Milimo 10:1-48
10 Lino mu Kaisareya kwakali mwaalumi umwi uutegwa Korneliyo, silutwe wabasikalumamba* munkamu yakali kwiitwa kuti impi ya Italiya.*
2 Wakali mwaalumi uuyandisya kukomba alimwi uuyoowa Leza antoomwe abamuŋanda yakwe boonse, alimwi wakali kupa zipego zyaluse zinji kubantu akupaila mipailo yakukombelezya Leza cakutaleka.
3 Iciindi kacili afwaafwi awoola lyafwuka*+ lyabuzuba wakabona kabotu-kabotu mucilengaano mungelo wa Leza kaboola kulinguwe akumwaambila kuti: “Korneliyo!”
4 Korneliyo wakamulangisya kayoowede, mpoonya wakamubuzya kuti: “Ninzi Mwami?” Wakati kulinguwe: “Mipailo yako azipego zyako zyaluse zyasika kuli Leza kazili ciibalusyo.+
5 Aboobo lino kotuma baalumi ku Jopa kuti bakaite Simoni ooyo uutegwa Petro.
6 Ooyu muntu mweenzu* wamuntu umwi uutegwa Simoni, imusuki wazipaya uujisi ŋanda kumbali aalwizi.”
7 Mbwaakaunkila buyo mungelo iwakaambaula anguwe, wakaita bobilo akati kababelesi bakwe alimwi asikalumamba mukombi akati kabaabo ibakali babelesi bakwe,
8 eelyo wakabalwiida makani oonse akubatuma ku Jopa.
9 Ibuzuba bwakatobela nobakacili mulweendo lwabo pele kabali afwaafwi amunzi ooyo, Petro wakatanta aciluli caŋanda* kuyoopaila. Iciindi cakali kutandila kuwoola lyacisambomwe.*
10 Pele wakafwide nzala kapati alimwi wakali kuyanda kulya. Nobakacili kubamba cakulya wakabona cilengaano+
11 eelyo wakabona julu lijalukide alimwi acintu cimwi kaciboola ansi mbuli cisani cipati caangidwe mumakkona one icilengelezyegwa;
12 alimwi mulincico mwakali banyama bamisyobo yoonse, bamaulu one, bakalaba anyika alimwi abayuni bamujulu.
13 Mpoonya wakamvwa jwi limwaambila kuti: “Nyamuka Petro, jaya ulye!”
14 Pele Petro wakati: “Peepe Mwami, nkaambo tandinalide cintu cili coonse cisofweede alimwi citasalali.”+
15 Alimwi ijwi lyakaambaula anguwe ciindi cabili kaliti: “Koleka kwaamba zintu Leza nzyaasalazya kuti zilisofweede.”
16 Eeci cakacitika ciindi catatu, eelyo mpoonya aawo cintu eeco cakatolwa kujulu.
17 Lino Petro naakacizyingidwe kujatikizya ncocakali kwaamba cilengaano ncaakabona, ibaalumi mbaakatuma Korneliyo bakabuzya ikwakali ŋanda ya Simoni, eelyo bakaliimvwi amulyango walukwakwa lwanjiyo.+
18 Bakaita akubuzya naa Simoni uutegwa Petro mpaakaswailide aawo.
19 Petro naakacili kuyeeya zyacilengaano eeco, imuuya+ wakamwaambila kuti: “Bona! Baalumi botatwe balakuyanda.
20 Aboobo nyamuka, seluka uunke ambabo, utadooneki naaceya, nkaambo ndime ndabatuma.”
21 Mpoonya Petro wakaseluka kuunka kubaalumi aabo akubaambila kuti: “Ndime ngomuyandaula. Ino mwalonda nzi?”
22 Bakati: “Korneliyo+ silutwe wabasikalumamba, mwaalumi mululami, uuyoowa Leza alimwi uulumbaizyigwa acisi coonse caba Juda, wakapegwa malailile aa Leza amungelo uusalala kuti atume bantu kuzookwaambila kuti uunke kuŋanda yakwe kutegwa amvwe eezyo nzyotiimwaambile.”
23 Aboobo wakabanjizya muŋanda akukkala ambabo kabali beenzu bakwe.
Nobwakaca wakanyamuka akuunka ambabo, alimwi bakwesu bamwi ibamu Jopa bakaunka anguwe.
24 Mubuzuba bwakatobela wakanjila mu Kaisareya. Lino Korneliyo wakali kubalangila alimwi wakatambide basazinyina abeenzinyina mbocakali kumvwana kapati.
