Taakwe kaambo pe keelede kupa kuti tuyeeyele kuti basikwiiya bali 70 bakali bamukaka Jesu akaambo kakuti naakachita Chilalilo chaMwaami chaGoko teebakaliwo pe. Jesu wakali kuyanda kuchita chilalilo eechi kalaamwi abaapostoli bakwe.

Bali 12 abali 70, boonse bakali kutambulika kuli Jesu. Jesu wakasaanguna kusala baalumi bali 12 aakati kabasikwiiya biingi, mpawo wakabayita kuti mbaapostoli. (Lk. 6:​12-16) Wakali muGalili naakayita “bali Kkumi Ababili” mpawo “wakabatuma kuti bakakambawuke atala aBwaami bwaLeza akuti bakaponie.” (Lk. 9:​1-6) Kuzwa waawo, naakali muJudiya, Jesu “wakasala bamwi bali 70 mpawo wakabatuma kabali babili-babili.” (Lk. 9:51; 10:1) Jesu wakali aabasikumutobela biingi mundawu zisiyene-siyene bakali kukambawuka atala anguwe.

MaJuda bakazooba basikwiiya baJesu bakachili kusekelela Pobwe lya Zinkwa Zitajisi Bumena munyaka amunyaka, kuyeeyelwa kuti bakali kuzichita eezi kabalaamwi ampuli zyabo. (Kul. 12:​6-11, 17-20) Kali waba aafwiifwi kufwa, Jesu abaapostoli bakwe bakayinka kuJerusalema. Pesi taakabayita pe boonse basikwiiya bakwe bakali muJudiya, Galili aPeriya kuti bazoochite Pobwe lyaPasika kabalaamwi. Zilaantanganana kuti Jesu wakali kuyanda kuba aabaapostoli bakwe kupobwe eeli. Wakabuzya baapostoli bakwe kuti: “Ndali aachiyandisyo chipati chakuti ndiyilye aandinywe Pasika kanditanapenzegwa.”—Lk. 22:15.

Kuli kaambo kakapa kuti Jesu achite oobo. Jesu wakali waba aafwiifwi kuti afwe kali “Mwanaambelele waLeza, uugwisya chibi chanyika.” (Joh. 1:29) Jesu wakeelede kufwida kuJerusalema, nkaambo nkuko nkubakali kupeda zipayizyo kuli Leza bakombi bakwe chiindi. Lufu lwaJesu lwakali kwaangununa bantu munzila iisumpukide loko kwiinda zyakali kuchitwa chiindi ma-Israyeli nibakali kulya mwanaambelele wakapayizigwa mansiku nibakali Kulonga kuzwa mu-Ijipita. (1 Kor. 5:​7, 8) Nkinkaako, kufwa kwaJesu kwakapa kuti baapostoli bali 12 babe ntalisyo yambungano yachiKkristu. (Ef. 2:​20-22) Muunzi uusalala Jerusalema uli “aamabwe aantalisyo aali 12” aalembedwe “mazina aali 12 aabaapostoli bali 12 baMwanaambelele.” (Chi. 21:​10-14) Nichoonzyo kuti baapostoli bakali aamulimu mupati loko mukuzuzikizigwa kwamakanze aaLeza. Eezi nzizyo zipa kuti tumvwisisisye kuti nkamboonzi Jesu naakali kuyanda kuba aambabo naakali kuchita Pobwe lyaPasika lyamamanino lyakazooyitwa kuti Chilalilo chaMwaami chaGoko.

Basikwiiya bali 70 abamwi, teebakaliwo pe chiindi Jesu naakachita Chilalilo chaMwaami chaGoko. Pesi basikwiiya boonse basyomeka, bakali kukonzya kugwasigwa achilalilo eechi. Boonse bakazooba maKkristu bananikidwe bakali kutola lubazu muchizuminano chabwaami Jesu nchaakabuzya baapostoli bakwe mubusiku oobo.—Lk. 22:​29, 30.