Cibalo 1

Mbolimujatikizya Bbuku lya Daniele

1, 2. (a) Nzintu nzi zimwi izigambya izyaambwa mubbuku lyamu Bbaibbele lya Daniele? (b) Mibuzyo nzi iibuka kujatikizya bbuku lya Daniele kuciindi cesu cino?

IMWAMI singuzu wakanza kujaya baalumi bakwe basongo akaambo kakuti baalilwa kuluula akupandulula ciloto cakwe. Ibasankwa botatwe balo ibakaka kukomba cikozyanyo cilamfwu bawaalilwa mubbila lyamulimo uuyakisya pele bafwutuka. Akati-kati kapobwe, myaanda ilimbwiibede yabantu yabona janza lilemba majwi aagambya abwaanda bwaŋanda yamwami. Basikuvwiya babyaabi bapa kuti mwaalumi uucembeede awaalwe mumulindi wabasyuumbwa pele wazwa kakunyinaa kakwambu. Imusinsimi wa Leza wabona banyama bone mucilengaano elyo ncobapandulula cilaya kumbele kwazyuulu-zyuulu zyamyaka.

² Ezi nzyezimwi zyazibalo zijanwa mubbuku lyamu Bbaibbele lya Daniele. Sena zilayandika kuzilangisya? Ino ndugwasyo nzi ndolinga kalijisi sunu eli bbuku lyansiku? Ino nkaambo nzi ncotweelede kuzibikkila maanu zintu ezi zyakacitika myaka iitandila ku 2,600 yainda?

DANIELE—IBBUKU LYANSIKU ILIBELEKA KUCIINDI CASUNU

3, 4. Nkaambo nzi bantu banji ncobaluzi kulibilika kujatikizya buumi bwabantu bwakumbele?

³ Icibeela cipati cabbuku lya Daniele cibandika mutwe uujatikizya bulelo bwanyika, imutwe uuyandika kapati sunu. Ibunji bwabantu balakonzya kuzumina kuti tukkede muziindi zikatazya. Buzubaa buzuba tulamvwa makani aausisya aatuyeezya kuti bantu bayaabunjila buya mumapenzi aakatazya—obu mbuzibede zintu nokuba kuti kuli kuzwidilila kapati kumakani aasayaansi.

 ⁴ Amulange kaambo aka: Imuntu wakonzya kweenda kumwezi, pele mumasena manji takonzyi kweenda kakunyina kuyoowa mumigwagwa yamunyika yakwe. Ulakonzya kuzuzya ŋanda yakwe abugwetegwete bwazintu zyasunu zyoonse, pele takonzyi kulesya cilengwa cakwaandaana kwamikwasyi. Alimwi ulakonzya kwaanza zintu zileta makani, pele takonzyi kuyiisya bantu kuti kabapona antoomwe muluumuno. Professor mulwiiyo lwazyaciindi, Hugh Thomas wakalemba boobu: “Ikuvwula kwaluzibo alimwi alwiiyo teekwabayiisya kapati pe bantu kumakani aakulyeendelezya alimwi nzisyoonto nzyobaiya kumakani aambobakonzya kupona antoomwe abantunyina.”

5. Ibunji bwaziindi ncinzi caletwaa bulelo bwamuntu?

⁵ Mukusoleka kuti balulamike zintu mubuleya, ibantu balibunga-bunga mumfwulumende zyaandeene-andeene. Nokuba boobo kunyina noiba yomwe iitabikkilizidwe mukaambo kamasimpe nkaakaamba Mwami Solomoni kakuti: ‘Muntu weendelezya muntunyina kukumubisizya.’ (Mukambausi 4:1; 8:9) Aino ibaleli bamwi balijisi mizeezo iisumpukide. Nokuba boobo, kunyina mwami, muleli naa musololi silunya uukonzya kugwisya malwazi alufwu. Kunyina muntu uukonzya kupilusya nyika eyi kuti ibe Paradaiso mbuli mbwaakakanzide kuti ibe Leza.

6. Nkaambo nzi Jehova ncatayandikili kugwasilizigwaa bulelo bwabantu kutegwa azuzikizye kuyanda kwakwe?

⁶ Pele Imulengi ulayanda alimwi ulakonzya kuzicita zintu ezi. Tayandiki kuti azumizigwe buya amfwulumende zyabantu ikutegwa azuzikizye makanze aakwe nkaambo kulinguwe, “bamasi bali mbuli idosi lyamaanzi mukati kantesyo. Balayeeyegwa mbuli kasuko kacipimyo.” (Isaya 40:15) Ee, Jehova ngo Muleli Mupati wakujulu aansi. Akaambo kaboobo, ulijisi nguzu iziinda zyeezyo zijisi mfwulumende zyabantu. Ibwami bwa Leza mbobuyooba mubusena bwabulelo bwabantu, elyo buyooleta kulongezyegwa kutamani kubantu. Aya makani kunyina kumbi nkwaasalazidwe boobu kwaambwa kunze lyamubbuku lya Bbaibbele lya Daniele.

