Cibalo 15

Ibami Basikuzwangana Banjila Mumwaanda Wamyaka wa 20

1. Ino sikwiiya zyakaindi umwi waamba kuti mbaani bakali basololi bamu Europe yamumwaanda wamyaka wa 19?

SIKWIIYA zyakaindi Norman Davies wakalemba kuti: “Kuli kucinca kupati kapati kujatikizya cisi ca Europe mumwaanda wamyaka wa 19 kwalo kutanacitikide.” Ulayungizya akwaamba kuti: “Icisi ca Europe cakasumpuka citanabwenwe: kumakani aaluzibo, ibuvwubi, izilengwa, azyakweendelezya masi aambi.” Davies ulaamba: “Imasi aakasololela mumwaanda oyu wakusumpuka kwa Europe akali Great Britain . . . mpoonya mumakumi aamyaka aakatobela wakali Germany.”

“MYOYO YABO IYOOBIKWA KUBUBI”

2. Nowakamana mwaanda wamyaka wa 19, nzisi nzi zyakabweza cuuno ‘camwami wakunyika’ ‘acamwami wakumusanza’?

² Imwaanda wamyaka wa 19 nowakali kuya kumamanino, Ibwami bwa German mbubwakali “mwami wakunyika” elyo Britain wakali “mwami wakumusanza.” (Daniele 11:14, 15) Imungelo wa Jehova wakaamba kuti: “Lino aba bami boonse bobile, myoyo yabo iyoobikwa kububi. Banooyooamba zyakubeja kuntafule yomwe.” Wazumanana ategwa: “Pele tabakooyoozunda pe, nkaambo mamanino aayoosika kuciindi cibikidwe.”—Daniele 11:27.

3, 4. (a) Nguni wakaba mwami wakusaanguna mu Bwami bwa Germany alimwi ncizuminano nzi cakabambwa? (b) Mulawo nzi ngwaakali kutobela Kaisara Wilhelm?

 ³ Mu January 18, 1871, Wilhelm Wakusaanguna wakaba mwami mutaanzi mu Bwami bwa German. Wakasala Otto von Bismarck kuti abe mulembi wakwe. Mbwaanga wakabikkilide maanu kukusumpula bwami bupya, Bismarck wakalikasya kuzwangana amasi ambi elyo wakatangana cilongwe acisi ca Austria-Hungary alimwi aca Italy calo cizibidwe kuti Ncilongwe Camasi Otatwe. Pele tiilyakalampa, nzyaakali kuyanda oyu mwami wakunyika mupya zyakaindana azyakali kuyanda mwami wakumusanza.

⁴ Naakafwa Wilhelm Wakusaanguna antoomwe asikumulida zina Frederick Watatu mu 1888, Wilhelm Wabili wamyaka yakuzyalwa iili 29 nguwakakkala acuuno cabwami. Wilhelm Wabili naa Kaisara Wilhelm wakasinikizya Bismarck kuti aleke milimo elyo wakatobela mulawo wakudumya bweendelezi bwacisi ca Germany munyika yoonse mbwiizulwa. Sikwiiya zyakaindi umwi waamba kuti: “Mubweendelezi bwa Wilhelm Wabili, [icisi ca Germany] cakabaa muuya wakulisumpula alimwi wabulwani.”

5. Ino bami aba bobile bakakkala buti “kuntafule yomwe,” alimwi ncinzi ncobakabandika?

⁵ Imwami Nicholas Wabili waku Russia naakatamba basimuswaangano ku Hague mu Netherlands mu August 24, 1898 kumuswaangano waluumuno, iciimo cakali akati kamasi cakali cakuzwangana. Oyu muswaangano alimwi ayooyo wakatobela mu 1907 ku Hague yakatalisya Nkuta Yakugwasya Kumana Mapenzi aali Akati Kamasi. Mbokunga masi aa German a Britain akalibikka munkuta eyi, akalitondezya mbuli kuti akali kuluyanda luumuno. Bakakkala “kuntafule yomwe” kababoneka kuti mbalongwe pele ‘myoyo yabo yakabikkidwe kububi.’ Ibucenjezu bwakwaamba ‘zyakubeja kutafwule yomwe’ tiibwakaleta luumuno lwini-lwini. Imakanze abo aakusumpula bulelo  abuvwubi bwabo kubikkilizya alumamba ‘tanaakagwasya’ pe nkaambo mamanino aabami aba bobile ‘ayoosika kuciindi cibikkidwe’ a Jehova Leza.

