Bbayibbili Lilatugwasya Kuti Tuzibe Chibotu Achibi
Langa nzila zili 4 bantu biingi mbubakagwasigwa kwiinda mukuswiilila malayilile aamuBbayibbili.
1. Lukwatano
Bantu biingi balaamaboneno aasiyene-siyene atala alukwatano akuti niinzi chipa kuti babotelwe mulukwatano.
BBAYIBBILI LYAAMBA KUTI: “Umwi awumwi wanu weelede kuyanda mwanakazi wakwe mbuli mbaliyanda, anguwe mwanakazi weelede kumulemeka loko mulumaakwe.”—Ba-efeso 5:33.
EEZI ZYAAMBA KUTI: Leza nguwe wakasaanguna mabambe aalukwatano, nkinkaako ulizi zintu zikonzya kupa kuti bantu bakwetene babotelwe. (Makko 10:6-9) Bantu bakwetene balakonzya kubotelwa kuti babikkila maanu kuzintu ziyandwa aawumwi-awumwi. Mwaalumi utondeezya kuti ulamuyanda mwanakazi wakwe kwiinda mukumusanina akumujata munzila iilikabotu. Alubo mwanakazi utondeezya kuti ulamulemeka mulumaakwe kwiinda munzila njaambuulaayo amuzintu nzyachita.
MALAYILILE AAMUBBAYIBBILI ALAGWASYA: Quang a-Thi, bazwa ku-Vietnam, bakali kubonaanga tabazoobotelwi pe mulukwatano lwabo. Chiindi chiingi Quang taakali kumujata kabotu pe mwanakazi wakwe. Waamba kuti: “Teendakalikwe ndaba pe atala ambaakali kulimvwa Thi alubo ndakali kukkala kandilikumusampawula.” Thi wakali kuyanda kuti balekane. Waamba kuti: “Teendakachili kumusyoma akumulemeka mulumaangu.”
Mukuya kwachiindi, Quang a-Thi bakayiya Bbayibbili ambubakonzya kubelesya malayilile aajanika muli Ba-efeso 5:33 mulukwatano lwabo. Quang waamba kuti: “Lugwalo oolu lwakandigwasya kuti ndibe muntu ulaaluzyalo alubo akumutondeezya kuti ndilamuyanda Thi, kwiinda muzintu nzindichita akumusanina kabotu, kuchita oobo kupa kuti andiyande akuti andilemeke.” Alubo Thi waamba kuti: “Kwiinkilila kunembo kandibelesya malayilile aajanika muli Ba-efeso 5:33 akutondeezya kuti ndilamulemeka mulumaangu kwakapa kuti ndilimvwe kandiyandikana, kandikwabililidwe alubo kandili aaluumuno.”
Kuti ujane aamwi makani alaatala alukwatano, bala Amubuke! No. 2 2018, ilaamutwe utii “Nsiswa Zili 12 Zipa Kuti Mpuli Zizwidilile” iijanika aa-jw.org.
2. Mbutweelede Kubajata Bamwi
Chimwi chiindi bantu tababajati kabotu pe bamwi akaambo kamusyobo wabo, nkubazwa, mbubaboneka naakuti chikombelo nchibanjila.
BBAYIBBILI LYAAMBA KUTI: “Amubalemeke bantu bamisyobo yoonse.”—1 Petro 2:17.
EEZI ZYAAMBA KUTI: Bbayibbili lyaamba kuti tatweelede kuzonda bantu bayimwi misyobo, baalumi naakuti banakazi boonana chabo-chabo abantu bazwa kulizimwi nyika. Pesi litusungwaazya kulemeka bantu boonse kazitakwe ndaba kuti bazwa kuli, balinotede naakuti pe. (Milimu 10:34) Nikuba kuti chimwi chiindi tatuzuminani anzibasyoma naakuti nzibachita pesi tweelede kubatondeezya luzyalo akubalemeka.—Mateyo 7:12.
MALAYILILE AAMUBBAYIBBILI ALAGWASYA: Daniel wakayiisigwa kuti bantu bazwa ku-Asia mbaasinkondonyina. Wakasaanguna kuzonda muntu woonse wakali kuzwa ku-Asia alubo wakali kukkala kabatukila kunembo lyabantu. Daniel waamba kuti: “Ndakali kubonaanga nzindakali kuchita ‘nkulwanina nyika yangu’ teendakali kuzibona pe kuti nzindakali kuchita zyakali zibi.”
Mukuya kwachiindi Daniel wakayiya Bbayibbili. Waamba kuti: “Ndakeelede kuchincha maboneno aangu akuti ndakeelede kubona bantu mbuli mbababona Leza, toonse tulafanana kazitakwe ndaba kuti tuzwa kuli.” Daniel kali kupandulula mbalimvwa lino chiindi naswaana bantu. Waamba kuti: “Lino tandichibikkili maanu pe kuti muntu uzwa kuli, ndiyanda bantu bamisyobo yoonse alubo lino ndaba abeenzuma bazwa munyika yoonse.”
Kuti ujane aamwi makani, bala Amubuke! No. 3 2020, ilaamutwe utii “Kusaluula Kuzoomana Na?” iijanika aa-jw.org.
