Ikuti naa muli Bakamboni ba Jehova, amweezyeezye kusindikilwa abakapokola kamuli mumulimo wakukambauka makani mabotu kuŋanda aŋanda. Eeci ncecakabacitikila ba Joseph ku Micronesia mu 2017. Balo alimwi a Bakamboni bambi botatwe bakali mumulimo waalubazu wakukambaukila munsumbu zyakulamfwu.

 Ciindi nocakasika acilungulungu, Bakamboni aaba bone bakasika ansumbu imwi nsyoonto iyakajisi bantu babalilwa ku 600. Nobakali kunkomwe bakajana ba mayor baansumbu ibakabaanzya. Ba Joseph bakapandulula cakatobela kabati: “Ba mayor bakatwaambila kuti mootokala wabakapokola wakali kukonzya kututola kumaanda oonse. Twakagambwa amajwi aayo, pele cabulemu twakakaka. Twakali kuyanda kubasikila bantu mbubwenya mbotucita lyoonse mumulimo wakuŋanda aŋanda.”

 Mpoonya basikumwaya bakatalika kweenda amaulu, kabakanzide kubandika abantu kusikila mpobagolela. Basikumwaya aaba bakaamba kuti, “Bantu bakali kusamausya alimwi akuukkomanina mulumbe wesu. Aboobo, twakali kutola ciindi cilamfwu aŋanda imwi aimwi.”

 Buzuba mbubwenya oobo, mootokala wabakapokola wakabainda ba Joseph ziindi zyobilo mpoonya ciindi catatu wakaima. Bakapokola bakaambila ba Joseph kuti inga babatola kumaanda ngobatakaningaswaya. Ba Joseph bakaamba kuti: “Ndakati peepe. Pele bakazumanana kwaamba kuti, ‘Ciindi caunka, aboobo tulamutola kumaanda oonse asyaala.’ Aciindi eeci tiindakakaka pe nkaambo kwakacili maanda manji ngondakeelede kuswaya. Twayanda kusika aŋanda imwi aimwi, bakapokola bakali kundaambila mazina aabamukamwiniŋanda, akuti naa kunyina iwazwa muŋanda ndakonkomona, bakali kuyoolizya hooter yamootokala kutegwa bamukamwini ŋanda bazwe.

 “Kwiinda mulugwasyo lwabo, twakacikonzya kuswaya maanda oonse buzuba oobo. Twakamwaya mabbuku manji akusyomezya kupilukila kubantu ibakatondezya luyandisisyo.”

 Bakapokola bakaambila ba Joseph kuti “bakakkomana kapati kumwaya makani mabotu.” Ciindi ba Joseph a Bakamboninyina nobakali kunyamuka kumabbililo aazuba, bakapokola bakababbaibbika kumwi kabaseka-seka kabajisi amabbuku ngobakabasiila.