Cibalo 13

Ncobuletela Kukondwa Ibukkale Bwabuna Leza

1. Nkaambo nzi ncotunga twaamba kuti nzila ya Jehova ileta kukondwa?

JEHOVA ngu “Leza uukondwa,” alimwi uyanda kuti nywebo kabumubotela buumi. (1 Timoteo 1:11, NW) Ikwiinda mukweenda munzila yakwe, mulakonzya kugwasigwa akujana kuliiba kunji kutamani, mbuli kukunka kwamulonga. Ikweenda munzila ya Leza alimwi kupa muntu kucita micito yabululami, “mbuli mayuwe aalwizi.” Eeci ciletela kukondwa kwini-kwini.—Isaya 48:17, 18.

2. Mbuti Banakristo mbobakonzya kukondwa nokuba kuti zimwi ziindi tabeendelezegwi kabotu?

² Bamwi inga bakazya ategwa, ‘Bantu zimwi ziindi balapenga akaambo kakucita ciluzi.’ Nincobeni, alimwi ncencico ncicona cakacitika kubaapostolo ba Jesu. Pesi nokuba kuti bakapenzegwa, bakakondwa akuzumanana “kukambauka muntempele amumaanda kuti Jesu ngo-Kristo.” (Incito 5:40-42) Tulakonzya kwiiya ziiyo zipati muliceeci. Cimwi ncakuti kupona bukkale bwabuna Leza tacili cisinizyo cakuti lyoonse tuyakweendelezegwa kabotu. “Ncobeni, boonse aabo bayanda kupona mubuumi bwakuswiilila Leza muli Kilisito Jesu bayoopenzegwa,” mbwaakalemba mwaapostolo Paulo. (2 Timoti 3:12, Ci) Nkaambo Saatani anyika yakwe balaandeene abaabo bapona bukkale bwabuna Leza. (Johane 15:18, 19; 1 Petro 5:8) Pesi kukondwa kwini-kwini takuyeeme azintu zili anze lyamuntu. Kuzwa mukusyoma kuti tucita ciluleme eelyo Leza ulatuzumina cakukkomana.—Matayo 5:10-12; Jakobo 1:2, 3; 1 Petro 4:13, 14.

3. Mbuti kukomba Jehova mbokweelede kujatikizya bukkale bwamuntu?

³ Kuli bantu balo bayeeya kuti balakonzya kujana lubomba  lwa Leza kwiinda mumicito yabukombi ciindaa ciindi, kabakonzya kumuluba muziindi zimwi. Kukomba cakasimpe kuli Jehova Leza takuli boobo pe. Kujatikizya bukkale bwamuntu ciindi coonse nalanga buzubaa buzuba, mwakaa mwaka. Ncencico eeci ncobwiitilwa akuti “nzila.” (Incito 19:9; Isaya 30:21) Ninzila yakupona yabuna Leza yalo iituyanzya kuti katwaambaula akucita micito yeendelana a Jwi lya Leza.

4. Nkaambo nzi ncocigwasya kucinca kutegwa muntu apone munzila ya Leza?

⁴ Ciindi basikwiiya Bbaibbele ibapya nobabona kuti bayandika kucinca munzila zimwi kutegwa bamubotezye Jehova, balakonzya kulibuzya kuti, ‘Sena cigwasya ncobeni kupona bukkale bwabuna Leza?’ Mulakonzya kusyoma oobo. Nkaambo nzi? Nkaambo “Leza nduyando,” eelyo inzila zyakwe zibambilidwe kutugwasya. (1 Joni 4:8, Ci) Alimwi Leza musongo ulizi ciinda kutugwasya. Mbokunga Jehova Leza ngusinguzu zyoonse, ulakonzya kutuyumya kuti tuzuzikizye kulombozya kwesu kwakumubotezya kwiinda mukuleka ciyanza cibi. (Ba-Filipi 4:13) Atulange-lange njiisyo zimwi zijatikizigwa mukupona kwabuna Leza akubona mbuli mbokuletela kukondwa ikuzibelesya.

