Mbomunga Mwaswena Kuli Leza
Cibalo 16
Mbomunga Mwaswena Kuli Leza
1. Nkukozyanya nzi kulibonya muzikombelo zinji?
SIKWEENDEENDA umwi naakali kuswaya cisi cimwi ca Kujwe wakagambwa zilengwa-lengwa zyakukomba nzyaakabona kutempele lyabana Buddha. Nokuba kuti zibumbwa teezyakali zya Mariya naba Kristo, zilengwa-lengwa zinji zyakali kukozyanya azyacikombelo cakwe nkwazwa. Mucikozyanyo wakabona kubelesegwa kwamalozaliyo akweema kwamipailo. Ibambi abalo bakozyanisya munzila iili boobu. Kube Kumbo naa Kujwe, inzila bakombi njobasola kuswena kuli Leza naa zintu nzyobabelesya mubukombi bwabo zilikozyenye loko.
2. Mbuti kupaila mbokupandulwidwe, alimwi nkaambo nzi bantu banji ncobapaila?
2 Ibanji balasola kuswena kuli Leza ikapati kwiinda mukupaila. Kupaila kupandulwidwe kuti “nkwaambaula kwamuntu acintu cisetekene antela cisalala—Leza, baleza, ijulu, naa nguzu zitali zyamunyika.” (The New Encyclopædia Britannica) Pele ciindi nobasikila Leza kwiinda mukupaila, bamwi bayeeya buyo ceeco ncobanga bajana mukucita boobo. Mucikozyanyo umwi mwaalumi wakabuzya umwi wa Bakamboni ba Jehova ategwa: “Kuti wandipailila, sena mapenzi ngejisi mumukwasyi, kumilimo, amubuponi bwangu inga alamana?” Mbuli mbokulibonya, imwaalumi ooyu mbwaakali kuyeeya oobo, pesi banji balapaila akujana kuti mapenzi abo alazumanana. Aboobo inga twabuzya kuti, ‘Nkaambo nzi we ncotweelede kuswena kuli Leza?’
NCOKWEELEDE IKUSWENA KULI LEZA
3. Nkuuli ni kupaila kwesu nkokweelede kugamikwa, alimwi nkaambo nzi?
3 Kupaila takali kalengwa katakwe ancokaamba, alimwi tiili buyo nzila yakujana cimwi cintu. Ikaambo kamwi kapati kakusikila Leza nkutegwa tuswene loko kuli nguwe. Aboobo kupaila kweelede kugamikwa kuli Jehova Leza. “Jehova uli kufwaafwi kuli boonse bamwiita,” mbwaakaamba sintembauzyo Davida. (Intembauzyo 145:18) Jehova ulatutamba kuti tuswene kuli nguwe caluumuno. (Isaya 1:18) Aabo bakuzumina kutambwa ooku balamuzuminizya sintembauzyo walo wakati: “Pele mebo, kulandibotela kuswena kuli-Leza.” Nkaambo nzi? Nkaambo aabo baswena kuli Jehova Leza bayookondwa cini-cini alimwi tabacinoolibiliki.—Intembauzyo 73:28.
4, 5. (a) Nkaambo nzi ncecili cintu cipati kupaila kuli Leza? (b) Nkuyanzana kwamusyobo nzi nkotunga twayaka a Leza kwiinda mukupaila?
4 Ino tukombela nzi kuli Leza kuti kali ‘ulizi zintu nzitubula katutana kumubuzya’? (Matayo 6:8; Intembauzyo 139:4) Kupaila kutondezya kuti tulaa lusyomo muli Leza alimwi tumulanga kuba Sikupa “zipego zibotu zyoonse azyoolwe zyoonse zilondokede.” (Jakobo 1:17; Ba-Hebrayo 11:6) Jehova kulamubotela kupaila kwesu. (Tusimpi 15:8) Ulabotelwa kumvwa majwi eesu aamaanu aakumulumba akumutembaula, mbubwena mulombwana uulaa mwana mbwakkomana kumvwa mwanaakwe musyoonto iwaamba majwi aasinizizye aakulumba. (Intembauzyo 119:108) Kuti kakuli kuyanzana akati kawisi amwana, inga kwaba kubandika kubotu. Imwana uuyandwa ulayanda kwaambaula abawisi. Ncimwi buyo acaboola kukuswena kwesu kuli Leza. Kuti katulumba ncobeni eeco ncotwiiya kujatikizya Jehova aluyando ndwaatondezya kulindiswe, tulayandisya kumwaambila mukupaila.—1 Johane 4:16-18.
