CIIYO 44
Sena Mapobwe Woonse Alamukkomanisya Leza?
Jehova uyanda kuti katubukkomanina buumi, mane buya akuti zimwi ziindi katusekelela. Pele sena mapobwe oonse amazuba aakulyookezya alamukkomanisya Jehova? Mbuti mbotukonzya kutondezya kuti tulamuyanda Jehova mumakani aaya?
1. Nkaambo nzi mapobwe manji ncaatamukkomanisyi Jehova?
Mulakonzya kugambwa kuzyiba kuti mapobwe manji ayeeme anjiisyo izitali zyamumagwalo naa kuti akatalisyigwa abantu batakombi Leza. Mapobwe aali boobu inga kaaswaangene abukombi bwakubeja. Ambweni alijatikizyidwe amadaimona naa ayeeme amuzeezo wakuti buumi tabufwi. Mpoonya aamwi ajatikizya mizimo naa kusyoma leza wacoolwe. (Isaya 65:11) Jehova ulabacenjezya bakombi bakwe kuti: ‘Amulyaandaanye, alimwi amuleke kuguma cintu cisofweede.’—2 Bakorinto 6:17. a
2. Ino Jehova ulimvwa buti kujatikizya mapobwe aapa bantu bulemu ibutabeelede?
Jehova ulatucenjezya kuti tatweelede kucegwa mukakole ‘kakusyoma bantu balya maila.’ (Amubale Jeremiya 17:5.) Mazuba aamwi aakulyookezya alemeka beendelezi naa basikulwanina lwaanguluko. Mumazuba aamwi, bantu basekelela zitondezyo zyamucisi naa lwaanguluko. (1 Johane 5:21) Mpoonya mumazuba aamwi, bambi basekelela mapolitikisi naa mbunga zimwi. Ino Jehova inga walimvwa buti, ikuti twapa muntu bulemu butamweelede, naa mbunga, kwaambisya eezyo zisumpula mizeezo iiteendelani amakanze aakwe?
3. Micito nzi iikonzya kupa kuti pobwe litatambulwi kuli Jehova?
Bbaibbele lilakasya ‘kuciindizya kunywa makoko, mapobwe aateendelezyeki alimwi akuzundana kunywa makoko.’ (1 Petro 4:3) Mumapobwe amwi, bantu tabalijati alimwi tabalilemeki. Kutegwa tuzumanane kuba balongwe ba Jehova, tweelede kwiitantamuka micito iili boobu.
AMWIIYE ZINJI
Amuzyibe mbomukonzya kumukkomanisya Jehova kwiinda mukusala cabusongo caboola kukusekelela mapobwe alimwi amazuba aakulyookezya.
4. Amulikasye kusekelela mazuba aakulyookezya aatamulemeki Jehova
Amubale Baefeso 5:10, akubandika mibuzyo eeyi:
-
Ncinzi ncotweelede kusinizya ciindi notusala naa tweelede kusekelela buzuba bwakulyookezya naa pe?
-
Mazuba nzi aakulyookezya aadumide kubusena nkomukkala?
-
Sena muyeeya kuti mazuba aakulyookezya aayo alamukkomanisya Jehova?
Mucikozyanyo, sena kuli nomwakalibuzya kale kujatikizya mbwayeeya Leza kumakani aakusekelela buzuba bwakuzyalwa? Bbaibbele kunyina mpolyaamba kuti bakombi ba Jehova bakali kusekelela mazuba aakuzyalwa, pele lilaamba kujatikizya mapobwe obilo aakusekelela mazuba aakuzyalwa aabantu ibatakali bakombi bakwe. Amubale Matalikilo 40:20-22 alimwi a Matayo 14:6-10. Mpoonya mubandike mibuzyo eeyi:
-
Ino mapobwe obilo aaya akozyenye buti?
-
Kweelana azibalo zyamu Bbaibbele eezyi, ino muyeeya kuti Jehova ulimvwa buti kujatikizya kusekelela mazuba aakuzyalwa?
Nokuba boobo, mulakonzya kulibuzya kuti, ‘Mwati Jehova ulabikkila maano kuti naa ndatola lubazu mukusekelela buzuba bwakulyookezya naa mapobwe aambi buyo aatali aamumagwalo?’ Amubale Kulonga 32:1-8. Mpoonya, tweebelele VIDIYO akubandika mibuzyo iitobela.
-
Nkaambo nzi ncotweelede kusinizya kujatikizya cintu citambulika kuli Jehova?
-
Mbuti mbotukonzya kucita boobo?
Mbotukonzya kuzyiba naa pobwe lilamukkomanisya Leza naa pe
-
Sena liyeeme anjiisyo zitali zyamumagwalo? Kutegwa muzyibe, amubone matalikilo aandilyo.