IKUSYOMEKA KULETELA KUKONDWA

5. Ino Bbaibbele lyaamba nzi kujatikizya kubeja akubba?

⁵ Jehova ngu “Leza walusyomo.” (Intembauzyo 31:5) Cakutadooneka muyanda kutobela cikozyanyo cakwe akuba bantu bazizilwe kusyomeka. Kusyomeka kupa kulimvwa buntu akulimvwa kabotu. Pesi akaambo kakuti kutasyomeka nkunji boobu munyika eeyi yazibi, Banakristo bayandika ciyeezyo eeci: “Mwaambe lusinizyo umwi aumwi kumweenzinyina . . . Mubbi atabbi limbi, pele asungwaale . . . kuti ajane cakugwasya mweenzinyina uubulide.” (Ba-Efeso 4:25, 28) Babelesi Banakristo balasyomeka mukumana mulimo weelede buzuba abuzuba. Ccita kuti sikubelekelwa wabazumizya, tababwezi zintu zyakwe pe. Kube kumilimo, kucikolo, naa kumunzi, sikukomba Jehova weelede ‘kubula akampenda.’ (Ba-Hebrayo 13:18) Kufwumbwa muntu uulipenda kubeja akubba takonzi kubotezya Leza pe.—Deuteronomo 5:19; Ciyubunuzyo 21:8.

6. Mbuti kusyomeka kwamuntu muna Leza mbokunga kwaleta bulemu kuli Jehova?

 ⁶ Kusyomeka kuleta zilongezyo zinji. Selina ngumuka mufwu muna Afulika imucete uuyandisya Jehova Leza anjiisyo zyakwe ziluleme. Bumwi buzuba wakajana bbeeke lyakajisi kabbuku kakubbanga amweelwe mupati wamali. Naakabelesya bbuku lya fooni wakakonzya kumujana mukamwini—sicintoolo wakabbididwe. Ooyo mwaalumi mwakamuyuma mukanwa Selina naakamuswaya, nokuba kuti wakalicisidwe kapati, akumupilusizya zyoonse zyakayumwide bbeeke eelyo. Wakati: “Kusyomeka kuli boobu kweelede kulumbulwa,” amane wakamupa mweelwe umwi wamali. Icipati ncakuti ooyu mwaalumi wakalumbaizya cikombelo ca Selina. Ee, micito iitondezya kusyomeka ilakusumpula kuyiisya kwa Bbaibbele, ilamupa bulemu Jehova Leza akuletela basikumukomba ikukondwa.—Tito 2:10; 1 Petro 2:12.

BWAABI BULETA KUKONDWA

7. Ninzi cilubide mukubbeja?

⁷ Kuli kukondwa mubwaabi, kakuli bahaacivwulemwangu “tabakooyoovuba Bwami bwa-Leza.” (1 Ba-Korinto 6:10) Inzila imwi yabuhaacivwulemwangu iivwulide njakubbeja, kwalo kuli nkusola kujana mali kwiinda mukusweekelwa kwabambi. Jehova tabazumini pe aabo “[ba]yanda kujana lubono cabucenjezu.” (1 Timoti 3:8, Ci) Nokuba kooko mulawo nkuuzumizya kubbeja imuntu nkwasobanina mukubbeja, ulakonzya kuzibila alimwi unoosumpula mucito iwanyonganya maumi manji. Kubbeja kanjikanji kuleta buyumuyumu kumukwasyi wasikubbeja, walo unga wacaala amali masyoonto cakuti takonzi kuula ziyandika mbuli zyakulya azyakusama.—1 Timoti 6:10, Ci.

