2 Samuele 1:1-27
1 Lino naakafwa Saulo, ciindi Davida naakapiluka kukuzunda* bana Amaleki, Davida wakakkala ku Zikilaga+ mazuba obilo.
2 Mubuzuba bwatatu, kwakaboola muntu umwi kuzwa kunkambi ya Saulo, zisani zyakwe zyakalizapaukide alimwi wakali avwu mumutwe. Mbwaakasikila buyo kuli Davida, wakaliwaala ansi akuvwuntama.
3 Davida wakamubuzya kuti: “Ino wazwa kuli?” Kumane walo wakavwiila kuti: “Ndatija buya kuzwa kunkambi yabana Israyeli.”
4 Mpoonya Davida wakamubuzya kuti: “Kondaambila, ino zintu zili buti?” Walo wakati: “Baalumi bana Israyeli batija kuzwa kunkondo alimwi banji bafwa. Awalo Saulo amwanaakwe Jonatani bafwa.”+
5 Kumane Davida wakabuzya mulombwana ooyu iwakamuletela mulumbe kuti: “Ino uzyi buti kuti Saulo amwanaakwe Jonatani bafwa?”
6 Mpoonya mulombwana ooyu wakaingula kuti: “Ndali a Cilundu ca Giliboa+ eelyo ndabona Saulo kayeeme asumo lyakwe, alimwi basinkalaki abasimabbiza balimuswenede afwaafwi.+
7 Naalanga musyule akundibona, wandiita eelyo ndati, ‘Ndime aano!’
8 Mpoonya wandibuzya kuti, ‘Ino nduwe ni?’ Kumane ndamwiingula kuti, ‘Ndili muna Amaleki.’+
9 Eelyo wandaambila kuti, ‘Koboola undijaye, nkaambo ndilicimvwide nokuba kuti ndicili muumi.’
10 Aboobo ndamujaya+ nkaambo ndalizyi kuti takoopona naamana kuwa kaliciside. Mpoonya ndabweza musini iwali kumutwe wakwe ankaya yali kujanza lyakwe eelyo ndazileta okuno kulinduwe simalelaangu.”
11 Aboobo Davida wakazapula zisani zyakwe, alimwi abalo baalumi boonse mbaakali limwi bakacita mbubonya oobo.
12 Mpoonya bakoomoka kulila akuliimya+ kulya kusikila kumangolezya akaambo ka Saulo, Jonatani mwanaakwe, bantu ba Jehova alimwi abaluzubo lwa Israyeli+ ibakajaigwa apanga.
13 Kumane Davida wakabuzya mulombwana ooyu wakamuletela mulumbe kuti: “Ino uzwa kuli?” Eelyo wakati: “Ndili mwana wamuna Amaleki, imweenzu uukkala mu Israyeli.”
14 Mpoonya Davida wakati kulinguwe: “Ino nkaambo nzi ncootayoowa kutandabika janza lyako akujaya munanike wa Jehova?”+
15 Kumane Davida wakaita umwi wabalombwana akumwaambila kuti: “Boola okuno umujaye.” Aboobo wakamujaya.+
16 Mpoonya Davida wakati kulinguwe: “Mulandu wabulowa bwako uli alinduwe, nkaambo walicitila bumboni omwini bwakuti, ‘Mebo lwangu ndamujaya munanike wa Jehova.’”+
17 Mpoonya Davida wakaimba lwiimbo oolu lwabuumba* kulila Saulo a Jonatani+ mwanaakwe,
18 akwaamba kuti bana ba Juda beelede kuyiisyigwa lwiimbo oolu lwiitwa kuti “Buta,” ilulembedwe mubbuku lya Jasari:+
19 “Balemu bajaigwa mumalundu aako,+ O Israyeli.
Maawe bawa baalumi basinguzu!
20 Makani aaya mutakaambi mu Gati;+Mutakaambilizyi mumigwagwa ya Asikeloni,Buyo-buyo basimbi baba Filisiti bayookondwa,Alimwi bana basimbi babaalumi batapalwidwe bayoosekelela.
21 Nywebo nomalundu aa Giliboa,+Kutabi mume niiba mvwula alindinywe,Kutabi myuunda iizyala micelo iikonzya kwaabwa kuli Leza,+Nkaambo ooko ntobo zyabasinguzu zyakasampaulwa,Ntobo ya Saulo tiicinanikidwe amafwuta.
22 Buta bwa Jonatani bwakali kutila bulowa bwabajaidwe akuyasa mafwuta aabasinguzu,Tiibwakali kupiluka buyo pe,+Alimwi apanga lya Saulo tiilyakali kupiluka kakunyina kuzunda.+
23 Saulo a Jonatani+ bakali bantu bayandwa alimwi ibakali kukkomanisya* mubuumi bwabo,Nomuba mulufwu tiibakaandaana pe.+
Bakali alubilo kwiinda basikwaze,+Bakali anguzu kwiinda basyuumbwa.+
24 Nobana basimbi bamu Israyeli, amumulile Saulo,Iwakamusamika zisani zisalala pyu zyeebeka,Iwakabikka tulisakatizyo twangolida kuzisani zyanu.
25 Maawe basinguzu bawa munkondo!
Jonatani ulilede kajaidwe atala aamalundu aako!+
26 Ndapenga kapati mumoyo, mwanookwesu Jonatani;Wali muntu mubotu kapati kulindime.+
Luyando lwako kulindime lwali lubotu kapati kwiinda luyando lwabamakaintu.+
27 Maawe bawa basinguzuAzilwanyo zyankondo zyanyonyooka!”