-
Sena lipa bantu bulemu ibutabeelede, mbunga naa zitondezyo zyacisi? Tulamulemeka Jehova kwiinda muntu uuli woonse naa cintu cili coonse alimwi tusyoma nguwe kuti nguuyakwaamana mapenzi aamunyika.
-
Sena zilengwa zyandilyo alimwi amicito zileendelana azyeelelo zyamu Bbaibbele? Tweelede kuzumanana kusalala mukulilemeka.
5. Amubagwasye bamwi kulemeka nzyomusyoma
Cilakonzya kukatazya kukaka ciindi bamwi nobakusinikizya kutola lubazu mumapobwe aatamukkomanisyi Jehova. Cakukkazika moyo alimwi abupampu amubapandulwide kusala kwanu. Kutegwa mubone cikozyanyo cijatikizya mbomukonzya kucita boobo, atweebelele VIDIYO.
Amubale Matayo 7:12, akubandika mibuzyo eeyi:
-
Kweelana akapango aaka, sena mweelede kwaambila banamukwasyi ibatasyomi kuti tabeelede kusekelela mazuba aakulyookezya?
-
Ncinzi ncomukonzya kucita kutondezya banamukwasyi kuti, nokuba kuti tamutoli lubazu antoomwe ambabo mumapobwe, mulabayanda alimwi akubabikkila maano?
6. Jehova uyanda kuti katukkomene
Jehova uyanda kuti katujana ciindi cakulikondelezya antoomwe abanamukwasyi alimwi abalongwe. Amubale Mukambausi 8:15, akubandika mubuzyo ooyu:
-
Mbuti kapango aaka mbokatondezya kuti Jehova uyanda kuti katukkomene?
Jehova uyanda kuti bantu bakwe kabalikondelezya alimwi akujana ciindi cibotu cakuba antoomwe. Atweebelele VIDIYO kutegwa tubone eeci mbocitondezyegwa kumiswaangano yesu yamasi.
Amubale Bagalatiya 6:10, akubandika mibuzyo eeyi:
-
Sena tuyandika kusekelela mazuba aakulyookezya aadumide kutegwa tubacitile “milimo mibotu” bamwi?
-
Ncili cikonzya kumukkomanisya kapati: Ciindi nomusinikizyigwa kupa cipego akaambo kabuzuba bwakulyookezya, naa ciindi nomupa akaambo kakuliyandila kucita boobo?
-
Bakamboni banji zimwi ziindi balacitila bana babo cintu cimwi caalubazu naa kubapa zipego nzyobatali kulangila. Ikuti naa mulijisi bana, nzintu nzi zyaalubazu nzyomukonzya kubacitila?
BAMWI BAAMBA KUTI: “Tacikwe makani ambobwakatalika buzuba bwakulyookezya. Ciyandika kapati, nkuba aciindi cakuba antoomwe amukwasyi alimwi abalongwe.”
-
Ino nywebo mwaamba buti?
MUBUFWAAFWI
Jehova uyanda kuti katujana ciindi cakuba abanamukwasyi alimwi abalongwe. Pele alimwi uyanda kuti katwaatantamuka mapobwe aatamukkomanisyi.
Ncinzi Ncomwaiya?
-
Mibuzyo nzi njotukonzya kulibuzya kutegwa tuzyibe naa pobwe limwi lilamukkomanisya Jehova naa pe?
-
Mbuti mbotukonzya kubapandulwida banamukwasyi alimwi abalongwe kuti tatusekeleli mazuba aakulyookezya?
-
Ino muzyi buti kuti Jehova uyanda kuti katukkomana alimwi akulikondelezya?
AMUZYIBE ZINJI
Atulange-lange mazuba aakulyookezya aagaminide ngobatasekeleli Banakristo.
Amubone twaambo tone itutupa kusyoma kuti kusekelela mazuba aakuzyalwa takumukkomanisyi Leza.
“Nkaambo Nzi Bakamboni ba Jehova Ncobatasekeleli Mazuba Aakuzyalwa?” (Cibalo caaintaneti)
Amubone bana bamuyanda Jehova mbobakonzya kumukkomanisya ciindi camapobwe.
Mamiliyoni aa Banakristo bakasala kutatola lubazu mukusekelela Kkilisimasi. Ino balimvwa buti kujatikizya kusala kwabo?
“Bakajana Cintu Ciinda Kubota” (Ngazi Yamulindizi, December 1, 2012)
a Amubone Bupanduluzi Buyungizyidwe 5 kutegwa mwiiye ncomukonzya kucita mubukkale bumwi ciindi bantu bamwi nobasekelela buzuba bwakulyookezya.
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