8. Mbuti Jesu mbwaakapa cikozyanyo cabwaabi, alimwi mbuti mbotunga swebo twaba baabi?

⁸ Akaambo kabwaabi bwabo bwaluyando, Banakristo balajana kukondwa mukugwasya bambi, ikapati bakombinyina bacete. (Jakobo 2:15, 16) Jesu katanaboola anyika, wakabubona bwaabi bwa Leza kubantu. (Incito 14:16, 17) Jesu lwakwe wakapa ciindi, busongo bwakwe bwakuzyalwaabo, mane nobuba buumi bwakwe kuti agwasye bantu. Aboobo wakali  kweelela naakaamba kuti: “Kupa kuli coolwe kwiinda kupegwa.” (Incito 20:35) Alimwi Jesu wakamulumbaizya mukamufwu mucete walo mubwaabi iwakabikka tukobili tobile mubbokesi lyazipego zyatempele, nkaambo kakuti ntwaakapa bwakali “mbubuumi bwakwe boonse.” (Marko 12:41-44) Bana Israyeli bansiku a Banakristo bamumwaanda wamyaka wakusaanguna balapa zikozyanyo zyabwaabi mukupa lugwasilizyo kumbungano akumulimo wa Bwami. (1 Makani 29:9; 2 Ba-Korinto 9:11-14) Kunze lyakupa kwazintu kumilimo eeyi, Banakristo basunu balamutembaula Leza akubelesya maumi abo mumulimo wakwe cakukondwa. (Ba-Roma 12:1; Ba-Hebrayo 13:15) Jehova ulabalongezya akaambo kakubelesya ciindi cabo, nguzu, alimwi ambono zimbi, kubikkilizya amali, kugwasilizya kukomba kwini-kwini akusumpula mulimo wanyika yoonse iwakukambauka makani mabotu aa Bwami.—Tusimpi 3:9, 10.

IZINTU ZIMBI IZILETELA KUKONDWA

9. Ninzi cilubide mukwiindilizya kunywa makoko?

⁹ Kutegwa kabakondwa, Banakristo alimwi baleelede ‘kukwabilila kuyeeya kwabo.’ (Tusimpi 5:1, 2, NW) Eeci ciyandika kuti kababala akuyeeya Jwi lya Leza amalembe aajatikizya Bbaibbele aagwasya. Pele kuli zimwi zintu zyakutantamuka. Mucikozyanyo, ikwiindilizya kunywa makoko kulakonzya kupa muntu kukakilwa kweendelezya kuyeeya kwakwe. Kabali muciimo eeci, bantu banji balanjila mukutalilemeka, mukulwana, alimwi balaleta ntenda zijaya. Anu ncencico Ibbaibbele ncolyaamba kuti bakolwi tabakabukoni Bwami bwa Leza! (1 Ba-Korinto 6:10) Kabakanzide kuti “balibatamike,” Banakristo beni-beni balabutantamuka bukolwi, eelyo cilabaletela kukondwa akati kabo.—Tito 2:2-6.

10. (a) Nkaambo nzi Banakristo ncobatafwebi tombwe? (b) Nimpindu nzi iizwa mukuleka ziyanza zizibizya?

¹⁰ Imubili wabulondo ulagwasya kukondwa. Pele ibanji balazibila kubelesya misamu iicisa mubili. Mucikozyanyo, amuyeeye mbuli kufweba tombwe. Iba World Health Organization balaluula kuti kufweba “kulajaya mamiliyoni otatwe aabantu mwakaa mwaka.” Kuleka ciyanza catombwe kulakonzya kuyuma akaambo kakuciswa kwakaindi-indi buyo  ikuzwa mukucileka. Pesi kujanika kuti banji aabo bacilekede kufweba balaa buponi bwiinda kubota alimwi balaa mali manjaanji aazintu ziyandika muŋanda. Ee, ikuzunda ciyanza catombwe antela kuzibila misamu imbi iicisa mubili kuyoogwasilizya mukubaa mubili wabulondo, manjezeezya aasalala, akukondwa kwini.—2 Ba-Korinto 7:1.

