Mu 2005, mukaintu uumwi uukkala ku India wazina lya Sowbhagya wakafwidwa balumi. Eeci cakali kweetezya nkaambo bakali kumubikkila maano walo alimwi amwanaakwe musimbi wakajisi myaka yotatwe wazina lya Meghana. Aboobo buumi bwakabayumina ba Sowbhagya nkaambo bakeelede kujana mali aayandika kutegwa kabalilanganya balo amwanaabo.

 Cakainda kubija ncakuti, bantu bamwi bakatalika kubatantamuka. Mukwasyi wabo wakatalika kubabona mbuli kuti mbaasikulombelela, alimwi cakwiinduluka-induluka bakali kubaambila kuti mukuli uuminya kulimbabo. Kutegwa bajane luumbulizyo, ba Sowbhagya bakatalika kuunka kucikombelo cimwi, pele bantu bakucikombelo ooko tiibakali kubeendelezya kabotu akaambo kakuti bakali bacete. Ba Sowbhagya bakatalika kuyandaula mulimo kutegwa kabacikonzya kuligwasyilizya lwabo alimwi amwanaabo. Pele nokuba kuti bakasolekesya, kunyina nibakajana mulimo.

 Ba Sowbhagya bakaamba kuti: “Ndakalimvwa kubula mpindu, aboobo ndakayeeya buyo kuti ndilijaye. Pele alimwi ndakalizyi kuti kakunyina ndime, mwanaangu wakali kuyoojana mapenzi manji. Aboobo ndakayeeya kuti toonse tufwe buyo.” Akaambo kakulimvwa kubula mpindu alimwi akutayandwa, ba Sowbhagya bakaunka kuyakuula musamu uujaya.

 Ciindi ba Sowbhagya nobakali kujoka kuŋanda acitima, umwi wa Bakamboni ba Jehova wazina lya Elizabeth wakabasikila akutalika kubandika ambabo. Ba Sowbhagya bakapandulula kuti bakanyina mulimo, mpoonya ba Elizabeth bakalisungula kubagwasya kujana mulimo. Ba Elizabeth bakaamba kuti bakali kuunka kuyoosololela ciiyo ca Bbaibbele. Eeci cakabagambya ba Sowbhagya akaambo kakuti nokuba kuti bakanjila zikombelo zinji, kunyina nibakamvwide zyabantu baiya Bbaibbele. Ba Elizabeth bakatamba ba Sowbhagya kuti bakabaswaye kutegwa bakabaambile zinji kujatikizya ciiyo ca Bbaibbele.

 Ciindi ba Sowbhagya nibakasika kuŋanda, bakacijisi makanze aakulijaya. Nokuba boobo, munamukwasyi uumwi wakabwezede mwanaabo Meghana, aboobo ba Sowbhagya bakasala kuti balindile mane akajoke kutegwa makanze aabo baazuzikizye.

 Kabacilindila, bakaunka kuyooswaya ba Elizabeth, balo bakabatambula calukkomano. Mpoonya ba Elizabeth bakabatondezya bbuku lyakuti Ino Ncinzi Cini Bbaibbele Ncoliyiisya? Ba Sowbhagya bakakkomanina cibalo cakuti “Ino Bafwide Bali Kuli?” Cibalo eeci cakabakwelelezya akaambo kalufwu lwa bamulumi babo. Mubuzuba mbubonya oobo, ba Sowbhagya bakazumina kwiiya Bbaibbele.

 Ba Elizabeth bakatamba ba Sowbhagya kumuswaangano wacooko wakali kuyooba nsondo yakali kuyootobela, ba Sowbhagya bakazumina. Bakakulwaizyigwa kapati apulogilamu cakuti bakasala kuti babe umwi wa Bakamboni ba Jehova. Alimwi ciindi nobakapiluka kuzwa kumuswaangano wacooko, bakajana mulimo.

 Ba Sowbhagya bakazumanana kwiiya Bbaibbele. Lino muciindi cakuyanda kulijaya, bakajana kaambo kakuyanda kuzumanana kupona. Bakabbapatizyigwa, alimwi mukuya kwaciindi awalo mwanaabo musimbi Meghana, wakabbapatizyigwa. Sunu, boonse bobilo balabeleka kabali bapainiya baciindi coonse, alimwi Meghana ulabeleka kali sikugwasyilizya mulimo waa Bbeteli uubelekela kuŋanda kumaofesi aabasanduluzi ku India.

 Eelo kaka ba Sowbhagya alimwi a Meghana balabalumba ba Elizabeth kubasikila nobakali mucitima, kubatondezya luyandisisyo, akubaambila kujatikizya kasimpe! Alimwi buya balamulumba kapati Jehova. Meghana wakaamba kuti: “Mebo abamaama notwalifwide kale ikuti notwatakaiya kasimpe buzuba oobuya. Lino tulikkomene kapati. Eelo kaka tulacilangila ciindi notuyoobakumbata alimwi bataata, kubayiisya kujatikizya Jehova, alimwi akubaambila mbwaakafwutula buumi bwesu.”