5 Iciindi notusikila Leza Sijulu Lyamajulu, tweelede kutondezya bulemu, nokuba kuti takuyandiki kuti mane tulibilike kuti naa tulabelesya majwi nzi eni-eni. (Ba-Hebrayo 4:16) Lyoonse tulakonzya kumusikila Jehova. Alimwi cakomena coolwe cakuti tulakonzya ‘kutula myoyo yesu’ kuli Leza mukupaila! (Intembauzyo 62:8) Ikulumba Jehova kutola mukuswena kabotu kulinguwe, mbuli kokuya Abrahamu mwaalumi musyomesi nkwaakajisi kali mulongwaakwe Leza. (Jakobo 2:23) Pesi notupaila ku Mwami Mupati Kwiinda wazyoonse, tweelede kutobela ziyandika mukumusikila.
IZIYANDIKA MUKUSWENA KULI LEZA
6, 7. Nokuba kuti Leza tasesi kuti abbadelwe kutegwa amvwe kupaila kwesu, ninzi ncayanda kulindiswe ciindi notupaila?
6 Sena kuyandika mali kutegwa kusikwe kuli Leza? Bantu banji babbadela basololi bazikombelo kuti babapailile. Mane bamwi bayeeya kuti kupaila kwabo kuyoomvwigwa kweelana ambuli mweelwe wakusanga nkobacita. Pesi lyalo Jwi lya Leza talyaambi pe kuti cipo camali cilayandika kutegwa swebo tusikile Jehova mukupaila. Izipo zyakwe zyakumuuya azilongezyo zyakuswena kulinguwe mukupaila zilajanika kakutakwe amuulo.—Isaya 55:1, 2.
7 Aboobo ninzi ciyandika? Imoyo uuluzi ncintu cimwi citasyaali. (2 Makani 6:29, 30; Tusimpi 15:11) Mumyoyo yesu tuleelede kubaa lusyomo muli Jehova Leza kuti ngu “[Siku]swiilila zikombyo” alimwi “nguupa cilumbo kulibaabo bamuyandaula.” (Intembauzyo 65:2; Ba-Hebrayo 11:6) Alimwi tweelede kubaa moyo mubombe. (2 Bami 22:19; Intembauzyo 51:17) Mucikozyanyo cakwe cimwi, Jesu Kristo wakatondezya kuti ciindi nobakasikila Leza, simutelo mubombe iwakalaa moyo mutete wakajanika kululama kwiinda mu Falisi uulisumpula. (Luka 18:10-14) Notusikila Leza mukupaila, atuyeeye kuti “kufumbwa uulisumpula ula[mu]sesemya Jehova.”—Tusimpi 16:5.
8. Kuti katuyanda kuti Leza aingule kupaila kwesu, ncinzi ncotweelede kulisalazya?
8 Kuti katuyanda kuti kupaila kwesu akwiingule Leza, tweelede kulisalazya kuzwa mumicito mibi. Ciindi siciiya Jakobo naakakulwaizya bambi kuswena kuli Leza, wakayungizya akwaamba kuti: “Amusanzye maanza aanu, anywebo nobasizibi. Amulisalazye kumyoyo, nywebo nobasimyoyo-yobile.” (Jakobo 4:8) Nobaba basimucita zibi balakonzya kuswena caluumuno kuli Jehova kuti beempwa akusiya buumi bwabo bwakaindi. (Tusimpi 28:13) Tatukonzi kuswiililwa a Jehova kuti katwiide kulicengeezya kuti twazisalazya nzila zyesu. “Meso aa-Jehova ali kubaluleme, amatwi aakwe alijukide kukukomba kwabo, pele busyu bwa-Jehova mbukali kulibacita zibi,” mbolyaamba Jwi lya Leza.—1 Petro 3:12.
9. Tweelede kusikila Jehova kwiinda muli ni, alimwi nkaambo nzi?
9 Ibbaibbele lyaamba kuti: “Taakwe muntu omwe ansi ano uucita ziluleme lyoonse akutabisya.” (Mukambausi 7:20) Aboobo inga mwabuzya kuti: ‘Mbuti ino mbotukonzya kusikila Jehova Leza?’ Ibbaibbele lilaingula kuti: “Na muntu ulabisya, tulijisi sikutwaambilila kuli-Taata, ngu-Jesu Kristo mululami.” (1 Johane 2:1) Nokuba kuti tuli basizibi, tulakonzya kulimvwa kwaanguluka kumusikila Leza kwiinda muli Jesu Kristo, walo wakafwa kali cinunuzyo cesu. (Matayo 20:28) Walo njenzila yelikke motunga tulasikila Jehova Leza. (Johane 14:6) Ibulemu bwacituuzyo ca Jesu ca cinunuzyo tatweelede kubuubyaubya akucita zibi acaali. (Ba-Hebrayo 10:26) Pesi kuti katuli tulasoleka canguzu kutantamuka cibi pele tulabisya zimwi ziindi, tulakonzya kweempwa akulomba kulekelelwa kuli Leza. Naa twamusikila amyoyo mibombe, ulatumvwa.—Luka 11:4.