KUKONDWA MULUKWATANO

11. Ninzi ciyandika kutegwa bantu babe alukwatano lwamumulawo ilulemekwa?

¹¹ Aabo ibakkede antoomwe kabali mulumi amukaintu, beelede kubona kuti lukwatano lwabo lulilembesyedwe kabotu kubuleli bwacisi. (Marko 12:17) Alimwi lukwatano lwabo beelede kulubona kuba mukuli mupati. Ncobeni, kwaandaana kulakonzya kuyandika iciindi nokuli kutagwasilizya acaali, kupenzya kapati, naa kunyonganya kwini-kwini kwazyakumuuya. (1 Timoteo 5:8; Ba-Galatiya 5:19-21) Pesi majwi aamwaapostolo Paulo ku 1 Ba-Korinto 7:10-17 akulwaizya banabukwetene kukkalilila antoomwe. Aino kutegwa kube kukondwa kwini-kwini, baleelede kusyomeka umwi aumwi kumweenzinyina. Paulo wakalemba ategwa: “Kukwatana kabakulemeka boonse, abulo bwakukwatanina kabusalala, nkaambo Leza uyoobabeteka baamu abasimalale.” (Ba-Hebrayo 13:4) Ijwi lyakuti “bulo bwakukwatanina” lyaamba koonana kwamwaalumi amukaintu ibakwetene mumulawo. Kwiina kumbi koonana, mbuli mukukwata maali, ikukonzya kwaambwa kuti “kabakulemeka boonse.” Kunze lyaboobo, Ibbaibbele lilakasya koonana kwabatana kwatana abunasodoma.—Ba-Roma 1:26, 27; 1 Ba-Korinto 6:18.

12. Micelo nzi mibi imwi yabwaamu?

¹² Busibwaamu bulakonzya kukondelezya muntu munzila yakumubili kwakaindi kasyoonto buyo, pesi tabuleti kukondwa kwini pe. Bulamubijila Leza alimwi bulakonzya kusiya cibata kumanjezeezya aamuntu. (1 Ba-Tesalonika 4:3-5) Buusu ibuleta koonana kuteelede bulakonzya kuzwa muli AIDS amumalwazi ambi aayambukila mukoonana. “Kulayeeyelwa kuti bantu bainda kumamiliyoni aali 250 munyika yoonse bayambukilwa kanswende mwakaa mwaka, akuti ibasika ambweni 50 miliyoni bayambukilwa bbola-bbola,” mbulyakaamba  pepa limwi lyamakani aabusilisi. Alimwi kuli penzi lyamada aatayandiki. Iba International Planned Parenthood Federation baluula kuti munyika yoonse mbwiizulwa, balainda ku 15 miliyoni basimbi balaa myaka akati ka 15 a 19 aabo bamita mwakaa mwaka alimwi cibeela cabo catatu balagusya mada. Kuvwentauzya kumwi kwakatondezya kuti mucisi cimwi cina Afulika, manyongwe aazwa mukugusya mada ngaaleta 72 pasenti yalufwu akati kabasimbi booye. Bamwi basibwaamu balakonzya kuleya malwazi amada, pele kutali kupengana kwamoyo. Balakonzya kuleka kulimvwa buntu nokuba kulisulaika.

13. Mapenzi nzi ambi aaletwa abumambi, alimwi ninzi ciboola kulibaabo bazumanana kuba basibwaamu abasimamambe?

¹³ Nokuba kuti bumambi bulakonzya kulekelelwa, ooyo uutakwe mulandu ulizumizidwe mu Magwalo ikusala kuti balekane. (Matayo 5:32; amweezyanye a Hosea 3:1-5.) Iciindi ooku kutalilemeka nokuleta kumana kwalukwatano, kulakonzya kusiya mukaako abana kabacisidwe kapati kumoyo. Mukugwasya mukwasyi wabantu, Ijwi lya Leza lilaamba kuti lubeta lwakwe lwacisubulo luyoobasikila aabo basibwaamu abasimamambe bateempwi. Kunze lyaboobo, lilatondezya munzila iilimvwisya ikuti aabo balipenda bwaamu “tabakooyookona Bwami bwa-Leza.”—Ba-Galatiya 5:19, 21.

