Ibbaibbele Lilakonzya Kubacinca Bantu

NCINZI mwaalumi waku Scotland ncakajana kuti ciletela mpindu kwiinda kuzwidilila mumulimo? Ncinzi cakagwasya mwaalumi waku Brazil kuleka buumi bwakwe bwakutalilemeka alimwi akufweba cocaine? Mbuti mwaalumi waku Slovenia mbwaakacikonzya kuleka cilengwa cakwe cakunywa bukoko cakwiindizya? Amubale nzyobaamba bantu aaba.

“Buumi bwangu bwakali kulibonya kubota.”​—BA JOHN RICKETTS

MWAKA WAKUZYALWA: 1958

CISI NKOBAZWA: SCOTLAND

MBOBAKABEDE KAINDI: SIMAKWEBO UUZWIDILIDE

MBONDAKABEDE KAINDI: Ndakali kkomene kukomezegwa kabotu. Bataata bakali bapati-pati babasikalumba bana Britain, aboobo mukwasyi wesu wakali kulonga-longa ziindi zinji. Kunze lyaku Scotland, twakakkala ku England, Germany, Kenya, Malaysia, Ireland, alimwi aku Cyprus. Kuzwa nondakali amyaka iili lusele, ndakali kwiiya kuzikolo zyabboding mu Scotland. Mukuya kwaciindi ndakamanizya lwiiyo lwangu ku Cambridge University.

Kandili amyaka 20, ndakatalika kkoosi yamulimo wamakwebo aamungwimba yamyaka iili lusele. Kusaanguna, ndakacita mulimo ooyu ku South America, kunane ndakazyikuucitila mu Africa, mpoonya kumamanino ndakaucitala ku Western Australia. Nindakalongela Australia, ndakapanga kkampani yamakwebo yalo mukuyakwaaciindi njondazoosambala.

Mali ngokajana nondakasambala kkampani eeyo kucita litayakandili amyaka. Ndakabesya ciindi cangu kupanga nyendo. Ndakazinguluka cisi ca Australia ahonda yangu ziindi zyoboilo, alimwi ndakaba anyendo yakuzinguluka nyika yoonse. Buumi bwangu bwakali kulibonya kubota.

BBAIBBELE MBOLYAKANDICINCA: Nocciba ciindi kanditanacita liyaya, ndakali kuyanda kujana nzila yakumulumba Leza akaambo kabuumi bubotu mbondakali kupona. Aboobo ndakatalika kuunka kucikombelo ca Anglican mwalo mondakakomena. Pele cikombelo eeci kunyina nocakali kuyiisya malailile manji kuzwa mu Bbaibbele. Kuzwa waawo, ndakatalika kwiiya ama Mormons naa ba Saante, pele luyandisisyo lwakamna akaambo kakuti tiibakali kusyoma Bbaibbele.

Bumwi buzuba, Bakamboni ba Jehova bakakonkomona acitendele. Mpoonya-mpoonya ndakali kukonzya kubona kuti nzyobayiisya zyoonse zizwa mu Bbaibbele. Lugwalo lumwi ndobakandibalila lwakali lwa 1 Timoteyo 2:​3, 4. Tupango uutu twaamba kuti nkuyanda kwa Leza kuti “bantu boonse bafwutulwe akuba aluzyibo lwini-lwini lwakasimpe.” Ndakagambwa kuti Bakamboni tiibakankaizya luzibo buyo pele luzibo lwini-lwini luyeeme a Bbaibbele.

Kwiiya Bbaibbele a Bakamboni ba Jehova cakandigwasya kuba aluzibo oolo lwini-lwini. Mucikozyanyo, ndakaiya kuti Leza a Jesu tabali cibeela Cabutatu bukatazya kumvwisya; muciindi caboobo, mbatu bobilo baindene. (Johane 14:28; 1 Bakorinto 11:3) Ndakakkomana kwiiya kasimpe aaka katakatazyi. Alimwi ndakanyema kapati kuti ndakasowa ciindi cangu kusola kumvwisya njiisyo ya Butatu yalo iitamvwiki alimwi yakubeja!

