Bakolose 4:1-18
4 Nywebo nobasimalelo, amubacitile ziluleme alimwi zyeelede bazike banu, kamuzyi kuti anywebo mulijisi Simalelo kujulu.+
2 Amuyume kupaila,+ amupakamane lyoonse mumupailo akulumba.+
3 Aciindi nciconya kamutupailila andiswe,+ kutegwa Leza atujalude mulyango wakuti twaambe jwi, twaambilizye maseseke aakwe aajatikizya Kristo, aayo aandipede kwaangwa muntolongo,+
4 kutegwa ndaapandulule munzila yeelede.
5 Amuzumanane kweenda cabusongo akati kabantu bakunze, alimwi kamucibelesya kabotu ciindi coonse ncomujisi.*+
6 Majwi aanu kaakondelezya lyoonse, aalweezyedwe kabotu amunyo+ kutegwa muzyibe mbomweelede kumwiingula muntu umwi aumwi.+
7 Tukiko,+ imukwesu ngweyandisya, imubelesi uusyomeka alimwi muzikema mu Mwami, uyoomwaambila makani oonse aajatikizya ndime.
8 Ndilamutuma kulindinywe kutegwa muzyibe mbotubede, akuti amukkazike myoyo.
9 Ulaboola antoomwe a Onesimo,+ imukwesu uusyomeka alimwi ngweyandisya, ooyo uuzwa akati kanu; bayoomwaambila zintu zyoonse zicitika okuno.
10 Arisitarko,+ imwaangema wamwaanzya, alimwi wamwaanzya awalo Marko+ imweeninyina Barnaba (ooyo ngomwakalaililwa kuti mumutambule+ ikuti naa wasika kulindinywe),
11 alimwi a Jesu ooyo uutegwa Jusito, aaba bali akati kabaabo bapalwidwe. Aaba balikke mbabasimilimoma kujatikizya Bwami bwa Leza, alimwi mbambabo ibanduumbulizya* kapati.
12 Epafra,+ imuzike wa Kristo Jesu, ooyo uuzwa akati kanu, wamwaanzya. Ulalitakata lyoonse mumipailo yakwe kujatikizya ndinywe, kutegwa kumamanino mukaime kamuzulide alimwi kamusinizyide cakumaninina muzintu zyoonse ziyanda Leza.
13 Nkaambo mebo ndili kamboni wakwe kuti ulalitakata kubelekela ndinywe abaabo bali ku Laodikeya alimwi aku Herapoli.
14 Luka,+ imusilisi uuyandwa wamwaanzya, alimwi awalo Dema+ wamwaanzya.
15 Amundaanzyile bakwesu bali ku Laodikeya amucizyi Numfa alimwi ambungano iiswaanganina muŋanda yakwe.+
16 Lino mwaakumana kulubala lugwalo oolu akati kanu, amukabikke bubambe bwakuti lukabalwe+ akumbungano yabana Laodikeya alimwi akuti andinywe mukalubale oolo luzwa ku Laodikeya.
17 Alimwi amwaambile Arikipo+ kuti: “Koubikkila maano mulimo ngowakazumina mu Mwami kuti uuzuzikizye.”
18 Mebo nde Paulo, ndamulembela mooni wangu ooyu ajanza lyangu ndemwini.+ Kamuziyeeya lyoonse nketani zyangu.+ Luzyalo lwa Leza alube andinywe.
Bupanduluzi buyungizyidwe
^ Mu Chigiriki, “kamulyuulila ciindi cibikkidwe.”
^ Naa “ibandiyumya-yumya.”