‘KUTABA BANYIKA’

14. (a) Mmisyobo nzi imwi yakukomba mituni yalo iitantamukwa amuntu muna Leza? (b) Nkulailila nzi kupedwe kuli Johane 17:14 akuli Isaya 2:4?

¹⁴ Aabo bayanda kubotezya Jehova akubaa zilongezyo zya Bwami balaitantamuka mituni yamisyobo yoonse. Ibbaibbele litondezya kuti ncintu cilubide ikubamba akukomba zikozyanyo, kubikkilizya azya Kristo, naba Mariya, banyina Jesu. (Kulonga 20:4, 5; 1 Johane 5:21) Aboobo Banakristo beni-beni tabakombi zifwanikiso, impanda, azikozyanyo. Alimwi balakutantamuka kukomba mituni ikwamisyobo iitalibonyi bubi, mbuli micito yakulipa kundembela akwiimba nyimbo zyakulemeka zisi. Ciindi nobasinikizigwa kucita micito iili boobu, balayeeya majwi aa Jesu ngaakati kuli Saatani: “Nguwe Jehova Leza wako ngoelede kukomba, nguwenya alike ngoelede kumanina milimo.” (Matayo 4:8-10) Jesu  wakaamba kuti basikumutobela “tabali banyika.” (Johane 17:14) Eeci caamba kutabaa lubazu mutwambo twacisi akupona muluumuno kweendelana a Isaya 2:4, yalo yaamba kuti: “Nkabela [Jehova Leza] uyoobeteka akati kamasi akukosola makani aamisyobo minji. Lino bayoofula mapanga aabo abe maamba aakulimya, amasumo aabo abe zizibyo zyamisamu. Cisi tacikooyoobweza ipanga lyakulwisya cisinyina. Tabakooyooiya inkondo limbi pe.”

15. Ino Babuloni Mupati ninzi, alimwi ninzi banji basikwiiya Bbaibbele bapya ncobacita kutegwa bazwe mulinguwe?

¹⁵ ‘Kutaba banyika’ kumwi caamba kuzanduka munzila zyoonse kuli “Babuloni Mupati,” ibwami bwanyika bwabukombi bwakubeja. Kukomba kusofweede kwakamwaisigwa kuzwa ku Babuloni yansiku mane kwaakusika nkokweendelezya bantu munyika yoonse munzila yaluciso yakumuuya. “Babuloni Mupati” ulabikkilizya zikombelo zyoonse zilaa ziyiisyo amicito iziteendelani a luzibo lwa Leza.  (Ciyubunuzyo 17:1, 5, 15) Kwiina sikukomba Jehova uusyomeka uuyootola lubazu mumicito yakuvwelanya bukombi kwiinda mukukombelaamwi azikombelo zimbi antela kwiinda mukusangana acibeela cili coonse ca Babuloni Mupati muzintu zyakumuuya. (Myeelwe 25:1-9; 2 Ba-Korinto 6:14) Nkakaambo kaako, ibanji basikwiiya Bbaibbele bapya balatuma lugwalo lwakuleka kumbunga zyabukombi mobabede. Eeci cabapa kuyanzana a Leza mwini-mwini, mbuli bwakasyomezegwa: “Amuzwe akati kabo, mupambukane, mbwaamba Jehova. Mutaampi cintu citasalali, nenzoomutambula.” (2 Korinto 6:17; Ciyubunuzyo 18:4, 5) Sena ooku kutambulwa kuli Taata wesu wakujulu takuli nkuko nkomulombozya kapati?