‘IKUSULAIKA CIZUMINANO CISALALISYA’

6, 7. (a) Muunzila nzi mwami wakunyika mwaakapilukila “kucisi cakwe”? (b) Ncinzi ncaakacita mwami wakumusanza naakabona kuti ayaabuvwula masi ngayendelezya mwami wakunyika?

⁶ Imungelo wa Leza kacizumanana ulaamba: “Lino [mwami wakunyika] uyoopiluka kucisi cakwe ambono zinji loko, pele moyo wakwe uyoosula cizuminano cisalalisya, nkabela uyoocita ncayanda, elyo uyoopiluka kucisi cakwe.”—Daniele 11:28.

⁷ Kaisara Wilhelm wakapilukila “kucisi” cakwe naa ciimo cakwe caanyika ncaakabede mwami wakunyika wansiku. Munzila nzi? Nkwiinda mukubamba bwami ibwakabambilidwe kuti bukomezye Cisi ca German akusakanya bweendelezi bwancico. Wilhelm Wabili wakayandaula masi aakweendelezya mu Afulika alimwi amumasena aambi buyo. Akaambo kakuyandisya kweelana acisi ca Britain kunguzu zyalumamba lulwanina mulwizi, awalo wakakomezya lumamba lwakwe lwamulwizi. The New Encyclopædia Britannica yaamba kuti: “Imato aankondo aabana German aakanyina mpuwo akavwula akuba ngaatobela aabana Britain mumyaka iinda-inda buyo kukkumi.” Ikutegwa cisi ca Britain cizumanane kuba cisi ciinda kunguzu, cakaindilizya kukomezya lumamba lwaco lwamumaanzi. Alimwi cisi ca Britain cakabamba cizuminano cakumvwana acisi ca France alimwi kwakacitwa mbubwenya obo akucisi ca Russia elyo eci cizuminano cakazikwiitwa kuti Triple entente (Cizuminano Calumvwano Lwamasi Otatwe). Aboobo cisi ca Europe cakaandaanizigwa munkambe zyobile—kulubazu kumwi kwakali Triple Alliance (Cilongwe Camasi Otatwe) elyo kuli lumwi kwakali Cizuminano Calumvwano Lwamasi Otatwe.

8. Ino Bwami bwa German bwakazyooba buti “ambono zinji loko”?

⁸ Ibwami bwa German bwakatobela nzila yalunya kapati elyo eci cakapa kuti cibe “ambono zinji loko” akaambo kakuti cakali cipati mu Cilongwe Camasi Otatwe. Izisi zya Austria-Hungary alimwi a Italy zyakali zya Katolika. Aboobo Cilongwe Camasi  Otatwe cakali kuyandwa apaapa kakuli mwami wakumusanza antoomwe ankamu yakwe ya Cizuminano Calumvwano Lwamasi Otatwe yatakali ya Katolika tiibakali kuyandwa pe.