ZIINDI ZYAKWAAMBAULA A LEZA
10. Caboola kukupaila, mbuti mbotunga twaiya Jesu, alimwi nziindi nzi zimwi zyakupaila koli olikke?
10 Jesu Kristo wakali kukulemeka kapati kuswena kwakwe kuli Jehova. Aboobo Jesu wakajana ciindi cakwaambaula a Leza mukupaila alikke. (Marko 1:35; Luka 22:40-46) Inga catugwasya kwiiya cikozyanyo ca Jesu cakupaila kuli Leza lyoonse. (Ba-Roma 12:12) Kuleelede kutalisya buzuba amajwi aakupaila, alimwi notutana kuya kukoona, tulakonzya kulumba Jehova kumilimo yoonse yabuzuba oobo. Mukati kabuzuba, amubone kuti mwamusikila Leza “lyoonse.” (Ba-Efeso 6:18) Tulakonzya nokuba kupaila cakaumuumu mumyoyo yesu, katuzi kuti Jehova ulitumvwide. Ikwaambaula a Leza notuli tolikke kulatugwasya kuyumya kuswena kwesu kulinguwe, alimwi kupaila kuli Jehova kulatugwasya kuswena munsi aanguwe abuzuba.
11. (a) Nkaambo nzi mikwasyi ncoyeelede kupailila antoomwe? (b) Iciindi nomwaamba kuti “Ameni” kumamanino aakupaila, ninzi ncocaamba?
11 Jehova alimwi ulaswiilila kupaila ooko kucitwa kwiiminina nkamu zyabantu. (1 Bami 8:22-53) Tulakonzya kuswena kuli Leza antoomwe mumukwasyi, imutwe wamunzi kasolweda. Eeci ciyumya kukamantana kwamukwasyi, alimwi bana bacili basyoonto balamuziba Jehova kuti mmuntu wini nobamvwa bazyali babo nobapaila kuli Leza cakulibombya. Ino kuti muntu kaiminina nkamu mukupaila, ndiza kumuswaangano wa Bakamboni ba Jehova? Kuti katuli akati kabaswiilizi, atuswiilile kabotu kutegwa kumamanino aamupailo tukonzye kwaamba amoyo woonse kuti “Ameni” icaamba kuti “Akube boobo.”—1 Ba-Korinto 14:16.
MIPAILO NJAMVWA JEHOVA
12. (a) Nkaambo nzi Leza ncatainguli mipailo imwi? (b) Nkaambo nzi ncotuteelede kuyeeyesya buyo nzyotuyandika lwesu ciindi notupaila?
12 Bamwi balakonzya kuyeeya kuti Leza tainguli kupaila kwabo nokuba kuti balapaila kwiinda muli Kristo. Pesi mwaapostolo Johane wakaamba kuti: “Na twakumbila kufumbwa cintu cili buti cili mbuli makanze aakwe [Leza], ulatumvwa.” (1 Johane 5:14) Aboobo tweelede kulomba kweelana a kuyanda kwa Leza. Mbokunga ulabikkila maanu kubukkale bwesu bwakumuuya, kufwumbwa cintu citujatikizya munzila yakumuuya cileelela kupaililwa. Tweelede kulikasya kugama kuyeeya ziyanda mubili. Mucikozyanyo, nokuba kuti kuleelede kupailila bupampu akuyumya moyo ciindi nimulwazya, ikulibilika zyabuponi takweelede kwaatikizya zyakumuuya pe. (Intembauzyo 41:1-3) Naakabona kuti waciindilizya kulibilika zyabuponi bwakwe, imukaintu umwi Munakristo wakalomba Jehova kuti amugwasye kuti kuciswa kwakwe kakulanga munzila iiluzi. Aboobo kupona kwakwe kakaba kantu kasyoonto buyo, alimwi waalimvwa kuti wapegwa “inguzu zigambya.” (2 Ba-Korinto 4:7) Wakayandisya kugwasya bantu bambi munzila yakumuuya, eelyo wakaba sikwaambilizya Bwami waciindi coonse.
