Kujana Wachita Biyeni Kuti Kubala Bbayibbele Kukugwasye Akuti Kukunoneezye?

LIZYA

JOSHUWA wakapedwe mulimu muyumu. Wakeelede kuzulwida maIsrayeli kuti bakasike kuNyika Yachisyomezyo pesi wakali kuyooswaana buyumu-yumu. Jehova wakasimya Joshuwa akumusungwaazya kati: ‘Koyuma akuba sichamba. Akubikkila maanu kutobela Mulawu. Weelede kuubala sikati amansiku, kuti ubikkile maanu kutobela makani oonse aalembedwe mulinguwo.’—Jos. 1:7, 8, NW.

‘Muziindi eezi zikataazya,’ tuswaana buyumu-yumu busiyene-siyene. (2 Tim. 3:1) Kuti tuzwidilile mbuuli Joshuwa, andiswe tweelede kutobelezya malayilile Jehova ngaakamupa. Kubala Bbayibbele chiindi choonse akubelesya nzitubala kuyootugwasya kuti tuzunde masunko ngituswaana.

Nikuba boobo, kulakonzeka kuti kulatukachila kubala Bbayibbele kuti tumvwisisisye. Pesi kubala Bbayibbele kulayandikana. Langa bbokesi liti “ Yezya Nzila Eezi,” kuti ujane twaambo tupa kuti kubala Bbayibbele kukugwasye akuti kukunoneezye.

Sintembawuzyo wakayimba kuti: “Undeenzye mumugwagwa wamalailile aako, nkaambo ngonguwo uundibotezya.” (Int. 119:35) Kubala Jwi lyaLeza kulakonzya kukunoneezya. Ulakonzya kujana twaambo tuyandikana kuti wayanduulisisya.

Nikuba kuti tawupedwe mulimu wakuzulwida chisi mbuuli Joshuwa pesi kuli buyumu-yumu mbuswaana. Mbuuli Joshuwa, kubala Bbayibbele akutobelezya makani aalembedwe kuyookugwasya. Kuchita oobo kupa kuti uzwidilile akuti usale chabusongo.

YEZYA NZILA EEZI

Komba kutanabala. Bbayibbele lili amizeezo yaLeza singuzuzyoonse njaakalemba kuti ikugwasye. Chiindi nulikubala Bbayibbele, kumbila Leza kuti akugwasye kumvwisisisya nzulikubala, utazilubi akuti uzibelesye mubuumi.—Ezr. 7:10.
Libuzye mibuzyo chiindi nulikubala Bbayibbele naakuti mabbuku aapandulula Bbayibbele. Libuzye kuti: ‘Makani aaya andiyiisyaanzi atala aJehova? Ayendelana biyeni amutwe wamakani?Kujana ndaabelesya biyeni kuti ndigwasye bamwi?’
Yeeyesesya atala nzulikubala. Yimikila kubala, uyeeyesesye mpawo ulibuzye kuti: ‘Makani aaya apa kuti ndilimvwe biyeni? Nkamboonzi naapa kuti ndilimvwe oobu? Ayendelana biyeni azintu zyakandichitikila chiindi, lino aziyoondichitikila kunembo? Kujana ndaabelesya biyeni malayilile aaya alulayo oolu mubuumi bwangu?’ (Job. 23:5; Int. 49:3) Bona kuti ulakonzya na kupandulula kuti nkamboonzi Jehova nasungwaazya bantu kuti batantamuke imwi michito naakuti kubona mpindu nzyakonzya kujana muntu kuti waleka kuswiilila malayilile aLeza.—Dt. 32:28, 29.
Zibone kazilikuchitika zintu nzulikubala muBbayibbele. Muchikozyano, ulakonzya na kubabona mumizeezo bakulana baJosefa kabalikumuuzya kumaIsmayeli? (Matl. 37:18-28) Niinzi nzulikubona, kumvwa akununkizya? Libikke muchiimo chabantu balikwaambwa. Balikuyeeyaanzi alubo balikulimvwa biyeni? Kuchita oobo kuyoopa kuti kubala Bbayibbele kukunoneezye akuti kukugwasye.
Belesya zibelesyo zyakapupululwa ambunga zikugwasya kuti uyanduulisisye. Belesya mabbuku azimwi zijanika aIntaneti zili mumulaka ngumvwisisisya. Utabi abweeme kukumbila bamwi kuti bakunaanizye mbuzibelesegwa. Muchikozyano, Watch Tower Publications Index aResearch Guide for Jehovah’s Witnesses zilakugwasya kuti ujane bupanduluzi bwatwaambo tusiyene-siyene abwamavesi amwi amuBbayibbele. Belesya makani aakuyungizya aali muBbayibbele lyaNew World Translation of the Holy Scriptures lili mumulaka ngumvwisisisya. Makani aaya apandulula zya-geography (masena amamepu), mbuzyakachitika zintu, bulemu azipimyo kuswaanizya azimwi.
Yeeya twaambo tupati ntwaajana mumakani ngwaalikubala. Buzya bamwi nzwaabala. Ntuutuli twaambo ntukonzya kubelesya mumulimu wakukambawuka? Kuchita oobo kupa kuti utazilubi nzwaabala akuti uzibelesye kugwasya bamwi.