Milimo 23:1-35
23 Kalangisisya ibamu Nkuta Mpati Yaba Juda, Paulo wakati: “Nobaalumi, bakwesu, ndalikupona amanjezyeezya aasalede+ kapati kuli Leza kusikila sunu.”
2 Naakamvwa boobo imupaizi mupati Hananiya wakalailila baabo bakaimvwi munsi lyakwe kuti bamuume kumulomo.
3 Mpoonya Paulo wakati kulinguwe: “Leza ulakuuma ayebo, yebo obwaanda busyingulwidwe mulambo uutuba. Sena ulakkala kundibeteka kweelana a Mulawo pele aciindi nciconya usotoka Mulawo kwiinda mukulailila kuti nduumwe?”
4 Aabo bakaimvwi munsi lyakwe bakati: “Sena yebo utukila mupaizi mupati wa Leza?”
5 Lino Paulo wakati: “Bakwesu, tiindalizyi kuti mupaizi mupati. Nkaambo kulilembedwe kuti, ‘Toyelede kusampaula muleli wabantu bako.’”+
6 Lino Paulo naakabona kuti kwakali nkamu zyobilo, yaba Saduki ayaba Farisi, wakoompolola mu Nkuta Mpati Yaba Juda kuti: “Nobaalumi, bakwesu, ndili mu Farisi,+ imwana waba Farisi. Ndilabetekwa aano akaambo kabulangizi bwakubuka kwabafwu.”
7 Akaambo kamajwi aaya ngaakaamba, ba Farisi aba Saduki bakatalika kukazyanya, eelyo nkamu eeyo yakaandaana.
8 Nkaambo ba Saduki baamba kuti kunyina bubuke, kunyina bangelo azilenge zyamuuya, pele iba Farisi basyoma* kuti eezyi zyoonse nkozili.+
9 Aboobo kwakaba kuyobeka kupati, alimwi bamwi balembi munkamu yaba Farisi bakaima akutalika kukazya cabukali, kabati: “Kunyina cibi ncotwajana mumwaalumi ooyu, pele ikuti cilenge camuuya cimwi naa mungelo wakaambaula anguwe+—.”
10 Lino mazwanga naakakomena kapati, imweendelezi wabasikalumamba wakayoowa kuti Paulo inga baide kumukwamuna, eelyo wakalailila basikalumamba kuselemukila mukati kabantu kuti bamukwempule kulimbabo akumutola kunkambi yabasikalumamba.
11 Pele buzuba mbubonya oobo masiku, Mwami wakaima munsi lyakwe akwaamba kuti: “Koba acamba!+ Nkaambo mbubonya mbooli kupa bumboni cakulomya mu Jerusalemu, weelede kuyoopa bumboni mbubonya akwalo ku Roma.”+
12 Nobwakaca, iba Juda bakamvwana akukonka kuti tiibakali kuyoolya nokuba kunywa cintu cili coonse mane do bakamujaye Paulo.
13 Kwakali baalumi bainda ku 40 ibakamvwana akukonka boobu.
14 Baalumi aaba bakaunka kuli basilutwe babapaizi akubaalu akwaamba kuti: “Twakonka akulisinganya kuti tatukoolya cintu cili coonse mane do tumujaye Paulo.
15 Aboobo nywebo a Nkuta Mpati Yaba Juda mweelede kuzyibya mweendelezi wabasikalumamba kuti weelede kumuleta kulindinywe, cibe mbuli kuti muciyanda kuulanga-langa cakulomya mulandu wakwe. Pele katanasika afwaafwi, swebo tunoolibambilide kumujaya.”
16 Pele mujwa wa Paulo musankwa wakamvwa kuti bakali kukanza kumuyubilila munzila, eelyo wakanjila munkambi yabasikalumamba waakumwaambila Paulo.
17 Aboobo Paulo wakaita umwi wabasilutwe babasikalumamba akumwaambila kuti: “Komutola kumweendelezi wabasikalumamba mulombwana ooyu, nkaambo kuli ncayanda kuyoomwaambila.”