9. Ino mwami wakunyika wakacisulaika buti “cizuminano cisalalisya”?

⁹ Ino mbuti kumakani aabantu ba Jehova? Bakalaambilizide kale kuti “ciindi cabamasi” ciyoozyulila mu 1914. * (Luka 21:24) Ibwami bwa Leza ibwakali mumaanzaa Simulyazina wa Mwami Davida, Jesu Kristo, bwakakkazikwa kujulu mumwaka oyo. (2 Samuele 7:12-16; Luka 22:28, 29) Mu March 1880, Ngazi Yamulindizi yakaswaanganya bulelo bwa Bwami bwa Leza ‘akuzulila kwaciindi cabamasi’ naa “ziindi zyabamasi.” (King James Version) Pele moyo wamwami wakunyika muna German ‘wakasulide ‘cizuminano ca Bwami cisalalisya.’ Muciindi cakuzuminizya bulelo bwa Bwami, Kaisara Wilhelm ‘wakacita ncayanda’ kwiinda mukusumpula makanze akwe aakweendelezya nyika. Mukucita boobo, wakasyanga mbuto zya Nkondo Yanyika Yakusaanguna.

IMWAMI WABAA “ABUUSU” MUNKONDO

10, 11. Ino Nkondo Yanyika Yakusaanguna yakatalika buti, alimwi yakacitika buti “kuciindi cibikidwe”?

¹⁰ Imungelo wakasinsima kuti: “Lino kuciindi cibikidwe [mwami wakunyika] uyooboola, uyoonjila munyika yakumusanza, pele mamanino taakooyooba mbuli kumatalikilo, pe.” (Daniele 11:29) ‘Iciindi cibikkidwe’ a Leza cakuti amanizye bweendelezi bwa Bamasi anyika cakasika mu 1914 naakakkazika Bwami bwakujulu. Mumwaka nguwenya oyo mu June 28, Simulyazina muna Austria Francis Ferdinand amukaintu wakwe bakajayigwa amujayi muna Serbia ku Sarajevo mu Bosnia. Eco ncicakatalisya Nkondo Yanyika Yakusaanguna.

¹¹ Kaisara Wilhelm wakakulwaizya bana Austria-Hungary kuti balwane bana Serbia. Mbwaanga cisi ca German cakasyomezya kuti cilagwasilizya, mu July 28, 1914 icisi ca Austria-Hungary cakatalisya nkondo abana Serbia. Pele icisi ca Russia  cakagwasilizya bana Serbia. Icisi ca Germany nocakatalisya nkondo a Russia, icisi ca France (icakali mu Cizuminano Calumvwano Lwamasi Otatwe) cakagwasilizya cisi ca Russia. Mpoonya cisi ca Germany cakatalisya nkondo acisi ca France. Ikutegwa cuube-ube kunjila mu Paris, icisi ca Germany cakasaala cisi ca Belgium calo cakapedwe mulawo kucisi ca Britain wakutatola lubazu mumazwangaa zisi. Aboobo cisi ca Britain cakatalisya nkondo acisi ca Germany. Imasi ambi akanjilila elyo icisi ca Italy cakacinca lubazu. Noyakali kulwa nkondo, icisi ca Britain cakatalika kukwabilila Egepita inyika yansiku yamwami wakumusanza ikutegwa mwami wakunyika atasinkili Kalonga ka Suez akusaala Egepita.

12. Noyakali kulwa nkondo yanyika yakusaanguna, muunzila nzi zintu mozyatakaba “mbuli kumatalikilo”?

¹² Ibbuku litegwa The World Book Encyclopedia lyaamba kuti: “Nokuba kuti ibakali kubalwana bakali basinguzu, ibana Germany bakali kuboneka kuti balazunda munkondo eyo.” Mumazwanga aamusyule aakali akati kabami bobile, Bwami bwa Roma nobwakali acuuno camwami wakunyika mbobwakali kuzunda lyoonse. Pele lino, ‘izintu tiizyakali mbuli kumatalikilo.’ Imwami wakunyika wakazundwa. Imungelo naakapandulula ncocakacitikila boobu wakati: “Nkaambo maato aazwa ku-Kitimu ayoosika kukumulwisya, aboobo uyoopiluka abuusu.” (Daniele 11:30a) Ino “maato aazwa ku-Kitimu” cakali cinzi?