13. Mbuli mbokutondezedwe kuli Matayo 6:9-13, ntwaambo nzi tumwi tweelela ntotunga twabikkilizya mukupaila kwesu?
13 Ninzi ncotweelede kubikkilizya mukupaila kwesu kutegwa Jehova kumubotele? Jesu Kristo wakayiisya basiciiya bakwe mbokweelede kupailwa. Mumupailo wacikonzyanyo walo uulembedwe kuli Matayo 6:9-13, wakapa mulongo watwaambo ooto ntotunga tunooluzi kutupailila. Ntwaambo nzi tweelede kuba tupati mukupaila kwesu? Izina lya Jehova Leza a Bwami zyeelede kuba eeni-eni ambele. Kulomba zintu nzyotuyanda zyakumubili kuleelede. Alimwi ncintu cipati kulomba kulekelelwa zibi zyesu akuvwunwa kukusunkwa akumubi, Saatani Diabolosi. Jesu taakali kuyanda kuti katweema buya mupailo ooyu antela kuwiindulula, ikuwaamba kakutakwe akuyeeya ncowaamba. (Matayo 6:7) Ino inga kwaba kuyanzana kuli buti kuti mwana kabelesya majwi ngaona kufwumbwa ciindi naambaula kuli wisi?
14. Kunze lya nkumbizyo, mipailo nzi njotweelede kupa?
14 Kunze lya nkumbizyo ankombelezyo, tulakonzya kutembaula akulumba mukupaila. (Intembauzyo 34:1; 92:1; 1 Ba-Tesalonika 5:18) Alimwi tulakonzya kupailila bambi. Imipailo iijatikizya bakwesu abacizi bakumuuya bapengede naa bapenzegwa itondezya kuti tulababikkila maanu, alimwi Jehova ulakondwa kutumvwa katwaamba mbotubalanganya. (Luka 22:32; Johane 17:20; 1 Ba-Tesalonika 5:25) Mane mwaapostolo Paulo wakalemba ategwa: “Mutalibilikili cintu niciba comwe, pele muzintu zyoonse amupangike myoyo yanu kukukomba akukukombelezya cakulumba, kuti inkumbizyo zyanu zizibisigwe kuli-Leza, elyo luumuno lwa-Leza lwiinda miyeeyo yoonse yabantu luyooyaminina myoyo yanu amiyeeyo yanu muli-Kristo Jesu.”—Ba-Filipi 4:6, 7.
AMUZUMANANE MUKUPAILA
15. Ninzi ncotweelede kuyeeya kuti naa kupaila kwesu kwabaanga takwiingulwi?
15 Nokuba kuti mujana luzibo lujatikizya Leza, mulakonzya kamulimvwa kuti kupaila kwenu zimwi ziindi takwiingulwi pe. Eeci cilakonzya kuba boobu akaambo kakuti ambweni tacinasika ciindi cakuti Leza aingule mupailo umwi. (Mukambausi 3:1-9) Jehova inga walekela ciimo cimwi kuzumanana kwakaindi-indi, pesi ulaingula mipailo alimwi ulizi ciindi nocinga cainda kugwasya kucita boobo.—2 Ba-Korinto 12:7-9.
16. Nkaambo nzi ncotweelede kuzumanana kupaila, alimwi kucita boobu mbuti mbokunga kwajatikizya kuswena kwesu kuli Leza?
16 Kuzumanana kwesu mukupaila kutondezya mbotuciyandisya mumoyo eeco ncotumwaambila Leza. (Luka 18:1-8) Mucikozyanyo, inga twalomba Jehova kuti atugwasye kuzunda kukompama kumwi. Kwiinda mukuzumanana kupaila akucita zintu kweelana anzyotukumbila, tulatondezya mbotusinizizye. Tweelede kwaamba zintu zini-zini alimwi akwaamba masimpe mukukumbila kwesu. Ikapati notusunkwa ncintu cipati ikukombesya. (Matayo 6:13) Mbotuzumanana kupaila kumwi katusola kulikasya zibi nzotuyanda kucita, tuyoobona Jehova mbwatugwasya. Eeci ciyooyaka lusyomo lwesu akuyumya kuswena kwesu kulinguwe.—1 Ba-Korinto 10:13; Ba-Filipi 4:13.
