Buumi Munyika Mpya ya Paradaiso

JESU wakaamba kuti bafwide balakonzya kupona alimwi, alimwi wakaambila basikwiiya bakwe kuti eeci ciya kucitika ncobeni. Wakati: “kumacitulwido [muya ku]kona buumi butamani.” Ino ncinzi ncaakali kupandulula Jesu naakaamba kuti “kumacitulwido”?—Matayo 19:25-29.

Kweelana acibalo ceelene aceeci cakalembwa amulembi wa Bbaibbele Luka, Jesu wakaamba kuti “kuciindi iciza,” basikwiiya bakwe baya kupegwa “buumi ubutamani.” (Luka 18:28-30) Ino nkaambo nzi Ibbaibbele ncolyaambila kuti ‘ciindi ciza’ ncimwi buyo a “kumacitulwido”?

Kuboneka kuti Bbaibbele lyaamba boobu kutegwa likankaizye kaambo kakuti Jehova Leza uyakwaazuzikizya ncobeni makanze ngaakajisi kumatalikilo aakuti bantu kabapona kukabe kutamani muparadaiso anyika. Bantu baya kupona buumi bulondokede mbubwenya mbubakabede ba Adamu a Eva kabatanabisya. Aboobo, “kuciindi iciza” naa “kumacitulwido,” nyika iyakulengululwa kutegwa ibe Paradaiso mbubwenya mbowakabede muunda wa Edeni.

Nyika Mboiya Kusandulwa Kuba Paradaiso

Naakali anyika, Jesu wakayiisya basikumutobela kupailila mfwulumende njaya kubelesya Leza ikusandula nyika yoonse kuba paradaiso. Jesu wakaamba kuti tweelede kupaila kuti: “Abuze Bwami bwako, alucitwe luyando lwako, ansi ano mbubonya mbuli kujulu.” (Matayo 6:10) Leza wakasala Mwanaakwe kuba Mwami wa Bwami oobu, bwalo buya kupa kuti nyika yoonse ikabe Paradaiso kweelana amakanze aakwe.

Ikujatikizya Mwami ngwaakasala Leza, Ibbaibbele lyaamba kuti: “Iswe twazyalilwa mwana, twapegwa mwana mulombe. Bweendelezi buyookala azifunzi zyakwe. Nkabela izina lyakwe liyooabwa kuti, . . . Mwami waluumuno. Bwami bwakwe buyookomenesya, alwalo luumuno talukooyoomana.” (Isaya 9:6, 7) Pele, ino mbuti mfwulumende eeyi iili mumaanza aa “bweendelezi” oobu mboiya kupa kuti luyando lwa Leza lucitwe?

Ibbaibbele liingula kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.”—Daniele 2:44.

Lino atulange-lange bukkale buya kuba munyika mpya ya Paradaiso, nkokuti “kumacitulwido,” eelyo Mwana aa Leza nayakubelesya nguzu nzyapedwe kali ‘Mwami’ mu Bwami bwa Bausyi.

 Mbobuya Kuba Buumi mu Paradaiso

Bafwide baya kubuka

“Ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya.”—Johane 5:28, 29.

“Kulaba kubuka kwabafu, akwabaluleme akwabataluleme.”—Incito 24:15.

Takukabi limbi kuciswa, kucembaala, naa kufwa

“Meso aaboofu ayoobononona, amatwi aabasinke ayoosinkuka. Cilema unooya busotauka mbuli insya, alulimi lwasyataambi luyooimbisya.”—Isaya 35:5, 6.

“Leza mwini uzookala kulimbabo, azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.”—Ciyubunuzyo 21:3, 4.

Kunakuli zyakulya zibotu zinji

“Nyika yapa micelo yayo; Leza, Leza wesu, watulongezya.”—Intembauzyo 67:6.

“Maila avule ansi, atala lyazilundu.” —Intembauzyo 72:16.

Bantu boonse bayakuba amaanda mabotu alimwi amilimo iikondelezya

“Lino bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe.” —Isaya 65:21, 22.

Takukabi limbi milandu, lupyopyongano naa nkondo

“Basizibi bayoonyonyoonwa munyika.”—Tusimpi 2:22.

“Bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”—Isaya 2:4.

Takukabi cintu ciyoosya, aluumuno lunooliko koonse-koonse

“Bayookala caluumuno, taakwe naba omwe uuyoobayoosya.”—Ezekiele 34:28.

“Tabakooyooluma nikuba kunyonyoona moonse mucilundu cangu cisalala, nkaambo nyika iyoozula luzibo lwa-Jehova mbubonya mbuli maanzi mbwaazuzya lwizi.”—Isaya 11:9.

 Eelyo kaka cinookkomanisya kupona munyika iili boobu iizwide bantu bamuyanda Leza alimwi ibayandana! (Matayo 22:37-39) Mulakonzya kuba masimpe kuti kuciindi eeco zisyomezyo zyoonse zya Leza ziya kuzuzikizyigwa. Leza waamba kuti: “Ndaamba kale makani, lino njooazuzikizya.”—Isaya 46:11.

Ambweni muciyandika kwiiya makani aambi aajatikizya Jehova Leza alimwi anyika mpya njaakasyomezya. Mucikozyanyo, ino ncinzi citondezya kuti nyika mpya iili afwaafwi kapati? Ino mbuti Bwami bwa Leza mbobuya kunjila abusena bwamfwulumende zyoonse zyaanyika? Alimwi kutegwa eeci cicitike, ino ncinzi ciya kusaanguna kucitika? Bakamboni ba Jehova balilibambide kumugwasya kulanga-langa mibuzyo eeyi.—Ikuti kamuyanda makani aamwi, amubone apeeji 32 yamagazini eeyi.

Nyika mpya yabululami njotwali kulindila kwamyaka minji iili afwaafwi kapati. Ibunji bwabantu bafwide baya kubuka. Bubuke tacili ciloto buyo; mbubambe bwa Leza. Ibwini mbwakuti bafwide balakonzya kupona alimwi. Ee, “[mbo]buumi bwinibwini”—buumi “[bwaku]ciindi ciciza.”—1 Timoteo 4:8; 6:19.

[Cifwanikiso icili apeeji 23]

Paradaiso, njobakanyonyoona banabubweketene bakusaanguna kwiinda mukutamvwa, iiyoobambululwa