Ba Osman alimwi abakaintu babo antoomwe amwanaabo bakali kukambauka kubelesya kakkocci kakubikkila mabbuku kunze aanamaumbwe ku Chile. Cakutayeeyela, kwakasika basimalila ibakali kwiimbisya. Ibamwi bakali kuyeeyela kuti ba Osman mbapasita bakucikombelo cabo, aboobo bakabasikila akubakumbata, akubaambila kuti, “Twamulumba akaambo kakubamba ciindi ba Pasita, twali kumulangila!”

 Nokuba kuti ba Osman bakasola kupandulula kuti tiibakali mbabo, bantu tiibakali kubamvwa nzyobakali kwaamba akaambo kacoongo. Nokwakainda maminiti masyoonto bantu nobakanjila, bamwi bakapiluka kuli ba Osman akubaambila kuti, “ba Pasita tulindila ndinywe.”

 Nokwakaumuna ba Osman bakalipandulula akwaamba ncobakaunkila kunamaumbwe. Bantu nobakamana kutongooka ba Pasita babo ibatakaboola, bakalomba ba Osman kuti, “Sena inga tiimwaboola mukati mwaambe buyo majwi masyoonto aamu Bbaibbele kubantu?” Ba Osman bakazumina.

 Munzila kabaya kucuumbwe, ba Osman bakabuzya mibuzyo kujatikizya sikwaazwa mpoonya bakayeeya magwalo masyoonto aakubelesya. Nobakasika acuumbwe, bakalipandulula kunkamu alimwi bakaamba kuti bakali Bakamboni ba Jehova, ibakali kutola lubazu mumulimo wakwaambilizya makani mabotu kubantu.

 Kwiinda mukubelesya lugwalo lwa Ciyubunuzyo 21:3, 4 alimwi a Johane 5:28, 29, bakapandulula kuti tanaakali makanze aa Leza kuti bantu kabafwa. Kuyungizya waawo bakaamba kuti, lino-lino Leza uyoobabusya bantu bafwide, alimwi bayooba abulangizi bwakupona kukabe kutamani anyika. Ciindi ba Osman nobakamanizya, bantu banji bakabakumbata alimwi akubalumba akaambo “kamulumbe wa Jehova wamakani mabotu.” Mpoonya bakapiluka kukakkocci kakubikkila mabbuku.

 Nobakamana kuzikka, basimalila bamwi bakaboola kukakkocci kakubikkila mabbuku akubuzya ba Osman amukwasyi wabo mibuzyo kujatikizya Bbaibbele. Bakabandika kwaciindi cilamfwu, mpoonya nobakaunka bakabweza amabbuku manji aakali akakkocci kakubikkila mabbuku.