KUGWASYA BANTU KUBA BASIKWIIYA
CIIYO 10
Kulyaaba
Njiisyo: “Twakali kuyandisya kumwaabila ikutali buyo makani mabotu aa Leza, pele abuumi bwesu, nkaambo mwakaba bayandwa besu.”—1Tes. 2:8.
Ncaakacita Jesu
1. Amweebelele VIDIYO, naa kubala Johane 3:1, 2. Mpoonya mubandike mibuzyo iitobela:
-
Ino muyeeya kuti nkaambo nzi Nikodemo ncaakasala kuswaya Jesu masiku?—Amubone Johane 12:42, 43.
-
Kwiinda mukubonana a Nikodemo masiku, mbuti Jesu mbwaakatondezya kuti wakalilyaabide ncobeni kugwasya bantu kuba basikwiiya?
Ncinzi Ncotwiiya Kuli Jesu?
2. Tulatondezya kuti tulabayanda bantu kwiinda mukulyaaba kubagwasya kutegwa babe basikwiiya.
Amumwiiye Jesu
3. Kamuyiila abusena alimwi aciindi ncakonzya kuyanda sikwiiya Bbaibbele wanu. Ulakonzya kusala buzuba bugaminide mumvwiki naa ciindi cigaminide cabuzuba bumwi. Sena inga kalikwaide kapati kuyiila kuncito, kuŋanda naa kubusena bwabuleya? Kuti kacikonzyeka, amuucince mulongo wanu kutegwa kamwiiya aciindi alimwi aabusena bukonzya kumukkomanisya sikwiiya.
4. Kamwiiya lyoonse. Ikuti naa tamunooliko, mutabunyonganyi bubambe bwanu bwakwiiya. Muciindi caboobo, amubone twaambo ootu:
-
Sena tamukonzyi kwiiya aciindi cimbi mumvwiki njomunya eeyo?
-
Sena tamukonzyi kwiiya kubelesya fooni alimwi akukwabana avidiyo naa videoconference?
-
Sena tamukonzyi kulomba sikumwaya umwi kutegwa akaiye anguwe?
5. Amupaile kutegwa kamuzilanga munzila yeelede zintu. Amumulombe Jehova kuti amugwasye kuzumanana kwiiya, nokuba kuti sikwiiya wanu cilamuyumina kujana ciindi cakwiiya lyoonse naa kuzibelesya nzyaiya. (Flp. 2:13) Kweelede kuti sikwiiya wanu ulijisi bube bunji bubotu; amupaile kuti kamubikkila maano kubube oobo mbwajisi.