IKWEELEKA MAPOBWE AAMWAKAA MWAKA

16. Nkaambo nzi Banakristo beni-beni ncobatasekeleli Kkilisimasi?

¹⁶ Ibukkale bwabuna Leza bulatwaangulula kuzwa kukusekelela  mazuba aakulyookezya aanyika kwalo kulemya bantu. Mucikozyanyo, Ibbaibbele taliyubununi pe buzuba bwini Jesu mbwaakazyalwa. ‘Mebo ndali kuti Jesu wakazyalwa mu December 25!’ mbobanga bakankamuka bamwi. Eeci tacikonzeki pe nkaambo wakafwa kumwaka mu 33 C.E. kalaa myaka 33 1/2 yakuzyalwa. Kunze lyaboobo, iciindi nakaazyalwa, kuli beembezi “bakali musokwe, beembela butanga bwabo masiku.” (Luka 2:8) Mucisi ca Israyeli, kumamanino aa December nciindi citontola, camvwula lyalo mbelele nozinga zinoobambidwe muzyaanda masiku kuzikwabilila kukutontola kwamupeyo. Kujanika kuti December 25 bana Roma bakaliibikkide kuba mbobuzuba bwakazyalwa leza wabo wazuba. Kakwiindide myaanda yamyaka kuzwa naakali anyika Jesu, Banakristo baluleyo buzuba oobu bakabubikka kuba mbobuzuba bwakusekelela kuzyalwa kwa Kristo. Nkakaambo kaako, Banakristo beni-beni tabasekeleli Kkilisimasi pe naaba mazuba ambi aakulyookezya aazwa mukusyoma kwabukombi bwakubeja. Akaambo kakuti balipa kuli Jehova alikke, aciindi ncicona tabasekeleli mazuba aapa bantu basizibi antela zisi kuba tuleza.

17. Nkaambo nzi bana Leza ncobataciti mapobwe aabuzuba bwakuzyalwa, alimwi nkaambo nzi bana Banakristo ncobakondwa nokuba boobo?

¹⁷ Kusekelela mazuba aakuzyalwa kwaambwa buyo ziindi zyobile mu Bbaibbele, oonse kaali abantu batakali kubelekela Leza. (Matalikilo 40:20-22; Matayo 14:6-11) Mbokunga Magwalo taayubununi buzuba Jesu Kristo muntu ulondokede naakazyalwa, ino swebo inga katubikkila nzi boobo maanu kumazuba aakazyalwa bantu batalondokede? (Mukambausi 7:1) Aino bazyali bana Leza tabalindili buzuba bumwi bupati kutegwa batondezye luyando kubana babo. Imusimbi umwi Munakristo uulaa myaka 13 yakuzyalwa wakati: “Ndilatangala loko amukwasyi wangu. . . . Ndiliyanzene loko abazyali bangu, alimwi ciindi bana bambi nobandibuzya ncenditasekeleli mazuba aakulyookezya, ndibaambila kuti ndilasekelela mazuba oonse.” Mboobu bwakaamba mukubusi umwi Munakristo uulaa myaka 17: “Muŋanda yesu ikupana zipo nkwamwaka woonse.” Kukondwa kulaindila ciindi zipo nozipegwa kufwumbwa ciindi.

18. Nkusekelela nzi komwe kwamwakaa mwaka Jesu nkwaakalailila basikumutobela kuti kabakucita, alimwi ninzi ncokutwiibalusya?