13, 14. (a) Ino “maato aazwa ku-Kitimu” aakazyoolwana mwami wakunyika aiminina nzi? (b) Ino maato aambi aaku Kitimu akaboola buti mbuyakali kuyaabuzumanana nkondo yanyika yakusaanguna?

¹³ Kuciindi ca Daniele, Kitimu cakali cisi ca Kupro. Kumatalikilo aankondo yanyika yakusaanguna, cisi ca Kupro cakabwezegwaa Britain akupangwa kuba cibeela cayo. Kunze lyaboobo, The Zondervan Pictorial Encyclopedia of the Bible lyaamba kuti, izina lya Kitimu “lijatikizya lubazu lwa Kumbo loonse mboluzulwa pele ikapati lwizi lwa Kumbo.” Ibbaibbele lya New International Version lisandulula kaambo kakuti “maato aazwa  ku-Kitimu” ikuti “maato aakunkomwe zyakumbo.” Ilyankondo yanyika yakusaanguna, imato aazwa ku Kitimu akali mato aakali kuzwa ku Britain aakazwide kunkomwe yoonse yakumbo yaku Europe.

¹⁴ Inkondo noyakali kuyabuzumanana asyoonto-syoonto, Basimato aankondo bana Britain bakagwasigwaa mato manji aakazwa ku Kitimu. Ibwato bwabana German ibweendela kunsi amaanzi butegwa U-20 bwakadubula bwato bupati bwakajisi bantu buyo butegwa Lusitania mu May 7, 1915 kunkomwe yakumusanza kwa Ireland. Akati kabantu bakafwa kwakali bana Amelika ibali 128. Mpoonya ibana Germany bakakomezya nkondo yamato aakunsi aamaanzi mane kusika mulwizi lwa Atlantic. Limwi mu April 6, 1917 Imweendelezi waku U.S., Woodrow Wilson wakatalisya nkondo abana Germany. Mbwaanga lino imwami wakumusanza—Icisi Ceendelezya Nyika ca Britain a Amelika (Anglo-America)—cakagwasilizigwaa mato aankondo alimwi abasikalumamba baku United States, cakalwana nkondo ini-ini buya amwami sikondonyina.

15. Ndilili naakaba “abuusu” mwami wakunyika?

¹⁵ Icisi Ceendelezya Nyika ca Britain a Amelika nocakamulwana mwami wakunyika wakaba “abuusu” elyo mu November 1918 wakazumina kuti wazundwa. Wilhelm Wabili wakatija akuya kuyuba ku Netherlands elyo German cakaba cisi ceendelezyegwaa musololi kutali mwami. Pele mwami wakunyika wakacili kuzumanana.

IMWAMI WACITA ‘CAKUBISYA’

16. Ikweelana abusinsimi, mbuti mbwaakali kunoolimvwa mwami wakunyika azundwa?

¹⁶ “Uyoopiluka abuusu [Mwami wakunyika], nkabela mubukali bwakwe uyoobisya cizuminano cisalala. Apiluke, uyoobika moyo wakwe kulibaabo basia cizuminano cisalala.” (Daniele 11:30b) Mbwaakasinsima obo mungelo alimwi mbucakacitika mbubwenya obo.

17. Ncinzi cakapa kuti Adolf Hitler atalike kweendelezya?

¹⁷ Noyakamana nkondo mu 1918, Imasi aakazunda akabamba cizuminano caluumuno a German icikatazya. Ibana Germany  yakabayumina milawo yamucizuminano eci, pele mfwulumende yabo mpya teeyakacijisi nguzu. Icisi ca Germany teecakakkalikene pe kwamyaka iili mbwiibede elyo cakanjila Mupenzi Lyabucete bukatazide bwalo bwakapa kuti ibantu basika kutuulunzuma ituli 6 babule milimo. Ikuzikusika kumatalikilo aamyaka yakuma 1930, cakasika ciindi cakuti Adolf Hitler abe mweendelezi. Mu January 1933, wakaba mulembi wamwami elyo mumwaka wakatobela wakaba musololi mucisi cakali kwiitwa kuti Bwami Bwatatu * abana Nazi.

