Kujatilila Kujanza lya Leza Lyalulyo

▪ Jazreel walo uukkala kucisi ca Mexico wakazyalwa kajisi bulwazi butadumide ibujatikizya lukanda bwalo ibwiitwa kuti congenital lamellar ichthyosis. Oobu bulwazi bupa kuti cikanda ciyupuluke akutilibala naa kuyuminina. Jazreel waamba kuti: “Eeci cipa kuti kanditaboneki kabotu, pele bulwazi oobu tabuyambukili pe.”

Ciindi Jazreel naakali mumvwanda wakali kusilikwa muzibbadela ziindene-indene. Naakajisi myaka yakuzyalwa yobilo, bakamubikka alikke mubusena bumwi mucibbadela kutegwa atayambukilwi malwazi aambi. Nokuba boobo, bulwazi bwakwe oobu bwakazumanana. Basilisi basilika bantu batyompedwe bakamukkazyika ansi akumwaambila ncayelede kucita kutegwa atanootyompwi ciindi nobamuseka bantu.

Bantu ibayeeya kuti bulwazi bwa Jazreel bulayambukila, kanji-kanji balamutantamuka. Eeci cakali kumukatazya kapati ciindi naakali kuyanda kusobana abana bamwi kacili mwana. Waamba kuti, “Bakali kundiseka alimwi akundifwubaazya kabandiita kuti mutumba.”

Kulubazu lumwi, kuciswa bulwazi mbobakonzya kubona bantu kwapa kuti Jazreel ajane coolwe cakubandika abantu makani aajatikizya bulangizi bwamu Bbaibbele mbwajisi. Bantu banji balamubuzya ikuti naa wakapya aamulilo. Aingula kuti peepe, inga bayanda kuzyiba cipa kuti kalibonya boobo. Ulabapandulwida bulwazi mbwajisi alimwi akubaambila kuti ecino ciindi kunyina musamu wakajanwa kale uukonzya kumusilika.

Mpoonya ubaambila kuti, “Ndijisi bulangizi bubotu kapati nkaambo Jehova Leza usyomezya kuti bantu boonse ibatobela milawo yakwe bayoopona munyika mpya mwalo imutakabi malwazi alioonse.” (Ciyubunuzyo 21:3, 4) Kubandika makani aajatikizya bulwazi bwakwe munzila eeyi kwapa kuti Jazreel acikonzye kutalisya ziiyo zya Bbaibbele abantu alimwi ulikkomene ikubona kuti bantu bali mbuli mbobabede baba Bakamboni ba Jehova.

Jazreel waamba kuti, “Ndilikkomene kuti ndakazyalilwa mumukwasyi wa Bunakristo alimwi akuti mbondili umwi wa Bakamboni ba Jehova, ndijisi balongwe beni-beni. Balongwe bangu boonse tabanditantamuki akaambo kakutalibonya kabotu. Ndakabbapatizyigwa nindakajisi myaka iili 17, alimwi kuzwa ciindi eeco kwainda myaka iili 14 nkebelekela Mulengi wangu munzila ziindene-indene.”

Jazreel ulaayeya majwi aa Jehova aali kulugwalo lwa Isaya 41:10, 13 aakuti: “Utayoowi, nkaambo ndili ayebo. . . . Njookutabilila ajanza lyalulyo lyabululami bwangu. Nkaambo mebo nde-Jehova njookujata kujanza lyalulyo, njookwaambila kuti, Utayoowi, ndime sikugwasya wako.”

Kujatilila kujanza lyalulyo lya Jehova kwapa kuti Jazreel atanoobikkili kapati maano kuzyintu nzyobayeeya bantu kujatikizya mbwaboneka alimwi akuliyumya mumapenzi aaboola akaambo kabulwazi oobu. Walo antoomwe abantu babalilwa kutuulunzuma, ulindilila kuzuzikizyigwa kwazisyomezyo zya Leza.