1 Makani 14:1-17
14 Mwami Hiramu+ wa Turo wakatuma batumwa kuli Davida alimwi wakatuma azisamu zyakkedari, babezi abasikuyaka kubelesya mabwe* kuti bamuyakile ŋanda.*+
2 Lino Davida wakazyiba kuti Jehova wakamukkazikizya kuba mwami wa Israyeli+ nkaambo bwami bwakwe bwakasumpulwa kapati akaambo kabantu bakwe bana Israyeli.+
3 Lino Davida wakakwata bamakaintu+ abambi mu Jerusalemu, eelyo Davida wakazyala bana basankwa abasimbi bambi banji.+
4 Aaya ngamazina aabana mbaakazyala ku Jerusalemu:+ Samua, Sobabu, Natani,+ Solomoni,+
5 Ibara, Elisua, Elipeleti,
6 Noga, Nefegi, Jafiya,
7 Elisama, Beliyada a Elifeleti.
8 Lino ba Filisiti nobakamvwa kuti Davida wananikwa kuba mwami wabana Israyeli,+ ba Filisiti boonse bakaboola kuyandaula Davida.+ Eelyo Davida naakamvwa boobo, wakaunka kuyoobalwana.
9 Kumane ba Filisiti bakaboola akutalika kusaala bantu mu Kkuti* lya Refaimu.+
10 Davida wakabuzya Leza kuti: “Sena nduunke kuyoolwana ba Filisiti? Sena ulabaaba mumaanza aangu?” Mpoonya Jehova wakaambila Davida kuti: “Koya, alimwi masimpe ndilabaaba mumaanza aako.”+
11 Aboobo Davida wakaunka ku Baala-perazimu,*+ eelyo wakabajaya ooko. Mpoonya wakati: “Leza mwini-mwini wabanyonyoona basinkondoma kwiinda mulindime mbubonya mbuli maanzi manji aazambangulwe.” Nkakaambo kaako busena oobo bakabuulika kuti Baala-perazimu.
12 Ba Filisiti bakabasiya baleza babo ooko, alimwi ciindi Davida naakapa malailile, bakabaumpa baleza aabo mumulilo.+
13 Mukuya kwaciindi, ba Filisiti bakaboola alimwi kuzoosaala mukkuti.*+
14 Kumane Davida wakabuzya alimwi kuli Leza, pele Leza mwini-mwini wakamwaambila kuti: “Utabagami buya pe. Pele kozinguluka kusyule lyabo, mpoonya ukabalwane kumbele lyazivwuna zyabbaka.+
15 Lino waakumvwa kukwayama mbuli bantu beenda atala aazivwuna zyabbaka, mpoonya aawo ukanyamuke akubalwana, nkaambo aciindi eeco Leza mwini-mwini unooli wainda kale kumbele lyako kuyoojaya mpi yabasikalumamba yaba Filisiti.”+
16 Aboobo Davida wakacita mbubonya Leza mwini-mwini mbwaakamulailila,+ eelyo bakaijaya mpi yabasikalumamba yaba Filisiti kuzwa ku Gibeoni mane kuyoosika ku Gezeri.+
17 Lino mpuwo ya Davida yakamwaika muzisi zyoonse, alimwi Jehova wakapa kuti misyobo yoonse kaimuyoowa.+
Bupanduluzi buyungizyidwe
^ Naa “abasikuyaka malambo.”
^ Naa “ŋanda yamwami.”
^ Naa “Cibanda.”
^ Nkokwaamba kuti “Syaazibwene Mukupwaya.”
^ Naa “mucibanda.”