18. Ino Hitler wakacita buti “ncayanda”?

¹⁸ Hitler wakalwana “cizumanano cisalala” iciimininwaa banabakwabo Jesu Kristo, ibananike mbwaakatalikila buyo kweendelezya. (Matayo 25:40) Munzila eyi wakacita “ncayanda” ku Banakristo basyomeka, ibunji bwabo wakabapenzya calunya. Hitler wakasumpuka kubuvwubi alimwi wakalicenjede, aboobo wakacita “ncayanda” amuzintu ezi. Mumyaka misyoonto buyo, wakacidumya cisi ca Germany nyika yoonse mbwiizulwa.

19. Mbaani mbaakayanzana ambabo Hitler kutegwa bamugwasilizye?

¹⁹ Hitler ‘wakabikka moyo wakwe kulibaabo basia cizuminano cisalala.’ Ino mbaani aba? Kulibonya kuti mbasololi ba Kristendomu balo bakali kulitaminina kuti bajisi cizuminano cabulongwe a Leza pele ibakalekede ikuba basikwiiya ba Jesu Kristo. Hitler wakazwidilila kulomba lugwasyo kuzwa kuli baabo ‘ibakasiide cizuminano cisalala.’ Mucikozyanyo wakabamba cizuminano apaapa ku Roma. Mu 1935, Hitler wakatalisya Cibeela cilanganya makani aa Zikombelo. Imakanze akwe amwi akali aakuti izikombelo zyaba Pulotestanti kazyeendelezyegwaa mfwulumende.

“BASILUMAMBA” BAZWA KUMWAMI

20. Ino ‘mbaasikalumamba’ bakuli mbaakabelesya mwami wakunyika, alimwi bakalwana bani?

²⁰ Ndilyonya Hitler wakatalisya nkondo mbubwenya mbwaakasinsima mungelo kuti: “Basilumamba bazwa kulinguwe  bayoolibonya, bayoosofwaazya intempele acilwido, bayoolesya cipaizyo calyoonse.” (Daniele 11:31a) Aba ‘basikalumamba’ baambwa awa mbaakali kubelesya mwami wakunyika kutegwa alwane mwami wakumusanza mu Nkondo Yanyika Yabili. ‘Basikalumamba’ bana Nazi bakasaala Poland mu September 1, 1939. Nokwakainda mazuba obile, izisi izitegwa Britain a France zyakatalisya nkondo abana Germany kutegwa zigwasye cisi ca Poland. Aboobo Nkondo Yanyika Yabili mboyakatalika. Icisi ca Polanda cakafwambaana kuzundwa elyo kuzwawaawo, basikalumamba ba German bakatalika kweendelezya Denmark, Norway, Netherlands, Belgium, Luxembourg, alimwi a France. Ibbuku litegwa The World Book Encyclopedia, lyaamba kuti: “Kumamanino aa 1941, icisi ca Nazi Germany cakeendelezya nyika yoonse.”

