Kwaciindi cili mbocibede, Jesu wali mucooko cili “mutala lya Jordano” citegwa Pereya. (Johane 10:40) Lino uli mulweendo lwakuunka kumusanza ku Jerusalemu.

Jesu tali alikke pe. Basikwiiya bakwe beenda anguwe, kubikkilizya ‘amakamu-makamu aabantu,’ antoomwe abasimutelo alimwi abasizibi. (Luka 14:25; 15:1) Abalo ba Farisi alimwi abalembi, aabo ibasola kumujanina mulandu Jesu muzintu nzyaamba akucita, nkobali aawo. Balaamakani manji aakuyeeya musyule lyakumvwa zikozyanyo nzyaamba Jesu kujatikizya mbelele iisweekede, mwana mutaka, muvwubi alimwi a Lazaro.—Luka 15:2; 16:14.

Ambweni kayeeyede mbobatongooka akusululwa basikumukazya, Jesu wagama basikwiiya bakwe. Waamba twaambo tumwi ntwaakayiisyide musyule ku Galilaya.

Mucikozyanyo, Jesu wati: “Masimpe zilebyo zileelede kuboola. Nokuba boobo, maawe kumuntu ooyo uubelesyegwa kuti zicitike! . . . Amucenjele. Ikuti munyoko wabisya, komunyemena, alimwi ikuti weempwa, komulekelela. Nokuba kuti wakubisizya ziindi zili ciloba mubuzuba bomwe alimwi waboola kulinduwe ziindi zili ciloba kati, ‘Ndeempwa,’ weelede kumulekelela.” (Luka 17:1-4) Kaambo aaka kamamanino keelede kuti Petro kamuyeekezya mubuzyo ngwaakabuzyide kujatikizya kulekelela kusikila kuziindi zili ciloba.—Matayo 18:21.

Sena basikwiiya bayakucikonzya kucita kweelana ancaamba Jesu? Ciindi nobamulomba Jesu kuti, “Kotuyungizyila lusyomo,” walo wabasyomezya kuti: “Nomwalijisi lusyomo lweelene anseke yamusitada, nomwali kukonzya kwaambila mulubbeni ooyu kuti, ‘Zyuka aawa ukasimpwe mulwizi!’ Eelyo inga wamumvwida.” (Luka 17:5, 6) Inzya, noluba lusyomo luniini lulakonzya kucita zintu zigambya.

Jesu wayaambele kuyiisya mbociyandika kulicesya, kulibona munzila yeelede, kwiinda mukwaambila baapostolo bakwe kuti: “Nguni wanu uujisi muzike uulima naa weembela mbelele ampongo uunga aboola kuzwa kumuunda ulamwaambila kuti, ‘Fwambaana boola kuno ukkale akulya’? Muciindi caboobo, sena takamwaambili kuti, ‘Kondibambila cilalilo, alimwi sama kalembo kakukutaukila undibelekele kusikila ndimanizye kulya akunywa, eelyo ndamana ayebo inga walya akunywa’? Sena uyoomulumba muzike ooyo akaambo kakuti wakacita ncaakalaililwa? Nsisyomi oobo pe. Mbubonya buyo andinywe, mwamana kucita zintu zyoonse nzyomwalaililwa, amwaambe kuti: ‘Tuli bazike buyo. Twacita nzyotweelede kucita.’”—Luka 17:7-10.

Mubelesi woonse wa Leza weelede kuzyiba kuti cilayandika kubikka makanze aa Leza kumbele. Kuyungizya waawo, umwi aumwi weelede kuyeeya kuti ncoolwe cipati kukomba Leza kali umwi wabaabo bali mumukwasyi wakwe.

Kuboneka kuti kwiinde buyo kaindi kaniini kuzwa ciindi eeci, kwasika mutumwa uuzwa kuli Mariya a Marta. Aaba mbacizyi ba Lazaro, alimwi bakkala mumunzi wa Betaniya wamu Judaya. Mutumwa wati: “Mwami, bona! Ooyo ngoyandisya ulaciswa.”—Johane 11:1-3.

Nokuba kuti wamvwa kuti mweenzinyina Lazaro ulicisidwe kapati, Jesu kunyina naagolelwa maano akaambo kakuusa. Muciindi caboobo, waamba kuti: “Bulwazi oobu tabuli bwalufwu pe, pele mbwabulemu bwa Leza ikutegwa Mwana wa Leza alemekwe kwiinda mulimbubo.” Wazumanana kukkala mazuba obilo kubusena ooko nkwabede, mpoonya waambila basikwiiya bakwe kuti: “Atuunke mu Judaya alimwi.” Pele balo balibilika balaamba: “Rabbi, caino-ino aawa bana Judaya bakali kuyanda kukupwaya mabwe, aboobo sena nkoyanda kuunka alimwi?”—Johane 11:4, 7, 8.

Jesu wavwiila kuti: “Sena buzuba tabujisi mawoola aali 12 aamumuni? Ikuti muntu keenda mumumuni, talinontoli kucintu cili coonse nkaambo ubwene mumuni wanyika eeyi. Pele ikuti muntu keenda masiku, ulalinontola nkaambo mumuni tauko  mulinguwe.” (Johane 11:9, 10) Kuboneka kuti upandulula kuti ciindi Leza ncamupede Jesu kucita mulimo wakwe tacinamana pe. Nocitanamana, Jesu weelede kucibelesya kabotu ciindi coonse eeco cisyoonto ncacijisi.

Jesu wayungizya kuti: “Lazaro mulongwe wesu uloona, pele ndilaunka kuyoomubusya.” Kabayeeya kuti Lazaro ulyookezya buyo, aboobo ulaba kabotu, basikwiiya baamba kuti: “Mwami, ikuti naa uloona, ulapona.” Jesu wabaambila cakutainda mumbali kuti: “Lazaro wafwa, . . . Pele atuunke kulinguwe.”—Johane 11:11-15.

Kabazyi kuti Jesu ulakonzya kujaigwa, pele kabayandide kumugwasyilizya, Tomasi wakulwaizya basikwiiyanyina kuti: “Atuunke andiswe kutegwa tukafwe anguwe.”—Johane 11:16.