BBALA lyachiGrikki lyakasandululwa kuti “ngolo” kweendelana ambulibelesedwe muBusanduluzi Bwanyika Mpya BwaMagwalo AachiKkristu AachiGrikki lilakonzya kwaamba ngolo zisiyene-siyene. (Mil. 8:​28, 29, 38) Pesi kubonekaanga mwaalumi waku-Itopiya wakagadide ngolo mpati kwiinda ngolo zyakali kubelesegwa munkondo naakuti mumuzundaano. Atubone tumwi twaambo tupa kuti twaambe oobo.

Mwaalumi waku-Itopiya wakali aachuuno mubweendelezi alubo wakali weenda musinzo mulamfu. Wakali “aachuuno chipati mubweendelezi bwaKkandesi, mwaami wachanakazi waku-Itopiya. Zintu zyoonse zyamung’anda yamwaami ooyo wachanakazi, zyakali mumaboko aakwe.” (Mil. 8:27) Nyika ya-Itopiya yachiindi, mazubaano iswaanizya Sudan a-Egypt nkwiili kumusaanza. Kulakonzeka kuti mwaalumi ooyo taakabelesya ngolo iimwi mulweendo lwakwe loonse, pesi kweelede kuti wakali aazintu zyiingi nzyakanyampwide mulweendo lwakwe. Zimwi ngolo zyakali kubelesegwa mumwaanda wamunyaka wakusaanguna kuti zinyampule bantu, zyakali aamavili aali 4. Limwi bbuku lipandulula bbuku lyaMilimu lyakaamba kuti, “Ngolo zili boobu zyakali aandawu mpati yakubikkila zibbudu azimwi zintu alubo, zyakali kupa kuti lweendo lutachisi akupa kuti bantu bakonzye kweenda musinzo mulamfu.”

Mwaalumi waku-Itopiya wakali kubala chiindi Filipi naakasika kulinguwe. Bbayibbili lyaamba kuti: “Filipi wakachijaana kalikumbali aangolo eeyo alubo wakamumvwa kalikububalila aajulu bupolofita bwa-Isaya.” (Mil. 8:30) Ngolo zyakweendaazyo mulweendo teezyakapangilwa kuti kazichijaana loko. Kweenda mbichaani-mbichaani nkuyakali kuchita ngolo eeyi kwakapa kuti mwaalumi ooyu akonzye kubala akuti Filipi akonzye kuchijaana aamawulu kusikila amweenzye.

Mwaalumi waku-Itopiya “wakakumbila Filipi kuti anjile akkale aanguwe.” (Mil. 8:31) Kaansinga baalumi aaba bakali aangolo yakapangilwa kuti ibelesegwe mumuzundaano, bayinooyenda kabayimvwi. Pesi mungolo yakapangilwa lweendo, mwakali ndawu yakuti mwaalumi waku-Itopiya aFilipi bakkale.

Kweendelana anzilwaamba lugwalo lwaMilimu chaandaano 8 azili mumakani aachiindi, mabbuku eesu mazubaano aabutondeezya zifanikisyo zyamwaalumi waku-Itopiya kali mungolo mpati kwiinda ngolo yamunkondo naakuti yamumuzundaano.