Ucimana buyo kuponya mubelesi wasilutwe wabasikalumamba, Jesu wazwa mu Kapernauma akugama ku Naini, imunzi uuli kumusanza lwaambo ikulampa makkilomita aainda ku 32. Tali alikke pe. Basikwiiya bakwe alimwi ankamu mpati yabantu balaanguwe. Kulangilwa kuti lino nkuumangolezya nobalondelela kunjila mumunzi wa Naini. Ooko bayaanya nkamu yabasimalila ba Juda. Banyamude mubili wamulombwana umwi kuzwa mumunzi kuti bakamuzikke.

Ibauside kapati akati kabasimalila aaba mbaanyina mulombwana ooyu. Mbaamukamufwu, kumane lino awalo mwana omwe buyo ngobajisi wafwa. Naakafwa mulumaabo, mbubo bakalijisi mwanaabo ngobayandisya. Amuyeeyele buyo mbobakali kumvwana kapati amwanaabo ooyu, nkaambo kayi ngonguwe ngobakali kusyoma akulangila kuti unakubagwasya mubuumi kumbele. Pele lino awalo wafwa. Aboobo, ino nguni uunakukkala ambabo alimwi akubagwasya?

Jesu naamubona mukaintu ooyu, weetezyegwa kapati akaambo kabuumba alimwi abukkale bwakwe bweetezya. Aboobo, kaamba caluzyalo ikubelesya majwi aayumya-yumya, wamwaambila kuti: “Koleka kulila.” Pele Jesu tanaalekela waawo. Waswena afwaafwi akujata macila aanyamude mubili. (Luka 7:13, 14) Ncaamba akucita cabapa kwiima basimalila aaba bamumunzi. Kweelede kuti ibanji balibuzya kuti, ‘Ino upandulula nzi muntu ooyu, ino uyanda kutyani?’

Ino mbuti kujatikizya baabo beenda anguwe Jesu ibali kumubona kacita milimo mipati iigambya, kaponya malwazi manji? Cakutadooneka tabanabuzuba bamubona Jesu kabusya muntu kuzwa kubafwu. Nokuba kuti kuli bantu bakabusyigwa kaindi pe eelyo, sena Jesu ulakonzya kucita cintu cili boobu? (1 Bami 17:17-23; 2 Bami 4:32-37) Jesu waamba kuti: “Mulombwana, ndikwaambila kuti, buka!” (Luka 7:14) Alimwi eeco ncicacitika. Mulombwana ooyu wabuka, wakkala, akutalika kwaambaula! Jesu wamupa kuli banyina ibagambidwe pele ibakkomene kapati. Lino baleka kuba balikke.

 Bantu nobabona kuti mulombwana wabuka ncobeni, batalika kutembaula Sikupa Buumi, Jehova, kabati: “Kwabusyigwa musinsimi mupati akati kesu.” Bamwi bacizyiba ncocaamba cintu eeci cigambya ncaacita Jesu, baamba kuti: “Leza wabacebuka bantu bakwe.” (Luka 7:16) Makani aajatikizya maleele aaya amwaika cakufwambaana mumasena oonse aazingulukide, ambweni asika akumunzi okwabo Jesu, wa Nazareta, ooyo uuli kooko kulampa makkilomita aali kkumi. Makani aaya asakana mane asika kumusanza ku Judaya.

Johane Mubbapatizi ucili muntolongo alimwi uliyandide kapati kuzyiba milimo njacita Jesu. Basikwiiya ba Johane bamwaambila makani aamaleele aaya. Ino wacita buti naamvwa makani aaya?