 DANIELE—UUYANDWA KAPATI A LEZA

7. Ino Daniele wakali ni, alimwi mbuti Jehova mbwaakali kumulanga?

⁷ Jehova Leza wakali kumuyanda kapati Daniele walo wakabeleka kwamyaka minji kali musinsimi wakwe. Imasimpe, imungelo wa Leza wakapandulula Daniele kuti “muntu uuyandwa loko.” (Daniele 9:23) Ibbala lya Cihebrayo litaanzi lyakasandululwa kuti “muntu uuyandwa loko” lilakonzya kwaamba “uuyandwa kapati,” “uulemekwa kapati,” naa “uuyandika kapati kwiinda.” Daniele wakali kuyandwa kapati mumeso aa Leza.

8. Ino Daniele wakazikujanika buti mu Babuloni?

⁸ Cakukosaula-kosaula, atubulange bukkale bulibedelede ibwamusinsimi oyu uuyandwa. Mumwaka wa 618 B.C.E., Mwami Nebukadinezara wa Babuloni wakasaala Jerusalemu. (Daniele 1:1) Kwiinde buyo ciindi cisyoonto, bamwi bakubusi bana Juda bayiide bakasinikizigwa kutolwa mubuzike mu Babuloni. Daniele wakali akati kabo. Kuciindi eci ambweni wakacili mwana.

9. Ndwiiyo nzi ndwaakapegwa Daniele abeenzinyina bana Hebrayo?

⁹ Daniele abeenzinyina ba Hananiya, Misayeli alimwi a Azariya bakali akati kabana Hebrayo bakasalwa kuti bayiisigwe “malembo amwaambo waba-Kasidi” kwamyaka yotatwe. (Daniele 1:3, 4) Bahaabupampu bamwi baamba kuti kulalangilwa kuti oku tiikwakali kwiiya buyo mwaambo. Mucikozyanyo Professor C. F. Keil waamba kuti: “Daniele abeenzinyina bakeelede kuyiisigwa busongo bwabapaizi ba Kasidi alimwi abwabaalumi bayiide bwalo bwakali kuyiisigwa muzikolo zyabana Babuloni.” Aboobo, Daniele abeenzinyina bakali kuyiisigwa kapati mulimo wamfwulumende.

10, 11. Mbuyumuyumu nzi mbobakajana ba Daniele abeenzinyina, alimwi ndugwasyo nzi ndwaakabapa Jehova?

¹⁰ Oku kwakali kucinca kwabukkale kaka kuli Daniele abeenzinyina! Mucisi ca Juda bakakkede akati kabakombi ba Jehova. Lino bakali akati kabantu bakali kukomba baleza bamuzyaano alimwi abaleza bakaintu. Nokuba boobo Daniele  mukubusi, Hananiya, Misayeli alimwi a Azariya kunyina nobakakongwa pe. Bakali kanzide—ikuzumanana mubukombi busalala nokuba kuti bakali muciimo eci cisunka lusyomo lwabo.

¹¹ Eci tiicakali cintu cuuba-uba pe. Imwami Nebukadinezara wakali lyaabide cabusungu kuli Marduki, leza mupati wa Babuloni. Zimwi ziindi, nzyaakali kuyanda kucitilwa mwami tiizyakali kukonzya kucitwaa mukombi wa Jehova pe. (Mucikozyanyo, amubone Daniele 3:1-7.) Pele Daniele abeenzinyina bakalijisi busolozi bwa Jehova lyoonse. Mumyaka yotatwe yakuyiisigwa kwabo, Leza wakabalongezyaa “luzibo amaanu aakumvwisya mabuku oonse abusongo boonse.” Kunze lyaboobo, Daniele wakapegwa nguzu zyakukonzya kuziba bupanduluzi bwazilengaano alimwi aziloto. Mpoonya mwami naakabalanga-langa baalumi aba bone, wakajana kuti “balainda ziindi zili ikumi basondi abacape boonse bamucisi cakwe coonse.”—Daniele 1:17, 20.

IKWAAMBILIZYA MILUMBE YA LEZA

12. Mulimo nzi uulibedelede ngwaakajisi Daniele?

¹² Mumyaka minji yoonse njaakakkala Daniele mu Babuloni, wakali kubeleka kali mutumwa wa Leza kubaalumi mbuli Mwami Nebukadinezara alimwi a Belisazara. Imulimo wa Daniele wakali muyumu kapati. Jehova wakazumizya Nebukadinezara kuti anyonyoone Jerusalemu, wakamubelesya mbuli cibelesyo cakwe. Muciindi awalo Babuloni wakeelede kunyonyoonwa. Inzya, ibbuku lya Daniele lilamusumpula Jehova Leza kuti ngu Syakeemba alimwi ngu Muleli “mubwami bwabasyaansi.”—Daniele 4:17.

13, 14. Ncinzi cakacitika kuli Daniele naakawa Babuloni?

