Kabunga Keendelezya nkakamu kasyoonto ka Banakristo basimide ibapa malailile kuli Bakamboni ba Jehova nyika yoonse. Mulimo wabo uli muzibeela zyobilo:

•   Mbobalanganya mulimo wakupa malailile aamu Bbaibbele kwiinda mumabbuku, kumiswaangano, alimwi akuzikolo zya Bakamboni ba Jehova.​—Luka 12:42.

•   Mbobalanganya mulimo wanyika yoonse wa Bakamboni ba Jehova kubikkilizya amulimo wesu wakukambauka, mbolubelesyegwa lubono lusangwa, alimwi amakani aakusala baalumi beelela kuti bapegwe mikuli.

 Kabunga Keendelezya katobela cikozyanyo ca “baapostolo alimwi abaalu bamu Jerusalemu” bamumwaanda wamyaka wakusaanguna, ibakali kusala mumakani aayandika kapati aakali kujatikizya mbungano ya Banakristo yoonse. (Milimo 15:2) Mbubwenya mbuli baalumi basyomeka aabo, bamu Kabunga Keendelezya tabali basololi bambunga yesu. Batobela busolozi bwamu Bbaibbele, kabazyi kuti Jehova Leza wakasala Jesu Kristo kuba Silutwe wambungano.​—1 Bakorinto 11:3; Baefeso 5:23.

 Ibali mu Kabunga Keendelezya mbaa Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, and Jeffrey Winder. Babelekela kumaofesi eesu mapati ku Warwick, New York, U.S.A.

 Bamu Kabunga Keendelezya bakapanga makkomiti aali cisambomwe aalanganya milimo iisiyene-siyene, alimwi aumwi ulalanganya kkomiti yomwe naa kwiinda waawo.

•   Kkomiti Yabeendelezi: Ilanganya makani aamilawo alimwi amakani aantenda, makani aajatikizya kupenzyegwa kwa Bakamboni ba Jehova akaambo kanzyobasyoma mumakani aajatikizya bukombi, alimwi amakani aacibukilambuta aajatikizya Bakamboni ba Jehova.

•   Kkomiti Iilanganya Babelesi: Ilanganya nzyobayandika bamukwasyi wa Bbeteli.

•   Kkomiti Iilanganya Zimwaigwa: Ilanganya mulimo wakusimba akutumizya mabbuku aamba zyamu Bbaibbele alimwi akuyaka masena aakukombela, maofesi aabasanduluzi, alimwi amitabi.

•   Kkomiti Yamulimo: Ilanganya mulimo wesu wakukambauka “makani mabotu aa Bwami.”​​—Matayo 24:14.

•   Kkomiti Iilanganya Ziyiisyigwa: Ilanganya malailile aambocibambwa cakulya cakumuuya cipegwa kwiinda mumiswaangano, zikolo, alimwi amapulogilamu aajatikizya zyakulekkooda.

•   Kkomiti Iilanganya Zilembwa: Ilanganya malailile aambocibambwa cakulya cakumuuya icipegwa kwiinda mumabbuku aasimbidwe alimwi azili awebbusaiti yesu alimwi njiilanganya amulimo wakusandulula.

 Kuyungizya amulimo ngobacita kwiinda mumakkomiti aaya, bamu Kabunga Keendelezya balaswaangana nsondo ansondo kulanga-langa ziyandika mumbunga. Mumiswaangano eeyi, bamu Kabunga Keendelezya balabandika ncaamba Magwalo, alimwi batobela busolozi bwamuuya wa Leza uusalala, kutegwa bazuminane cintu comwe.​—Milimo 15:25.

 Aaba Mbanakristo basyomeka ibagwasyilizya makkomiti aa Kabunga Keendelezya. (1 Bakorinto 4:2) Balijisi busongo alimwi aluzyibo mumilimo iilanganizyigwa akkomiti mobabelekela, alimwi abalo balajanika mumiswaangano njobacita nsondo ansondo bamu Kabunga Keendelezya. Nokuba kuti inga tabatoli lubazu mukusala zintu, basikugwasilizya balapa lulayo lugwasya alimwi amakani aamwi ngobazyi, kubelesya nzyobasala bamumakkomiti, alimwi akubona zyeezyo zyasalwa mbozigwasya. Alimwi balakonzya akupegwa mulimo wakuswaya bakwesu mumasena aaindene-indene munyika yoonse naa kupegwa makani lyamiswaangano yaamwaka naa ciindi basicikolo nobamanizya lwiiyo lwabo lwa Cikolo ca Gileadi.