18 Aboobo wakamubweza akumutola kumweendelezi wabasikalumamba akwaamba kuti: “Paulo imwaange walindiitide akundilomba kuti ndilete mulombwana ooyu kulinduwe, nkaambo kuli ncayanda kukwaambila.”
19 Mpoonya mweendelezi wabasikalumamba wakajata mulombwana kujanza akumutola kumbali nkwaakaakumubuzya kuti: “Ino makani nzi ngojisi ngoyanda kundaambila?”
20 Wakati: “Iba Juda bazuminana kuti balombe kuti mukatole Paulo ku Nkuta Mpati Yaba Juda juunza, cikabe mbuli kuti bayanda kuyoomvwisya makani amwi kujatikizya mulandu wakwe.+
21 Pele mutabazuminini pe, nkaambo baalumi babo ibainda ku 40 balimuyubilide Paulo alimwi bakonka akulisinganya kuti tabakoolya nokuba kunywa cintu mane do bamujaye;+ alimwi lino balilibambilide kale, balindila buyo kuti nywebo mukuzumine kulomba kwabo.”
22 Aboobo mweendelezi wabasikalumamba wakamuleka kuti aunke mulombwana ooyo naakamana kumulailila kuti: “Utasoli kwaambila muntu uuli woonse kuti wandizyibya makani aaya.”
23 Mpoonya wakaita basilutwe babasikalumamba bobilo akubaambila kuti: “Amubambe basikalumamba basimaulu ibali 200, abasimabbiza bali 70 alimwi abasimasumo bali 200 kuti balibambile kuunka ku Kaisareya aawoola lyatatu* sunu masiku.
24 Alimwi amubape mabbiza kuti bamutantike mpawo Paulo, bamukwabilile mane bakamusisye kuli Felike mweendelezi.”
25 Alimwi wakalemba lugwalo lwakali kwaamba kuti:
26 “Mebo nde Kilaudiyo Lusiya ndakulembela lugwalo oolu O Mweendelezi Oolemekwa Felike: Ndakwaanzya!
27 Imwaalumi ooyu wakajatwa aba Juda alimwi bakali kuyanda kumujaya, pele cakufwambaana ndakaunka ankamu yabasikalumamba akumuvwuna,+ nkaambo ndakamvwa kuti muna Roma.+
28 Alimwi akaambo kakuti ndakali kuyanda kuzyiba kaambo nkobakali kumupeda mulandu, ndakamutola ku Nkuta yabo Mpati.+
29 Ndakajana kuti mulandu ngobakamupa ngwamazwanga aajatikizya Mulawo wabo,+ pele tajisi mulandu uuli woonse iweelede kumupa kujaigwa naa kwaangwa.
30 Pele akaambo kakuti ndakazyibisyigwa kuti bakanza kumujaya mwaalumi ooyu,+ ndilyonya lino ndilamutuma kulinduwe, alimwi ndalailila basikumupa mulandu kuti baambe mulandu wakwe kumbele lyako.”
31 Aboobo basikalumamba aaba bakamutola Paulo+ imasiku kweelana ambobakalaililwa akusika ku Antipatri masiku ngoonya aayo.
32 Nobwakaca basikalumamba basimaulu bakalekela basimabbiza kuti bazumanane anguwe, pele balo bakapiluka kunkambi yabasikalumamba.
33 Basimabbiza bakanjila mu Kaisareya akumupa lugwalo mweendelezi alimwi awalo Paulo bakamutola kulinguwe.
34 Aboobo wakalubala alimwi wakabuzya cooko nkwaakazwida, eelyo wakajana kuti wakali kuzwa ku Kilikiya.+
35 Mpoonya wakati: “Ndilauswiilila kabotu-kabotu mulandu wako basikukupa mulandu basika.”+ Amane wakalailila kuti alindililwe muŋanda yabwami ya Heroda.
