Kolanga kasankwa kali mucifwanikiso. Kalibonya kulendelelwa alimwi akuyoowa, sena tabusyi? Sena kuli nowakalimvwide boobo?— Muntu uuli woonse ulalimvwa oobo zimwi ziindi. Bbaibbele lilaamba kujatikizya balongwe ba Jehova ibakali kulendelelwa alimwi akuyoowa. Umwi wambabo wakali Elija. Atwiiye kujatikizya nguwe.

Elija wakali kukkala ku Israyeli kaindi, katanazyalwa Jesu. Mwami wa Israyeli, Ahabu, tanaakali kukomba Leza wakasimpe, Jehova. Ahabu amukaintu wakwe Jezebeli, bakali kukomba leza wakubeja, Baala. Aboobo, bantu banji mu Israyeli bakatalika kukomba Baala. Mwami mukaintu Jezebeli wakali silunya alimwi wakali kuyanda kubajaya bantu boonse bakali kukomba Jehova, kubikkilizya a Elija! Sena ulizyi ncaakacita Elija?—

Elija wakaccija! Wakaunka kunkanda yakali kulamfwu akuyuba mumpangala. Ino  uyeeya kuti ncinzi ncaakacitila boobo?— Wakaliyoowede. Pesi Elija tanaakeelede kuyoowa. Ino nkaambo nzi? Nkaambo wakalizyi kuti Jehova wakali kukonzya kumugwasya. Jehova wakalizitondezyede kale nguzu zyakwe kuli Elija. Cimwi ciindi, Jehova wakaingula mupailo wa Elija kwiinda mukutuma mulilo kuzwa kujulu. Aboobo Jehova wakali kukonzya kumugwasya Elija!

Naakali mumpangala Elija, Jehova wakaambaula anguwe akumubuzya kuti: ‘Ncinzi ncocita okuno?’ Elija wakaingula kuti: ‘Ndasyaala buyo endikke nendikukomba. Ndili buyo endikke, alimwi ndiliyoowede kuti balandijaya.’ Elija wakali kuyeeya kuti bakombi bamwi boonse ba Jehova bakajaigwa. Pele Jehova wakaambila Elija kuti: ‘Peepe, aayo taali masimpe. Kuli abamwi bali 7,000 ibandikomba. Koba sicamba. Kuli milimo aimwi minji njondiyanda kuti ucite!’ Sena uyeeya kuti Elija wakakkomana kumvwa makani aaya?—

Ncinzi ncokonzya kwiiya kuli cakacitikila Elija?— Toyelede kulimvwa kulendelelwa alimwi akuyoowa. Ulijisi balongwe bamuyanda Jehova alimwi ibakuyanda anduwe. Alimwi, Jehova ulijisi nguzu zinji, aboobo lyoonse unookugwasya! Sena ulikkomene kuzyiba kuti toli olikke?—