Ndakazyalilwa kuAcul, kadolopo kaniini kali muGuatemala. Mumpuli yesu tuli ma-Ixil bamusyobo wachiMaya. Ndilakonzya kwaambuula chiSpanish pesi ndakakomena kandaambuula mulaka wesu. Ndakakomena chiindi nikwakali nkondo yakatola minyaka ili 36 muchisi chesu. Muchiindi eechi bantu bachi-Ixil biingi bakafwa.

Nindakali aaminyaka iili 4 mukulanaangu wakali aaminyaka iili 7 wakali kusaanisya bbomba mpawo lyakadubuka. Eezi nzizyo zyakandoofwaazya. Zilawusisya kuti mukulanaangu wakafwa mpawaawo. Kuzwa waawo ndakazookkala kubusena bwabantu bataboni mudolopo lyaGuatemala nkundakakwiiya kubala kandibelesya mabbuku aabantu bataboni (Braille). Tandizi pe kuti nkamboonzi bayiisi bangu nibakali kundikasya kuti ndaambuule aabamwi, eezi zyakapa kuti bamwi bana bachikolo banditantamuke. Ndakali kukkala kandilendeledwe alubo ndakali kulombozya kuti tufwambaane kujala ndibweede kung’anda ndikakkale abaama bakali aandaba andime. Zilawusisya kuti baama bakafwa nindakali aaminyaka iili 10. Ndakakataazikana loko nindakabona kuti muntu wakali kundiyanda kwiinda bantu boonse bali munyika wafwa.

Nindakali aaminyaka iili 11, ndakabweeda kulindiswe nkundakakukkala amukulana wangu kumandeende ampuli yakwe. Bakali kundipa zintu zyakumubili pesi taakwe wakali kunditondeezya pe kuti ulandibikkila maanu. Chimwi chiindi ndakali kulilila Leza kanditi: “Baama bakafwidaanzi loko? Ndakoofwalilaanzi loko?” Bantu biingi bakali kundibuzya kuti nguLeza wakali kundeetela mapenzi aaya. Ndakalibuzya kuti Leza tali kabotu pe. Ndakakachilwa kulijeya nkaambo tandiboni pe.

Kutabona kwakapa kuti ndikachilwe kulikwabilila. Kandichili muniini ndakali kujatwa munzila iitali kabotu muli zyakoonana kwaziindi zyiingi. Taakwe ngundakali kubuzya pe nkaambo ndakali kubonaanga taakwe muntu ulaandaba andime. Bantu teebakali kuvuzya kwaambuula andime pe, ndakali kulibbizya kandili andikke. Eezi zyakali kupa kuti ndikataazikane loko alubo taakwe muntu ngundakali kusyoma pe.

Nindakali aaminyaka iili 13, ndakaswayigwa ayimwi mpuli yaBakamboni baJehova. Nibakasika kuchikolo bakajana tuli aabreak. Umwi muyiisi wakali kundeetelela akaambo kachiimo changu wakabuzya Bakamboni aaba kuti bazoondiswaye. Bakamboni aaba bakanditondeezya zisyomezyo zili muBbayibbele zitondeezya kuti bafwide bazoobuka akuti boofu bazoobona. (Isaya 35:5; Johane 5:28, 29) Ndakali kuziyanda nzibakali kundiyiisya pesi kwakali kundiyumina kwaambuulaabo nkaambo teendakajayide pe kwaambuula abantu. Nikuba kuti teendakaangunukide pe kwaambuulaabo, Bakamboni aaba bakali aluzyalo amoyo mulamfu teebakaleka pe kundiswaya kuti bandiyiisye Bbayibbele. Mpuli eeyi yakali kweenda makkilomita aali 10 kabayinda muchilundu kuti bazoosike nkundakali kukkala.