21. Ino zintu zyakamucincila buti mwami wakunyika noyakali kulwa Nkondo Yanyika Yabili, alimwi ncizi cakacitika?

²¹ Nokuba kuti cisi ca Germany alimwi aca Soviet Union zyakabambide Cizuminano ca Bulongwe, Kubelekelaamwi alimwi aca Kwaabana Minyinza, mu June 22, 1941 Hitler wakasaala masi aa Soviet Union. Eyi ntaamu yakapa kuti cisi ca Soviet Union cigwasilizye Britain. Basikalumamba bana Soviet bakalwana canguzu nokuba kuti kukusaanguna basikalumamba bana German bakali kuboneka kuti mbakali kapati. Basikalumamba bana German bakazundwa ku Moscow mu December 6, 1941. Ibuzuba bwakatobela icisi ca Japan, imulongwe wa Germany, cakafwusa bbomba ku Pearl Harbor mu Hawaii. Naakamvwa boobu Hitler wakaambila basikumugwasilizya ategwa: “Lino tacikonzyeki pe kuzundwa munkondo eyi.” Cakutasowa ciindi, mu December 11 wakatalisya nkondo acisi ca United States. Pele wakazinyansya nguzu zyacisi ca Soviet Union a United States. Mbokwakali basikalumamba bana Soviet bakali kumulwana kuzwa kujwe alimwi abasikalumamba bana Britain a Amelika bakali kuza bumuvwulaafwaafwi kuzwa kumbo, zyakamulemena zintu Hitler. Basikalumamba ba German bakatalika kuzundwa akugwisigwa mucooko cimwi acimwi ncobakazundide.  Icisi ca Germany cakalyaaba mumaanzaa basinkondonyina mu May 7, 1945 naakalisina Hitler.

22. Ino mwami wakunyika ‘wakalisofwaazya buti tempele akulesya cipaizyo calyoonse’?

²² Imungelo wakaamba kuti: “[Basikalumamba bana Nazi] bayoosofwaazya intempele acilwido, bayoolesya cipaizyo calyoonse.” Mu Juda wansiku, icipaililo cakali lubazu lwatempele mu Jerusalemu. Nokuba boobo, iba Juda nobakamukaka Jesu, awalo Jehova wakabakaka antoomwe atempele lyabo. (Matayo 23:37–24:2) Ikuzwa mumwaanda wamyaka wakusaanguna C.E., itempele lya Jehova lyali lyakumuuya kalijisi busena busalalisya kujulu elyo lubuwa lwakumuuya kaluli anyika mwalo mobabelekela bananike ibanabakwabo Jesu, Imupaizi Mupati. Ikuzwa muma 1930 kuyakumbele, “inkamu impati” yali kukombela antoomwe abananike basyeede aboobo baambwa kuti babelekela ‘mutempele lya Leza.’ (Ciyubunuzyo 7:9, 15;11:1, 2; Ba-Hebrayo 9:11, 12, 24) Imwami wakunyika wakasofwaazya lubuwa lwaanyika lwatempele kwiinda mukubapenzya kapati bananike basyeede antoomwe abeenzinyina mumanyika mwaakali kweendelezya. Bakapenzyegwa kapati cakuti “cipaizyo calyoonse”—icituulo cakutembaula zina lya Jehova—cakazwisigwa. (Ba-Hebrayo 13:15) Pele nokuba kuti bakapenga kapati, Ibanakristo bananike basyomeka antoomwe ‘ambelele zimwi’ bakazumanana kukambauka noyakali kulwa Nkondo Yanyika Yabili.—Johane 10:16.

‘CISESEMYO CABUSAALE CAIMIKWA’

23. Ino ncinzi cakali “cisesemyo cabusaale” mumwaanda wamyaka wakusaanguna?

²³ Noyakali kuya kumamanino nkondo yanyika yabili, kwakacitika cintu cimbi mbubwenya mbwaakasinsima mungelo wa Leza. ‘Bayooimika cisesemyo cabusaale.’ (Daniele 11:31b) Awalo Jesu wakalicaambide “cisesemyo cabusaale” eci. Mumwaanda wamyaka wakusaanguna cisesemyo eci bakali basikalumamba ba Roma ibakaboola ku Jerusalemu mu 66 C.E. ikuti bazikulesye buzangi bwaba Juda. *—Matayo 24:15; Daniele 9:27.

24, 25. (a) Ino sunu ncinzi “cisesemyo cabusaale”? (b) Ndilili ‘nocakaimikwa cisesemyo cabusaale’ alimwi muunzila nzi?