Tiilyakalampa ndakatalika kujanika kumiswaangano ya Bakamboni ba Jehova. Ndakagambwa amuuya wabulongwe alimwi a zyeelelo zisumpukide zyabo boonse​—bakali bantu babotu, ibayoowa Leza. Luyando lwabo lwini-lwini lwakandipa kusinizya kuti ndacijana cikombelo cakasimpe.​—Johane 13:35.

MBONDAGWASYIGWA: Nondakamana, ndakajana mukaintu mubotu wazina lya Diane. Wakakomezegwa kali umwi wa Bakamboni ba Jehova, alimwi wakajisi bube bubotu bunji bwalo bwakapa kuti ndimuyande. Mukuyakwaciindi,twakakwatana. Cilongwe alimwi alugwasyo lwa ba Diane zyali zilongezyo kuzwa kuli Jehova.

Mebo aba Diane twakaba aluyandisisyo lwakulongela kubusena kubulide bakambausi bamakani mabotu aamu Bbaibbele. Mu 2010, twakalongela ku Belize, mu Central America. Ookuno tulakambauka kubantu ibamuyanda Leza alimwi aibayanda kuzyiba zinji kujatikizya nguwe.

Lino cindiletela luumuno lwamumizeezo kuzyiba kasimpe kujatikizya Leza alimwi a Jwi lyakwe, Bbaibbele. Kandili mukambausi waciindi coonse, ndajisi lukkomano lwakuyiisya bantu banji Bbaibbele. Kunyina kwiinda kubota akubona kasimpe kamu Bbaibbele kakacinca buumi bwamuntu​—mbubonya mbokakacinca bwangu. Lino, ndajana nzila mbotu yakumulumba Leza kubuumi mbondipona.

“Bakanditonzya luzyalo kapati.”​—BA BA MAURÍCIO ARAÚJO

MWAKA WAKUZYALWA: 1967

CISI NKOBAZWA: BRAZIL

MBOBAKABEDE KAINDI: BUUMI BWAKUTALILEMEKA

MBONDAKABEDE KAINDI: Ndakakomenena mu Avaré, kadolopo kasyoonto ku São Paulo. Bantu bakkala mumo babeleka milimo iiyandika buyo luzibo lusyoonto.

Bataata bakafwa baama nobakali ada lyangu. Kandicili kasankwa kasyoonto, ndakali kusama zisani zyabaama ciindi notakali ananda. Ndakaba amaanu aacisimbi, alimwi bantu bakali kundibona kuti ndiyanda musankwama wakoonana limwi. Mukuyakwaciindi, ndakatalika koonana abasankwa bambi alimwi abamaalumi.

Kuzikusika ciindi nondakainda ciimo cakukubuka, kanji-kanji ndakali kuyandaula bantu bakoonana limwi (basankwa abasimbi) kufwumbwa nkondakali kukonzya kubajana​—mumabbaa, kumasena nkobanywida makoko masiku, alimwi buya akuzikombelo. Ciindi capobwe litegwa carnival, nadakali kusama mbuli mukaintu akuzyana mumasena aamumadolo muzyaninwa. Ndakali kuzyibidwe kapati.

Akati kabalongwe bangu kwakali baluumi boonana baluuminyina, bamavwuule, alimwi baabo babelesya kapati misamu iikola. Bamwi bambabo bandiyunga kusola kubelesya cocaine, kumane mukuyakwaciindi ndakaba acizibilizi. Zimwi ziindi twakali kufweba busiku boonse. Aziindi zimbi, ndakali kulizandula akufweba cocaine buzuba boonse. Ndakakoka kapati cakuti mane bantu bakali kwaamba kuti ndili a AIDS.

BBAIBBELE MBOLYAKANDICINCA: Muciindi eeci, ndakazyibana a Bakamboni ba Jehova. Bakanditondezya luzyalo kapati. Lugwalo lumwi ndobakandibalila lwakali lwa Baroma 10:​13, lwalo lwaamba kuti: “Muntu woonse wiita zina lya Jehova uyoofwutulwa.” Majwi aaya akandijatikizya kapati kubona mbociyandika kubelesya zina lya Jehova. Ziindi zinji, ndamana kufweba cocaine busiku boonse, ndakali kujula windo ndalanga kujulu, akupaila kuli Jehova kandilila, kumukombelezya kuti andigwasye.