 ¹⁸ Kulibaabo babelekela bukkale bwabuna Leza, kuli buzuba bomwe mwakaa mwaka ibweelede kusekelelwa kapati. Oobu mbuzuba Bwamulalilo wa Mwami, walo ufwini kwiitwa kuti Ciibalusyo calufwu lwa Kristo. Kujatikizya ncico Jesu wakalailila basikumutobela ategwa: “Amukacite obo kuti mukandiyeeye.” (Luka 22:19, 20; 1 Ba-Korinto 11:23-25) Ciindi Jesu naakatalisya mulalilo ooyu masiku aa Nisani 14, 33 C.E., wakabelesya cinkwa citakwe bumena awaini uusalala, ikwiiminina mubili wakwe uutakwe cibi abulowa bwakwe bulondokede. (Matayo 26:26-29) Eezi zitondezyo zilaligwa a Banakristo bananikidwe muuya usalala wa Leza. Balo balipedwe lubazu mucizuminano cipya acizuminano ca Bwami, alimwi balaa bulangizi bwakujulu. (Luka 12:32; 22:20, 28-30; Ba-Roma 8:16, 17; Ciyubunuzyo 14:1-5) Nokuba boobo, boonse aabo bajanika kumangolezya eelene a Nisani 14 akkalenda yansiku yaci Juda balagwasigwa abalo. Balayeezegwa luyando lwakatondezegwa a Jehova Leza a Jesu Kristo mucituuzyo cacinunuzyo cimanya milandu calo cipa kuti buumi butamani bukonzeke kulibaabo bapedwe lubomba lwa Leza.—Matayo 20:28; Johane 3:16.

MILIMO ALIMWI AKULIKONDELEZYA

19. Mbuyumuyumu nzi Banakristo mbubaswaana mukujana zyakuligwasilizya mubuumi?

¹⁹ Banakristo beni-beni baleelede kubeleka canguzu kujana ziyandika. Ikucikonzya eeci kupa basilutwe bamikwasyi kubotelwa. (1 Ba-Tesalonika 4:11, 12) Aino kuti mulimo wa Munakristo kaukazyanya a Bbaibbele, eeci inga camupa kutakondwa. Nokuba boobo, zimwi ziindi nciyumu ku Munakristo ikujana mulimo weendelana azyeelelo zya Bbaibbele. Mucikozyanyo, bamwi babelesi balaililwa kucenga basikuula. Nokuba boobo, ibanji basikubelekelwa balazumina kuzyuubyaubya zintu kumuntu uusyomwa kumilimo mukutayanda kusweekelwa mubelesi uusyomeka. Pesi kufwumbwa mbozinga zyaba zintu, mulakonzya kuba masimpe kuti Leza uyookulongezya kusola kwenu mukujana mulimo mwalo momunoosyaala amanjezeezya aasalala.—2 Ba-Korinto 4:2.

20. Nkaambo nzi ncotweelede kuba bantu basala zyakulikondelezya?

 ²⁰ Mbokunga Leza uyanda kuti babelesi bakwe kabakondwa, tweelede kubaa ziindi zyakusobana akulyookezya kunze lyakubeleka canguzu. (Marko 6:31; Mukambausi 3:12, 13) Inyika ya Saatani ilasumpula kulikondelezya kutali kwabuna Leza. Pesi swebo kutegwa tubotele Leza, tweelede kuba bantu basala mabbuku ngotubala, maprogramu aasikapepele anyimbo nzyotuswiilila, inkosaadi, zipekupeku, zisobano, maprogramu amu televizyini amavidiyo ngotweebela. Kuti kakuli izintu zyakulikondelezya nzyotwakasala musule zilakazyanya akucenjezya kuli mumagwalo ku Deuteronomo 18:10-12, Intembauzyo 11:5, a Ba-Efeso 5:3-5, tuyoomubotela Jehova alimwi tuyooindila kukondwa kuti twazileka zintu eezi.