Mukulana wangu wakandibuzya kuti Bakamboni aaba bakali kuzwaata kabotu pesi teebakanotede pe. Bantu aaba bakali kutondeezya kuti balandiyanda nkaambo bakali kundeetela zipo. Ndakabona kuti maKristu bakasimpe mbabo luzutu banga balachita zintu eezi.

Ndakayiya Bbayibbele kandibelesya mabbuku aabantu bataboni. Nikuba kuti ndakali kuzimvwisisisya nzindakali kwiiya pesi zimwi zyakali kundiyumina kuzisyoma. Muchikozyano, kwakali kundiyumina kusyoma kuti Leza ulandiyanda akuti ulakonzya kubelesya bantu kuti banditondeezye luyando. Ndakali ndaziziba kuti nkamboonzi Jehova nchalekelede mapenzi munyika pesi kwakali kundiyumina kusyoma kuti nguNdeende ulaaluyando. *

Zintu nzindakali kwiiya muMagwalo zyakali kuyabuchincha maboneno aangu mbichaani-mbichaani. Muchikozyano, ndakayiya kuti Leza ubafwida luzyalo bantu baswaanana aamapenzi. Naakali kwaambuula atala abakombi bakwe bakali kuswaanana amapenzi Leza wakaamba kuti: “Ndaabona mapenzi aabantu bangu . . . ndilaazyi kabotu mapenzi aabo.” (Kulonga 3:7) Chiindi nindakabona buntu bwaJehova bubotu ndakalipeda kulinguwe. Mu1998 ndakabbabbatizigwa akuba umwi waBakamboni baJehova.

Nikwakayinda munyaka kandili ndabbabbatizigwa, ndakayinka kuli chimwi chikolo chaboofu chili afwiifwi adolopo lyaEscuintla. Umwi mwaalu wamumbungano yesu wakabona buyumu-yumu mbundakali kuswaana kuti ndinjile miswaangano chiindi nindakali kukkala kulindiswe. Kuti ndikakusike kumbungano yakali afwiifwi ndakeelede kubelesya nzila yiinda muchilundu yakali kwiindwa ampuli yakali kundiyiisya Bbayibbele, kwakali kundiyumina kweenda musinzo ooyu andikke. Mwaalu ooyo wakaambuula ayimwi mpuli yakuEscuintla bakalipedelede kukkala andime kuchitila kuti bandigwasye kunjila miswaangano. Ambuli sunu, ndichikkala aambabo alubo bandijata mbuli mwanaabo.

Bamumbungano bakandigwasya munzila zyiingi loko zyakatondeezya kuti balandiyanda. Nzibakandichitila zyakanditondeezya kuti Bakamboni baJehova mbabo abalikke maKristu bachoonzyo.—Johane 13:34, 35.

Tandichiliboni kanditagwasyi alubo ndakaba aabulangilizi. Ndakaziba kuti ndiponenaanzi. Mbuli uumwi waBakamboni baJehova, ndibikkila maanu kukuyiisya bamwi kasimpe kamuBbayibbele kanditalangi bulema bwangu. Ndili aachilongezyo chakuba mwaalu alubo ngandapa nkani kumbungano zisiyene-siyene. Alubo ngandajana chilongezyo chakupa nkani kumiswaangano yabbooma iinga ilaabantu biingi loko.

Mu2010 ndakagilajuweta kuchikolo mazubaano chiitwa kuti Chikolo chaBakambawusi baBwaami chakachitilwa kuEl Salvador. Chikolo eechi chakandigwasya kuti ndiichite kabotu milimu yangu mumbungano. Alubo chakandigwasya kubona kuti Jehova Leza ulandiyanda alubo ndakabona kuti ulakonzya kupa kuti muntu woonse achite mulimu wakwe.

Jesu wakati: “Kupa kulakkomanisya kapati kwiinda kupegwa.” (Milimo 20:35) Ndilikubotelwa loko nikuba kuti chiindi ndakali kubonaanga tandikozoofwa ndabotelwa pe, lino ndilakonzya kugwasya bamwi.