Kandilibilika kujatikizya baama katyompedwe, balo bakapengede kapati kundilangilila kandinyonyoona buumi amisamu iikola, ndakasala kuti ndileke kwiibesya. Kuzwa waawo, ndakazumina kwiiya Bbaibbele a Bakamboni. Bakandisyomezya kuti kwiiya kuyoomya makanze aangu aakuleka kubeleysa misamu iikola​—alimwi mbocaka oobo!

Mbondakali kuyaabuzumanana kwiiya Bbaibbele, ndakabona kuti ndakeelede kunca bukkale bwangu. Cakandiyumina kapati kuleka micito yakoonana abantu mbotukozyenye zizo, nkaambo eeci cakali cibeela cabuumi bwangu kufwumbwa buyo ndayanda. Pele cintu cakandigwasya, nkutantamuka bantu babi ibakali kundiyunga. Ndakaleka kuyanzana abalongwe bakaindi alimwi akucileka kuunka kumabba akumasena nkobanywida makoko masiku.

Nokuba kuti tiicakali cuuba-uba kupanga kucinca ooku, ndakaumbulizigwa kuzyiba kuti Jehova wakali kundibikkila maanu alimwi akuti wakali kukumvwisya kupengana kwangu. (1 Johane 3:​19, 20) Kuzikusika mu 2002, ndakali kulekede micito yakoonana abantu mbotukozye zizo, alimwi mumwaka ooyu ndakabbapatizigwa kandili umwi wa Bakamboni ba Jehova.

MBONDAGWASYIGWA: Baama bakakkomana kapati akucinca nkondakacita cakuti abalo bakatalika kwiiya Bbaibbele. Mukubula coolwe, kuzwa leelyo baciswa bulwazi bwakulebuka. Nokuba boobo, bazumanana kuba aluyando kuli Jehova alimwi akukasimpe kamu Bbaibbele.

Kwamyaka iili lusele, ndalikubeleka mulimo waciindi coonse, kubelesya ciindi cangu cinji kuyiisya bamwi Bbaibbele. Ndeelede kuzumina kuti ndajisi nkondo yalwana kulombozya kubyaabi ziindi zimwi. Pele ndilijisi busicamba mukuzyiba kuti kwiinda mukutacita kweelena akulombozya ooko, ndilakonzya kumukkomanisya Jehova.

Kuba acilongwe a Jehova alimwi akupona munzila iimukkomanisya kwayungizya bulemu bwangu. Mazubaano, ndili mwaaluumi uukkomene.

“Ndakali cigumbuli citazuli.”​—BA LUKA ŠUC

MWAKA WAKUZYALWA: 1975

CISI NKOBAZWA: SLOVENIA

MBOBAKABEDE KAINDI: KUNYWA BUKOKO CAKWIINDIZYA/CAKUZWA MUNZILA

MBONDAKABEDE KAINDI: Ndakazyalilwa mu Ljubljana, dolopo pati lya Slovenia. Ndakajisi buumi bwakubwana bubotu kusikila nindikali amyaka yone. Mpoonya bataata bakalijaya. Kuzwa ntenda eeyi noyakacitika, baamba bakali kubeleka canguzu kutegwa bajane cakulya cabana basankwa bobilo, mebo amupati wangu.

Kandili amyaka 15, ndakatalika kukkala baneene bazyala baama. Ndakali kukkomana kukkala ambabo nkaambo kubusena nkobakali kukkala, nkokwakali kukkala balongwe bangu banji. Alimwi ndakajisi lwaanguluko lunji kwiinda ciindi nondakali kuli baama. Nondakakkwanya myaka 16, ndakatalika kuyanzana abantu balo bakali kuunka kuyoonywa amawikkeendi. Ndakalekela masusu kulampa, kutalika kusama munzila yabuzangi, alimwi akutalika kufweba.

