2 Bakorinto 3:1-18
3 Sena tweelede kutalika kulilumbaizya alimwi? Naa sena tuyandika magwalo aatulumbaizya kulindinywe naa aazwa kulindinywe mbuli mbobacita bamwi?
2 Nywebo nobeni ndendinywe lugwalo lwesu,+ ilulembedwe mumyoyo yesu alimwi luzyibidwe akubalwa abantu boonse.
3 Nkaambo nywebo mutondezya kuti muli lugwalo lwa Kristo lwakalembwa andiswe mbotuli babelesi.+ Tiilwakalembwa ainki pe, pele lwakalembwa amuuya wa Leza muumi, alimwi talulembedwe amabwe aapapalete eeni pe,+ pele lulembedwe amabwe aapapalete aanyama, aamyoyo.+
4 Tujisi lusyomo oolu muli Leza kwiinda muli Kristo.
5 Swebo lwesu tatukonzyi kulibona kuti tuleelela ncobeni kucita cintu cili coonse, pele Leza nguutupa kuti tweelele ncobeni.+
6 Masimpe walo nguwatupa kuti tweelele ncobeni kuba babelesi bacizuminano cipya,+ ikutali ba mulawo uulembedwe pe,+ pele ibamuuya; nkaambo mulawo uulembedwe uletela lufwu,+ pele muuya upa buumi.+
7 Lino ikuti mulawo ooyo uuletela lufwu alimwi iwakasimbidwe bbala abbala amabwe,+ wakaletwa abulemu, cakuti bana ba Israyeli tiibakakonzya kumulangisisya kumeso Musa akaambo kabulemu mbwaakajisi kumeso,+ ibulemu oobo ibwakali kuyoozimaazyigwa,
8 ino nkaambo nzi ikupegwa kwamuuya+ ncokutakonzyi kwiinda kuba abulemu?+
9 Nkaambo ikuti naa mulawo iwakajisi mulimo wakupa bantu mulandu+ wakali abulemu,+ nkokuti mulimo wakubalulamika wakali kuyakwiinda kuba abulemu.+
10 Ncobeni, nouba mulawo ooyo wakapedwe bulemu musyule wanyangwa bulemu bwanguwo akaambo kabulemu oobo bupati kwiinda nguwo.+
11 Nkaambo ikuti naa mulawo ooyo iwakali kuyoozimaazyigwa wakaletwa abulemu,+ nkokuti ooyo uukkalilila wakali kuyakwiinda kuba abulemu.+
12 Mbwaanga tujisi bulangizi buli boobu,+ tulaambaula cakutayoowa abuniini,
13 alimwi tatuciti bwakacita Musa naakali kulivwumba cisani kubusyu+ kutegwa bana ba Israyeli bataalangisisyi mamanino aabulemu oobo ibwakali kuyoozimaazyigwa.
14 Pele bakaba akazilukwa mukuyeeya kwabo.+ Nkaambo kusikila sunu cisani eeci tacivwumbulwi nokubalwa cizuminano cakaindi,+ nkaambo cigusyigwa buyo kwiinda muli Kristo.+
15 Masimpe, kusikila sunu kufwumbwa nobabala mabbuku aa Musa,+ cisani eeco nkocili amyoyo yabo.+
16 Pele eelyo muntu nasandukila kuli Jehova,* cisani eeco cilagusyigwa.+
17 Lino Jehova* Muuya,+ alimwi ooko kuli muuya wa Jehova,* kuli lwaanguluko.+
18 Alimwi toonse, eelyo busyu bwesu butavwumbidwe cisani nobutondezya bulemu bwa Jehova* mbuli zimbonimboni, tulasandulwa kuba mucinkozya cakwe, alimwi tulazumanana kuzwa mubulemu bumwi kuya mubulemu bumbi mbubonya mbwatupa kusanduka Jehova* walo uuli ngo Muuya.*+
Bupanduluzi buyungizyidwe
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa ambweni, “mbotusanduka kwiinda mumuuya wa Jehova.”