25 Mbwaakanjilila buyo Petro, Korneliyo wakamucinga, wakawida kumaulu aakwe akumufwugamina.*
26 Pele Petro wakamwiimikizya akumwaambila kuti: “Nyamuka; andime ndili muntu buyo.”+
27 Eelyo kacibandika anguwe, wakanjila mukati akujana bantu banji balibungene.
28 Mpoonya wakabaambila kuti: “Mulizyi kabotu kuti cilatondwa kumu Juda ikuyanzana naa kuswaya muntu wamusyobo uumbi,+ pele lino Leza wanditondezya kuti tandeelede kwaamba muntu uuli woonse kuti ulisofweede naa kuti tasalali.+
29 Nkakaambo kaako tiindakakaka kuboola nindakaitwa. Aboobo ndiyanda kuzyiba kaambo nkomwandiitila.”
30 Mpoonya Korneliyo wakati: “Mazuba one aainda kubala kuzwa awoola elino, ndakali kupaila muŋanda yangu awoola lyafwuka;* mpoonya ndakabona mwaalumi umwi wakasamide cisani cimweka-mweka kaimvwi kumbele lyangu.
31 Wakati: ‘Korneliyo, mupailo wako wamvwugwa alimwi azipego zyako zyaluse zyayeeyegwa a Leza.
32 Aboobo kotuma bantu ku Jopa bakaite Simoni, ooyo uutegwa Petro. Ooyu muntu mweenzu muŋanda ya Simoni, musuki wazipaya, uukkala kumbali aalwizi.’+
33 Aboobo ndilyonya ndakakutumina bantu kuti bakwiite, alimwi wacita kabotu kuboola okuno. Aboobo lino toonse tuli waano kumbele lya Leza kutegwa tumvwe zintu zyoonse nzyaakulailila Jehova* kuti waambe.”
34 Naakamvwa boobo, Petro wakatalika kwaambaula kuti: “Lino ndazyiba ncobeni kuti Leza tasalululi,+
35 pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.+
36 Wakatuma jwi kubana ba Israyeli ikwaambilizya makani mabotu aaluumuno+ kulimbabo kwiinda muli Jesu Kristo kuti—ooyu ngo Mwami waboonse.+
37 Mulaazyi makani aakabandikwa mu Judaya moonse, kutalikila mu Galilaya+ nolwakainda lubbapatizyo ndwaakakambauka Johane:
38 kujatikizya Jesu ooyo wakazwa ku Nazareta, Leza mbwaakamunanika amuuya uusalala anguzu,+ alimwi wakeenda koonse-koonse munyika kacita zintu zibotu akuponya boonse bakali kudyaamininwa a Diabolosi,+ nkaambo Leza wakali anguwe.+
39 Lino tuli bakamboni bazintu zyoonse nzyaakacita mucisi caba Juda amu Jerusalemu; pele bakamujaya kwiinda mukumugagaila aacisamu.
40 Leza wakamubusya ooyu muntu mubuzuba bwatatu+ akumupa kuti alibonye,
41 ikutali kubantu boonse pe, pele kuli bakamboni bakasalilwa limwi a Leza, kulindiswe, nitwakalya akunywa anguwe naakabuka kuzwa kubafwu.+
42 Alimwi wakatulailila kukambaukila bantu akupa bumboni cakulomya+ bwakuti muntu ooyu ngonguwe wakasalwa a Leza kuti abe mubetesi wabaumi abafwide.+
43 Basinsimi boonse bamucitila bumboni+ bwakuti, muntu uuli woonse uumusyoma ulalekelelwa zibi zyakwe kwiinda muzina lyakwe.”+
44 Petro naakacili kwaamba makani aaya, imuuya uusalala wakabasikila boonse aabo bakali kuswiilila majwi aa Leza.+
45 Alimwi basyomi bapalwidwe* ibakaboolede a Petro bakagambwa, nkaambo cipego camuuya uusalala cakali kupegwa akubantu bamasi.
46 Nkaambo bakabamvwa kabaambaula myaambo* imbi akutembaula Leza.+ Mpoonya Petro wakati:
47 “Sena kuli muntu uukonzya kwaakasya maanzi kuti batabbapatizyigwi+ bantu aaba ibatambula muuya uusalala mbubonya mbuli ndiswe?”
48 Eelyo wakabalailila kuti babbapatizyigwe muzina lya Jesu Kristo.+ Mpoonya bakamulomba kuti kacikkede ambabo kwamazuba aali mbwaabede.
Bupanduluzi buyungizyidwe
^ Naa “sikweendelezya basikalumamba bali 100.”
^ Naa “impi yaba Roma yabasikalumamba bali 600.”
^ Nkokuti, cakuma 3 koloko yakumazuba.
^ Naa “usamausyigwa.”
^ Ibunji bwamaanda akali kuyakwa kaaselebete atala, alimwi akali kubelesyegwa abantu kucitila zintu zinji.
^ Nkokuti, cakuma 12 koloko yamasyikati.
^ Naa “akumukotamina.”
^ Nkokuti, cakuma 3 koloko yakumazuba.
^ Amubone Makani Aayungizyidwe A5.
^ Naa “bantu basyomeka.”
^ Mu Chigiriki, “milaka.”