Nokuba kuti ndakasola kubelesya misamu indene-indene iikola, kunyina nondakaleka kunywa bukoko, nkaambo ndakajana kuti ncocakali kukkomanisya kwiinda. Mukuyakwaciindi tiindakacili kunywa nkapu zisyoonto buyo, pele ndatalika kunywa bbodela lyoonse naa kwiinda waawo aciindi comwe. Ndakalba syasizibwene kusisa mbondakakoledwe ncobeni. Knji-kanji, kununka buyo kwabukoko kwakali kutondezya kuti ndali kunywa. Nociba ciindi eeco, kunyina wakali kuyeeya kuti andiza ndanywa malita manji aawaini naa bukoko​—alimwi zisangene abukoko bwiitwa kuti vodka!

Bunji bwaziindi, ndime ndakali kugwasilizya beenzuma kweenda bamana disikko masiku, nokuba kuti mebo andiza ndanywa bukoko bwiinda ziindi zyobilo alimbobanywa balo. Buzuba bumwi, ndakamvwa umwi wabeenzuma kaamba kuti ndili cigumbuli citazuli​—majwi aakubbokezya amuci Slovenia kumuntu uunywa kwiinda bamwi. Majwi aaya akandicisa kapati.

Ndakatalika kuyeeya ncondakali kucita kubuumi bwangu. Ndakalimvwa kubula mpindu. Cakali kulibonya kuti kunyina ncondakacita mubuumi cakajisi mpindu.

BBAIBBELE MBOLYAKANDICINCA: Aciindi eeco, ndazobona kuti umwi basicikoloma wakazoocinca; wakaba muntu mutbombe. Kandiyandide kuzyiba zinji kujatikizya kucinca kwakwe, ndakamutamba kuti tkucakulya kulesitilanti. Mumubandi ngotwakajisi, wakaamba kuti kwakali kwiiya Bbaibbele a Bakamboni Bajehova. Wakandaambila zintu zimwi zyaakali kwiiya, zyalo zyoonse izyakali zyeenzu kulindime, mbokunga tiindakali kuunka kucikombelo cilicoonse kuzwa kubwana. Ndakatalika kuunka kumiswaangano ya Bakamboni alimwi akwiiya Bbaibbele.

Kwiiya Bbaibbele kwakajalula meso kumakani manji aakasimpe aakulwaizya, alimwi aali anguzu. Mucikozyanyo, ndaikaiya kuti tupona muciindi Bbaibbele ncoliita kuti “mazuba aamamanino.” (2 Timoteyo 3:​1-5) Alimwi ndakaiya kuti lino-lino Leza uuyoogusya bantu babi anyika akupa bantu babotu coolwe cakukkomana abuumi butamani mu Paradaiso. (Intembauzyo 37:29) Ndakayandisisya kubambulula buumi bwangu kutegwa ndikabe akati kabantu aabo babotu.

Ndakatalika kubaambila beenzuma kujatikizya kasimpe kamu Bbaibbele nkondakali kwiiya. Buniji bwabo bakandisampaula kujatikizya nzyondakabaambila, pele mbobakacita mumakani aaya kwakandigwasya munzila njotakali kuyeeyela.. Mbobakacita cakandigwasya kubona kuti tiibakali balongwe beni-beni. Ndazoozyiba kuti penzi lyangu lyakunywa bukoko lyakaswaangene aabantu mbondakali kuyanzana limwi. Nsondo yoonse bakali kulangila wikkeedi kutegwa bakaakukolwe alimwi.

Ndakaleka kuyanzana ambabo akutalika kuyanzana Bakamboni ba Jehova ibalongwe bayaka. Kuyanzana ambabo kwakandikulwaizya kapati​—aaba bakali bantu bakali kumuyanada ncobeni Leza akusolekesya kupona kweelana azyeelelo zyakwe. Aasyoonto-syoonto, ndakacikonzya kuleka cilengwa cangu cakunywa bukoko cakwiindizya.

MBONDAGWASYIGWA: Ndilamulumba kapati Jehova akaambo kakuti tandiciyandiki bukoko buya kuti ndikkomane. Tandizyi cakali kunoondicitikila ikuti nondakazumanana abukkale bwangu bwakaindi. Pele lino ndilisinizide kuti buumi bwangu mbubotu.

Kwamyaka iili ciloba yainda, ndajisi coolwe cakubelekela ku maofesi aa mutabi aa Bakamboni ba Jehova ku Slovenia. Ikuzyiba Jehova alimwi akumubelekela kwapa kuti buumi bwangu bube ampindu.