 ²⁴ Ino sunu ‘ncisesemyo nzi cabusaale caimikwa’? ‘Ncisesemyo’ ca Bwami bwa Leza bwakucengeezya. Nciinga ca League of Nations, icinyama cisalala pyu calo cakaunka mumulindi naa cakaleka kubawo nkokuti eyi mbunga yakabambilidwe kuleta luumuno munyika yoonse mbwiizulwa teeyakaciliko noyakatalika Nkondo Yanyika Yabili. (Ciyubunuzyo 17:8) Nokuba boobo, ‘eco cinyama cakali kuyoozwa mumulindi.’ Cakacita obo ciindi ciinga ca United Nations nocakatalisigwa mu October 24, 1945 kacijisi masi aali 50 kubikkilizya acisi cakali kwiitwa kuti Soviet Union. Aboobo ciinga ca United Nations—“cisesemyo cabusaale”—icakasinsimwaa mungelo cakabambwa.

²⁵ Icisi ca Germany ncecakali sikondonyina mupati amwami wakumusanza nozyakali kulwa nkondo zyanyika zyoonse zyobile alimwi ncecakali acuuno camwami wakunyika. Ino nguni uyootobela acuuno eco?

Bupanduluzi buyungizidwe

NCIZI NCOMWAIYA?

• Kumamanino aamwaanda wamyaka wa 19, nzisi nzi zyakali acuuno camwami wakunyika alimwi amwami wakumusanza?

• Ino icakacitika kumwami wakunyika nokwakali nkondo akati kabami bobile cakatondezya buti kuti tiicakali “mbuli kumatalikilo”?

• Mbuti Hitler mbwaakacidumya cisi ca Germany noyakamana Nkondo Yanyika Yakusaanguna?

• Ncinzi cakacitika ilya Nkondo Yabili akati kamwami wakunyika amwami wakumusanza?

[Mibuzyo yaciiyo]

 [Ccaati/Zifwanikiso izili apeeji 268]

IBAMI BALI KULI DANIELE 11:27-31

Mwami Mwami

Wakunyika Wakumusanza

Daniele 11:27-30a Bwami bwa German Britain, mpoonya

(Nkondo Yanyika bwatobelwaa Bwami

Yakusaanguna) Bweendelezya Nyika

Cifwanikiso

Imweendelezi Woodrow Wilson a Mwami George Wasanu

bwa Anglo-America

Daniele 11:30b, 31 Ibwami bwa Hitler Bwami Bweendelezya

Bwatatu (Nkondo Nyika Anglo-America

Yanyika Yabili)

[Cifwanikiso]

Imweendelezi Woodrow Wilson a Mwami George Wasanu

[Cifwanikiso]

Ibanakristo banji bakapenzyegwa muzilabba

[Cifwanikiso]

Ibasololi ba Kristendomu bakali kugwasilizya Hitler

[Cifwanikiso]

Mootokala mwaakakkwelede Simulyazina Ferdinand naakajayigwa

[Cifwanikiso]

Basikalumamba bana German, Nkondo Yanyika Yakusaanguna

 [Cifwanikiso icili apeeji 257]

Ku Yalta mu 1945, Minista waku Britain Winston Churchill, Imweendelezi waku United States Franklin D. Roosevelt alimwi a Minista waku Soviet Joseph Stalin bakazuminizyanya amakanze aakuti basaale cisi ca Germany akubamba mfwulumende mpya mu Poland akucitizya muswaangano wakuti babambe ciinga ca United Nations

 [Cifwanikiso icili apeeji 258]

1. Simulyazina wacuuno cabwami bwacisi ca Austria Ferdinand 2. Maato aankondo aa German 3. Maato aankondo aa Britain 4. Lusitania 5. Iba United States nobakatalisya nkondo

 [Zifwanikiso izili apeeji 262]

Adolf Hitler wakasyoma kuti ulazunda ciindi mulongwe wa Germany wakuciindi cankondo, icisi ca Japan nocakafwusa bbomba ku Pearl Harbor