Mazubaano mumanyuzi muzwide twaambo twaambuulwa abantu tutali kabotu, kusalulana, kulwana ankondo.

•   “Aa-lntaneti kuzwide makani aakuzondana akaambo kankondo iilikuchitika ku-lsrael aku-Gaza alubo akaambo kabantu balikubusya musindo.”—The New York Times, November 15, 2023.

•   “Kuzwa mu7 October, kulikuboneka kuti munyika mwazula bantu bazondana abaamba majwi mabi akaambo kakusaalulana.”—Akaambwa aa-Dennis Francis, president wa-United Nations General Assembly, November 3, 2023.

 Kuzondana, kulwana ankondo nzintu zikkala kazichitika. Bbayibbili lyaambuula atala abantu “bagamika majwi aabo mabi mbuli mivwi” abayandisya zyankondo akulwana. (Intembauzyo 64:3; 120:7; 140:1) Nkinkaako, Bbayibbili litondeezya kuti kuzondana nkutulikubona mazubaano kulinchikwaamba.

 Bbayibbili liyubununa twaambo tubili tutondeezya kuti nkamboonzi nikuli kuzondana mazubaano.

1.  1. Lyakaambilizya atala achiindi “luyando lwabantu biingi [niluzootontola].” (Mateyo 24:12) Muchiindi chakuti bantu batondeezyanie luyando, babutondeezyania buntu bupa kuti bazondane.—2 Timoti 3:1-5.

2.  2. Saatani Dyabbulosi nguwe uulikupa kuti bantu bazondane mazubaano. Bbayibbili lyaamba kuti “nyika yoonse ilikweendelezegwa aamubi.”—1 Johane 5:19; Chiyubunuzyo 12:9, 12.

 Nikuba oobo, Bbayibbili lyaamba kuti lino-lino Leza uyoogwisya chintu chipa kuti bantu batamvwanani. Kwiinda aali zeezi, uyoogwisya mapenzi woonse akeetwa akaambo kakuzondana. Bbayibbili lisyomezya kuti:

•   Leza “uzoosinda misozi yoonse kumeso aabo, alubo lufu taluchizoobi lubo pe, nikuba koomoka nikuba kulila nikuba kuchisa, takuchizoobi lubo pe. Zintu zyachiindi zyamana.”—Chiyubunuzyo 21:4.