¹³ Daniele wakazumanana mumulimo wakunkuta kwamyaka iitandila kumakumi aali ciloba kusikila kuciindi Babuloni naakanyonyoonwa. Wakapona mane kusika ciindi bama Juda banji nobakapiluka kumunzi wabo mu 537 B.C.E. nokuba kuti Bbaibbele kunyina mpolyaamba kuti wakabasindikila. Wakacijisi nguzu mane kusikila mumwaka watatu wabulelo  bwa Mwami Koresi walo wakatalisya Bwami bwa Persia. Kuciindi eci Daniele ulalangilwa kuti wakali amyaka iitandila ku 100 yakuzyalwa!

¹⁴ Naakamana kuwa Babuloni, Daniele wakazilemba zintu zipati-pati zyakacitika mubuumi bwakwe. Imalembe akwe lino ncibeela ca Bbaibbele Lisalala alimwi ayitwa kuti ndibbuku lya Daniele. Pele nkaambo nzi ncotweelede kubikkila maanu kubbuku eli lyansiku?

IMITWE YOBILE, MULUMBE OMWE

15. (a) Mitwe yamakani nzi yobile iili mubbuku lyamu Bbaibbele lya Daniele? (b) Ino cibeela cakuluula cabbuku lya Daniele inga catugwasya buti?

¹⁵ Ibbuku lya Daniele ililibedelede lijisi mitwe yobile yaandeene—umwi ngwakuluula, umbi ngwabusinsimi. Izibeela zyoonse zyobile zyabbuku lya Daniele zilakonzya kuyaka lusyomo lwesu. Munzila nzi? Izibeela zyakuluula buya—izili akati kazyeezyo zibotelezya kapati mu Bbaibbele—zitondezya kuti Jehova Leza uyoolongezya akubalanganya abo ibazumanana kusyomeka kulinguwe. Daniele abeenzinyina botatwe bakazumanana kusyomeka nokuba kuti kwakali masunko aakali kubikka maumi abo muntenda. Sunu boonse abo ibayanda kuzumanana kusyomeka kuli Jehova bayooyumizigwa kwiinda mukulanga-langa cikozyanyo cabo.

16. Nciiyo nzi ncotwiiya kuzibeela zyabusinsimi zyabbuku lya Daniele?

¹⁶ Izibeela zyabusinsimi zyabbuku lya Daniele zilayaka lusyomo kwiinda mukutondezya kuti Jehova ulaziziba zintu zili kumbele kakucili myaanda yamyaka noziba zyuulu zyamyaka kazitanacitika. Mucikozyanyo, Daniele ulatwaambila makani aajatikizya kubuka akuwa kwamami kuzwa kuciindi ca Babuloni wansiku kusikila “kumamanino aaciindi.” (Daniele 12:4) Daniele ugamika mizeezo yesu ku Bwami bwa Leza ibuli mumaanza aa Mwami wakwe uubikkidwe alimwi abeenzinyina “basalali,” kaamba kuti nimfwulumende iiyookkala kukabe kutamani. Eyi mfwulumende iiyoozuzikizya  makanze aa Jehova aanyika yesu alimwi eci ciyooleta zilongezyo kuli baabo boonse bayanda kubelekela Leza.—Daniele 2:44; 7:13, 14, 22.

17, 18. (a) Ino lusyomo lwesu luyooyumizigwa buti kwiinda mukulanga-langa bbuku lya Daniele cakusinizya? (b) Makani nzi aayelede kulangwa-langwa katutana talika kwiiya businsimi bwabbuku eli lya Bbaibbele?

¹⁷ Mucoolwe, Jehova talusisi luzibo lujatikizya zintu ziyoocitika kumbele. Pele walo ‘Ulayubununa makani aasisidwe.’ (Daniele 2:28) Mbotuyaabulanga-langa kuzuzikizigwa kwabusinsimi bulembedwe mubbuku lya Daniele, ilusyomo lwesu muzisyomezyo zya Leza luyooyumizigwa. Tuyoosyoma ncobeni kuti Leza uyoozuzikizya makanze akwe kuciindi cakwe cini-cini alimwi munzila ini-ini walo njasala.

¹⁸ Boonse bayiya bbuku lyamu Bbaibbele lya Daniele akumvwa caambwa, ilusyomo lwabo luyooyaambele. Nokuba boobo, katutana talika kulanga-langa bbuku eli cakusinizya, tweelede kulanga bumboni butondezya kuti naa ibbuku eli lisyomeka ncobeni. Basikukazya bamwi balikulikazya bbuku lya Daniele kabaamba kuti ibusinsimi bwalyo bwakali kulembwa kazili zyacitika kale zintu. Sena oku kwaamba kwabasikudooneka kuliluzi? Icibalo citobela cilaabandika makani aya.

NCINZI NCOMWAIYA?

• Nkaambo nzi bbuku lya Daniele ncolili bbuku lyakuciindi cesu?

• Ino Daniele abeenzinyina bakanjila-njila buti mumulimo wamfwulumende wa Babuloni?

• Mulimo nzi uulibedelede ngwaakali kucita Daniele mu Babuloni?

• Nkaambo nzi ncotweelede kubikkila maanu kubusinsimi bwa Daniele?

[[Mibuzyo yaciiyo]]

 [Cifwanikiso icili apeeji 4]

 [Cifwanikiso icili apeeji 11]