17. Mbuti mbotunga twagwasigwa aciimo cakupaila mukubelekela Leza?
17 Kwiinda mukubelekela ciimo cakupaila mukumanina Jehova Leza milimo yakwe, tulaziba kuti tatumubelekeli munguzu zyesu tobeni. Ngu Jehova uupa kuti zintu zicitwe. (1 Ba-Korinto 4:7) Ikuzumina ceeci kulatugwasya kulibombya alimwi kulayungizya kuswena kwesu kulinguwe. (1 Petro 5:5, 6) Ee, tujisi twaambo twakuzumanana mukupaila. Kupaila kwesu kusinizizye aluzibo luyandika kapati lwambuli mbokuswenwa kuli Taata wesu wakujulu siluyando zilapa buumi bwesu kubota kapati.
KUBANDIKA A JEHOVA TAKULI KWALUBAZU LOMWE
18. Mbuti mbotunga twamuswiilila Leza?
18 Kuti katuyanda kuti Leza kamvwa kupaila kwesu, tuleelede kuswiilila ncaamba. (Zekariya 7:13) Tacitumi milumbe pe kwiinda mubasinsimi baamba zizwa kuli Leza alimwi tasoleli limwi kubelesya nzila zyamizimo. (Deuteronomo 18:10-12) Pesi tulakonzya kuswiilila Leza kwiinda mukwiiya Jwi lyakwe, Ibbaibbele. (Ba-Roma 15:4; 2 Timoteo 3:16, 17) Mbubwena mbotunga twayandika kusola kuyanda cakulya cakumubili icitugwasya, tulakulwaizigwa “kuyandisya mukupa wamuuya uutavwelwi acintu.” Amusoleke kuyanda zyakulya zyakumuuya kwiinda mukubala Jwi lya Leza buzuba abuzuba.—1 Petro 2:2, 3; Incito 17:11.
19. Cigwasya buti kuyeeya ncomubala mu Bbaibbele?
19 Amuciyeeyesye ncomubala mu Bbaibbele. (Intembauzyo 1:1-3; 77:11, 12) Eeci caamba kusungwaala mumakani aali mumo. Mulakonzya kucikozyanisya eeci a kutafwuna cakulya. Mulakonzya kutafwuna cakulya cakumuuya kwiinda mukukozyanyisya ncomubala azintu nzyomuzi kale. Amubone mbuli twaambo tuli mumo mbotubujatikizya buumi bwenu, antela nzyotuyubununa kujatikizya bube bwa Jehova ambwacita zintu. Aboobo kwiinda mukwiiiya, mulakonzya kujana zyakulya zyakumuuya Jehova nzyapa. Eeci ciyoomuswenya munsi a Leza alimwi ciya kumugwasya kweendelezya mapenzi aabuzubaa buzuba.
20. Ino kujanika kumiswaangano ya Bunakristo mbuti mbokutugwasya kuswena kuli Leza?
20 Alimwi mulakonzya kuswena kuli Leza kwiinda mukuswiilila Jwi lyakwe nolibandikwa kumiswaangano ya Bunakristo, mbubwena bana Israyeli mbubakaswiililisya ciindi nobakabungana kuti bamvwe kubala kwa Mulawo wa Leza kwaabuleya. Bafwundisi baciindi eeco bakapa bupanduluzi mukubala kwabo kwa Mulawo, ikugwasya baswiilizi babo kuteelela akweenzegwa kuti babelesye zeezyo nzyobamvwa. Eeco cakaleta kukondwa kapati. (Nehemiya 8:8, 12) Aboobo amucicite kuba ciyanza ikujanika ku miswaangano ya Bakamboni ba Jehova. (Ba-Hebrayo 10:24, 25) Eeci ciya kumugwasya kuteelela mpoona akubelesya luzibo lwa Leza mubuumi bwenu alimwi cilamuletela kukondwa. Ikuba umwi wabunyina bwa Bunakristo ibwanyika yoonse kulamugwasya kuswena lyoonse kuli Jehova. Alimwi mbuli mbotutibone, mulakonzya kujana kuliiba kwini akati kabantu ba Leza.
AMULISUNKE LUZIBO LWENU
Nkaambo nzi ncomweelede kuswena kuli Jehova?
Nzintu nzi zimwi ziyandika mukuswena kuli Leza?
Ninzi nzyomunga mwabikkilizya mukupaila kwenu?
Nkaambo nzi ncomweelede kuzumanana kupaila?
Mbuti mbomunga mwamuswiilila Jehova sunu?
[Mibuzyo yaciiyo]
[Cifwanikiso icili apeeji 157]