KULEMEKA BUUMI ABULOWA

21. Mbuti mbotweelede kulanga kugusya da aziyanza zimwi abukkale kuti katuli tulabulemeka buumi?

²¹ Kutegwa tukondwe bwini-bwini, ibuumi bwamuntu bweelede kuba cintu cilemu kulindiswe, mbubwena bucita Jehova. Ijwi lyakwe lilatukasya kujaya. (Matayo 19:16-18) Atwaambe kuti Mulawo wa Leza kubana Israyeli wakatondezya kuti naba mwana uuli mwida mmuntu muumi uuyandika—kutali cintu cakunyonyoona pe. (Kulonga 21:22, 23) * Mukaambo nkakona aaka, tatweelede buumi kubucita mbuli kuti ncintu cuuba kwiinda mukufweba tombwe, akunyonganya mubili wesu mukubelesya misamu antela bukoko, naa kulibikka muntenda acaali. Alimwi tatweelede kutola lubazu mumicito iikonzya kucisa buumi antela kutatola ntaamu zyakukwabilila buumi, kwalo kunga kwatuletela mulandu wabulowa.—Deuteronomo 22:8.

22. (a) Ino bana Leza mbuti mbobabulanga bulowa alimwi ambobubelesegwa? (b) Mbulowa bwani bwelikke bufwutula ncobeni buumi?

²² Jehova wakaambila Nowa amukwasyi wakwe kuti bulowa bwiiminina soolu. Aboobo Leza wakabakasya kulya bulowa buliboonse. (Matalikilo 9:3, 4) Mbokunga tuli luzubo  lwabo, ooyo mulawo ulatujatikizya aswebo. Jehova wakaambila bana Israyeli kuti bulowa bwakeelede kutilwa ansi, teebwakeelede kubelesegwa abantu mumilimo yabo. (Deuteronomo 12:15, 16) Alimwi mulawo wa Leza wabulowa wakaindululwa ciindi Banakristo bamumwaanda wamyaka wakusaanguna nobakalaililwa kuti: “Mulikasye kulya . . . bulowa.” (Incito 15:28, 29) Mukulemeka kusetekana kwabuumi, bantu bana Leza tabazumini kubikkwa bulowa, nokuba kuti bambi bazumanana kuti nzila eeyi yakusilika inga yafwutula buumi. Inzila zimbi zinji zyakusilika izitambulika kuli Bakamboni ba Jehova zyajanika kuba nzila zibeleka alimwi tazileteli muntu buyumuyumu buzwa mukubikkwa bulowa. Banakristo balizi kuti bulowa bwa Jesu butikide bwalo bulikke mbobufwutula ncobeni buumi. Lusyomo mulimbubo luletela kulekelelwa abulangizi bwabuumi butamani.—Ba-Efeso 1:7.

23. Mbulumbu nzi bumwi bwabukkale bwabuna Leza?

²³ Calibonya ikuti bukkale bwabuna Leza buyanda kusola canguzu. Bulakonzya kuleta kusampaulwa kuli basimukwasyinyoko abeenzinyoko. (Matayo 10:32-39; 1 Petro 4:4) Pesi bulumbu bwakupona bukkale buli boobu bulaainda masunko aali oonse. Buletela manjezeezya aasalala alimwi bupa kuyanzana kugwasya abakombinyoko muli Jehova. (Matayo 19:27, 29) Mwamana, amuyeeye kupona kukabe kutamani munyika mpya ya Leza iiluleme. (Isaya 65:17, 18) Alimwi cilakonda akaka ikutobela kulaya kwa Bbaibbele akubotezya moyo wa Jehova! (Tusimpi 27:11) Anu ncobeni ncokuletela kukondwa ikupona bukkale bwabuna Leza!—Intembauzyo 128:1, 2.

Bupanduluzi buyungizidwe

AMULISUNKE LUZIBO LWENU

Ntwaambo nzi tumwi tupa kuti kupona bukkale bwabuna Leza kakuleta kukondwa?

Bukkale bwabuna Leza inga bwayanda kucinca nzi?

Nkaambo nzi nywebo ncomuyanda kupona bukkale bwabuna Leza?

[Mibuzyo yaciiyo]

[Cifwanikiso icili apeeji 124, 125]

Ikuti aabo bapona buumi bwabuna Leza kabajana ciindi cakulyookezya kunze lyamilimo yabo yakumuuya, cilabagwasilizya kuti kabakondwa