Mu 2017, Bakamboni bali 12 bakkala kunkomwe ya Mosquito (Miskito) ku Nicaragua, bakatalika lweendo abwato. Bwato bwabo bwakali kwiitwa kuti Sturi Yamni. Umwi wa Bakamboni aaba wazina lya Stephen wakaamba boobu, “Makanze eesu akali aakuyookulwaizya kabunga kasyoonto ka Bakamboni ibakali kukkala kulamfwu, akubagwasya kukambauka makani mabotu kubantu banji ibakali mucilawo cabo.”

 Basilweendo aaba bali 12 bakanyamuka ku Pearl Lagoon, akutalika lweendo lwabo lwamakkilomita aali 200 kuunka ku Río Grande de Matagalpa. Tiibakazyi kuti izina lyabwato bwabo, ilyaamba kuti “Makani Mabotu,” lyakali kuyoobajatikizya kapati bantu bakali kukkala mumbali amulonga. Bakeenda mawoola aali 12, kutabalilizya ciindi ncobakapumuna munzila, kutegwa basike nkobakali kuunka, ku La Cruz de Río Grande. Nobakasika, Bakamboni bali 6 bakabatambula amaanza obilo bakwesu aaba.

 Buzuba nobakasika, masiku kwakacitika ntenda. Guwo lyakapa kuti kuwe mvwula mpati, cakuti mulonga wa Río Grande de Matagalpa wakazula. Mumawoola buyo masyoonto, mulonga wakapaya alimwi maanzi akazumanana kuyungizyika kwamazuba obilo. Ŋanda ya Bwami alimwi amaanda aamwi manji mu La Cruz akazula maanzi. Ibakwesu beenzu bakatalika kugwasya bantu bakubusena oobu kuzwa mumaanda aabo. Ibanji bakakkala kwamazuba obilo muŋanda yamucizyi umwi iyakajisi masiteya obilo.

 Mubuzuba bwatatu, ba mayor baku La Cruz bakalomba lugwasyo kubakwesu beenzu. Mbwaanga bwato bwabo bulikke mbobwakali kukonzya kweenda amulonga wakapaide, ba mayor bakali kuyanda kuti bakwesu aaba batole basikugwasyilizya nokwacitika ntenda kumasena aamwi aakajatikizyigwa antenda eeyi. Bakwesu bakazumina kugwasyilizya.

 Nobwakaca buzuba bwakatobela, bakwesu botatwe bakaunka abasikugwasyilizya nokwacitika ntenda. Ba Stephen bakaluula kuti: “Aciindi aawa mulonga wakalizwide. Masamu aakazyuka akali kwiibauka atala amaanzi, meenda akali kuzinguluka kapati mbuli kuti kwakali kambizi, alimwi akali kubalika kapati.” Nokuba kuti kwakali bukkale oobu bukatazya, bwato bwakacikonzya kusika kumasena otatwe.

 Bakwesu botatwe aaba bakabelesya coolwe eeci kuumbulizya basimunzi. Kuyungizya waawo, bakamwaya Sinsimuka! imwi yamu 2017 yakajisi mutwe weelela wakuti “Ciindi Nokwacitika Ntenda—Nzila Zikonzya Kugwasya Kufwutula Bantu.”

 Basimunzi bakalumba kapati kulugwasyo lwakumubili alimwi alwakumuuya ndobakapegwa a Bakamboni. Mane basimunzi bamwi bakaamba kuti: “Balalisungula kugwasya muziindi zikatazya.” Ibambi bakati: “Bajisi luyando lwini-lwini.” Basimunzi banji nobakabona mbobakalisungula Bakamboni kugwasya bakombinyina alimwi abamwi buyo, bakaba aluyandisisyo lwakuswiilila mulumbe wamu Bbaibbele uumbulizya.