisyobo yiindene-indene, lwiiyo lwiindene-indene azilengwa ziindene-indene—boonse  kababelekela Leza muluumuno alukamantano. Mebo amukaintu wangu twakabona kuti: “Masimpe! Ibbaibbele lilakonzya kusumpula buumi bwabantu.”—Intembauzyo 19:7-10.

Lino Cakasika Ciindi Cakusala

Noyakatalika nkondo yabama Arabu abana Israyeli mu 1973, mato aankondo aaitwa kuti U.S. Atlantic Fleet akatumwa kunkondo eeyi. Zyintu zyakali kulangilwa kubija, alimwi lino ndakabona kuti mubwini Ibwami ba Leza mbobukonzya kuleta luumuno lwini-lwini ilutamanani, ikutali mbunga zyamapolitikisi. Alimwi buya kanji-kanji ndakali kupaila kuti, “Abuze Bwami bwako, alucitwe luyando lwako, ansi ano,” pele tiindakazyi ncowaamba mupailo ooyu. (Matayo 6:9, 10) Lino ndakazyiba kuti Bwami bwa Leza nimfwulumende iini-ini yakujulu iiyakulela anyika ino-ino, iiyakugusya bubi abasizibi boonse anyika.—Daniele 2:44; 7:13, 14.

Majwi aali kulugwalo lwa 2 Ba-Korinto 10:3, 4 akandinjila kapati mumoyo. Lugwalo oolu lwaamba kuti “kulwa” kwa Banakristo bakasimpe “takweensi kwaansi pe, nkaambo zintu zyesu zyakulwisya tazyeensi zyabantu buyo, nzyanguzu zya-Leza.” Eezyi “zyakulwisya” nzindakaiya nzyamuuya, alimwi zilabikkilizya “apanga lya-Muuya”—Ibbaibbele lisalala.—Ba-Efeso 6:17.

Lino ndakeelede kulisalila. Sena ndizumanane kubeleka mulimo wangu ooyu wakumubili, uukatazya pele ngondakali kukkomanina, naa ndicince bukkale bwangu akupona kweelana akasimpe kamu Bbaibbele? Nindakamana kwaapailila makani aaya, ndakayeeya kuti ikutegwa ndibe sikubamba luumuno wini-wini, ndeelede kucita zyintu munzila njayanda Leza.

Kubelekela “Mupati Wabasikalumamba Uumbi”

Mebo a Mary Lee twakaapailila akwaabandika makani aaya alimwi twakasala kubelekela “Mupati wabasikalumamba” wiinda nguzu—Jehova Leza. Aumwi wesu wakasala kulyaaba kuli Jehova, mpoonya ndakalemba lugwalo lwakuleka mulimo wabusikalumamba. Kumane bakandilonzyenzya kudolopo lya Norfolk ku Virginia kuti ndikalindile kuzumizigwa kuleka mulimo ooyu abalupati-pati. Bunji bwababelesima bakagambwa alimwi bamwi bakandisula akaambo kakusala ooku. Nokuba boobo, bamwi bakakulemeka kusala kwangu.

Mu 1974, ndakazumizyigwa kuleka mulimo wabusikalumamba. Mwaka nguwenya ooyu, mebo amukaintu wangu twakabbapatizyigwa kumuswaangano wacooko wakuti “Divine Purpose” iwakacitilwa mudolopo lya Hampton, ku Virginia. (Matayo 28:19, 20) Twakatalika buumi bupya.

Twakajana Buyumu-yumu Bumbi

Twakajisi bana bobile, pele tiitwakali kubeleka alimwi twakajisi mali masyoonto ngotwakali kukonzya buyo kubelesya kwamyezi misyoonto. Ndakalembela mulimo kumakkampani maji, kumane zyintu ndakazibika mumaanza a Leza. Nokwakainda buyo mazuba masyoonto, ndakaitwa kuyakubeleka kukkampani imwi. Mali ngondakali kuvwola akali masyoonto kwiinda ngondakali kuvwola nindakali sikalumamba, pele mulimo ooyu wakatugwasya kuzumanana kukkala mubusena oobu.

Notwakatalika kusima kumuuya, mebo amukaintu wangu twakayanda kucita zinji mumulimo wa Jehova. Mukwasyi wa Bakamboni umwi ngotwakazyi, iwakalongela ku Virginia kuyakubelekela kubusena kubulide bakambausi, wakatutamba kuti tukabaswaye. Notwakabaswaya buyo kwaciindi comwe, twakatalika kulibambila kulonga. Kuncito ndakalomba kuti nkabelekele kubusena bumbi mukkampani njemunya eeyi, aboobo ndakakkomana nobakandizumizya. Alimwi bakandipulomota. Kkampani yakatupa mali aakali kuyandika kuti tulonge. ‘Masimpe,’ twakabona kuti ‘Leza ulababikkila maano aabo ibasoleka canguzu kucita kuyanda kwakwe.’—Matayo 6:33.

Akaambo kakuti mukwasyi wesu wazumanana kupona buumi bwakutayandisya lubono, mebo amukaintu wangu twakacikonzya kucita mulimo wabupainiya bwaciindi coonse. Kucita boobu kwakatugwasya kuti katujana ciindi cakuba abana besu bobile ciindi nobakacili kukomena. Inzya, tulikkomene kapati nkaambo eeci capa kuti bana besu, Allison a Drew, bazumanane ‘Kweenda mukasimpe’.—3 Johane 4; Tusimpi 23:24.

Ee, kuli ziindi zimwi notulibilika akaambo kamali, buponi bwesu, alimwi akucembaala. Pele Jehova ulatugwasya lyoonse. Sena ndilatyompwa akaambo kakuleka mulimo wabusikalumamba? Peepe! Twayeeya buumi bwesu bwamusyule, mebo amukaintu wangu tubona kuti mubwini kubelekela Jehova ncecintu ciinda kubota mubuumi.—Mukambausi 12:13.

[Majwi aakwelelezya sikubala aali apeeji 30]

Twakasala kubelekela “Mupati Wabasikalumamba” wiinda

[Cifwanikiso icili apeeji 29]

Bwato bwa USS “Los Angeles”

[Kulumba]

U.S. Navy photo

[Cifwanikiso icili apeeji 29]

A Mary Lee mazuba aano