3. Mali
Bantu biingi bayanduula bunoti kuti babotelwe akuti babe aalyajuunza lili kabotu.
BBAYIBBILI LYAAMBA KUTI: “Busongo bulakwabilila mbubonya mbuli mali mbwaakwabilila, pele bubotu bwaluzyibo mbwakuti: busongo bupa kuti ooyo uubujisi azumanane kupona.”—Mukambausi 7:12.
EEZI ZYAAMBA KUTI: Mali ilayandikana pesi tayipi kuti tubotelwe naakuti tube aalyajuunza lilikabotu. (Tusimpi 18:11; 23:4, 5) Pesi kubotelwa kwachoonzyo alyajuunza lilikabotu kuzwa mukutobelezya malayilile aabusongo aazwa kuli Leza aajanika muBbayibbili.—1 Timoti 6:17-19.
MALAYILILE AMUBBAYIBBILI ALAGWASYA: Cardo mwaalumi uzwa ku-Indonesia, wakali kubikkila maanu kapati kukuyanduula bunoti. Waamba kuti: “Ndakali aazintu zyiingi bantu nzibalombozya, ndakali kwiinka kufumbwa nkundiyanda alubo ndakali kuula maanda, moota azintu zidula loko.” Pesi bunoti oobu bwakamana. Cardo wakazoowamba kuti: “Ndakabbidwa alubo mali yoonse njindakabeleka changuzu kuti ndiyijane kwaminyaka myiingi, yakamana mukulaba kwaliso, ndakatyompwa akaambo kakuti ndakasyaala kanditachikwe chintu alubo ndakalimvwa kanditachigwasyi.”
Cardo wakasaanguna kubelesya malayilile aazwa muBbayibbili aali atala amali. Lino, tachibikkili maanu kukuyanduula bunoti pesi wakasala kupona buumi buuba. Cardo wakati: “Bunoti bwachoonzyo butamani buzwa mukuba aabweenzuma bulikabotu aJehova, lino ndikoona ng’onzi ndono alubo ndilikubotelwa chachoonzyo.”
Kuti ujane amwi makani alaatala nzilyaamba Bbayibbili atala amali, bala chiiyo chiti “Lwiiyo Lwaajulu Amali Zipa Kuti Tuzoopone Buumi Bulikabotu Na Kunembo?” chili mu-Ngaziyakulinda No. 3 2021, iijanika aa-jw.org.
4. Koonana
Bantu biingi bali aamaboneno aasiyene-siyene atala amakani akoonana.
BBAYIBBILI LYAAMBA KUTI: ‘Amutantamuke bwaamu. Umwi awumwi wanu weelede kuziba mbayelede kweendelezya mubili wakwe mukusalala amubulemu, kutali kwiinda mukutangala, mukuba aachiyandisyo chitanyoneki mulizyakoonana mbuli mbubachita bantu bazisi batazi Leza.’—1 Batesalonikka 4:3-5.
EEZI ZYAAMBA KUTI: Bbayibbili lyaamba kuti tweelede kulinyona munkani zyakoonana. Bbala liti “bwaamu” liswaanizya bumambe, buwuule, koonana kwabantu batakwetene, koonana kwabantu bakozyenie zizo akoonana kwabantu abanyama. (1 Bakkorinte 6:9, 10) Koonana chipo chizwa kuli Leza nchaakapa mwaalumi amwanakazi bakwetene.—Tusimpi 5:18, 19.
MALAYILILE AAMUBBAYIBBILI ALAGWASYA: Umwi mwanakazi uutegwa Kylie waku-Australia wakaamba kuti: “Kanditanakwatwa ndakali kuyeeya kuti, kuti ndoonana aamuntu ndilalimvwa kandiyandikana alubo tandikooyeeya kuti luyando lwesu lulamana. Pesi zintu teezyakachitika mbuli mbundakali kuyeeyela pe. Ndakalimvwa kanditakwabililidwe alubo moyo wakandichisa loko.”
Mukuya kwachiindi, Kylie wakazooyiya akubelesya nzilyaamba Bbayibbili atala azyakoonana. Wakati: “Ndakabona kuti malayilile aazwa muBbayibbili alatukwabilila kuti tutanjili mumapenzi, lino ndaabulimvwa kandikwabililidwe alubo kandiyandikana akaambo kakuti ndilikuchita zintu mbuli mbayanda Jehova. Kubelesya malayilile aazwa muBbayibbili kwakandigwasya kuti nditachiti zintu zikonzya kupa kuti ndichiswe moyo!”
Kuti ujane amwi makani, bala chiiyo chiti, “Ino Bbaibbele Lyaamba Nzi Kujatikizya Kukkala Antoomwe Amuntu Ngomutakwetene Limwi?” chijanika aa-jw.org.
Mulengi wesu utugwasya kuti tusiyanisye chibotu achibi. Nikuba kuti chimwi chiindi takuli kuuba pe kutobelezya malayilile aakwe pesi kuchita oobo kulagwasya. Tulakonzya kubaachoonzyo chakuti kutobelezya malayilile aaLeza kupa kuti tubotelwe chiindi choonse.
