KUKONKHOSKA MAVESI NGA MU BAYIBOLU

Mariko 1:15—“Ufumu Waku Chiuta we Pafupi”

JULANI

“Nyengu yakuŵikika yakwana, ndipu Ufumu waku Chiuta we pafupi. Lapani, ndipu jani ndi chivwanu mu uthenga wamampha.”—Mariko 1:15, Bayibolu la Charu Chifya.

“Nyengu yakwana, ndipu Ufumu waku Chiuta we pafupi. Lapani, ndipu jani ndi chivwanu mu uthenga wamampha.”—Mariko 1:15, English Standard Version.

Vo Lemba la Mariko 1:15 Ling’anamuwa

Yesu Khristu wangukamba kuti Ufumu waku Chiuta a “we pafupi” chifukwa pa nyengu yo, Fumu yamunthazi ya Ufumu wenuwu ndipu yilipu kali.

Yesu wachikamba mazu ngenanga, wang’anamuwanga kuti Ufumu wo Wayamba kali cha kulamuliya. Ndipu vo iyu wangukambiya akusambira ŵaki pavuli paki, vingulongo kuti Ufumu wo uzengi munthazi. (Machitidu 1:6, 7) Kweni iyu wanguza pa nyengu yaki chayiyu pamwenga kuti mu chaka chayichu cho Bayibolu lingukambiya limu kuti iyu wazamuwoneke nge Fumu yamunthazi. b Mwaviyo penga pakuvwika kuti Yesu wakambi kuti: “Nyengu yakuŵikika yakwana,” Kung’anamuwa kuti nyengu yakuti iyu wayambi uteŵeti waki wakupharazga Ufumu yakwana.—Luka 4:16-21, 43.

Kuti ŵanthu ayanduwi ndi uthenga wamampha wa Ufumu, akhumbikanga kulapa, kung’anamuwa kuti akhumbikanga kujivwiya lisungu chifukwa cha maubudi ngo achitanga ndi kungaleka kweniso kuja mwakukoliyana ndi fundu zaku Chiuta. Wo angulapa angulongo kuti ŵe ndi chivwanu mu uthenga wamampha kweniso mwa Fumu yamunthazi.

Nkhani ya pa Mariko 1:15

Yesu wangukamba mazu ngenanga kukwamba kwa uteŵeti waki ku Galileya. Lemba la Mateyu 4:17 lo ndakuyanana nalu likamba kuti: “Kutuliya pa nyengu yeniyo,” Yesu wapharazganga vakukwaskana ndi Ufumu waku Chiuta. Ufumu ndiwu wenga fundu yikulu pa uteŵeti waki. Kweniso mazu ngakuti Ufumu ngazumbulika maulendu ngakujumpha 100 m’mabuku nganayi nga Uthenga Wamampha, c ndipu mumalu nganandi ngangukambika ndi Yesu. Mu Bayibolu, Yesu wangukamba ukongwa vakukwaskana ndi Ufumu waku Chiuta kuluska nkhani yinyaki yeyosi.

Ŵerengani Mariko chaputala 1 limoza ndi mazu ngamumphata, kweniso malemba nganyaki ngo ngakoliyana ndi nkhani yeniyi, vithuzi ndipuso mapu.

a Ufumu kwaku Chiuta ndi boma la kuchanya lo Chiuta wakulijalikiska kuti lizifiski Khumbu laki lakukwaskana ndi charu chapasi. (Daniyeli 2:44; Mateyu 6:10) Kuti muziŵi vinandi, wonani nkhani ya mutu wakuti “Kumbi Ufumu waku Chiuta Ntchinthu Wuli?”

b Yesu wangwenere kuja fumu kuti wafiski udindu waki nge Mesiya wakulayizgika yo wamiya Chiuta. Kuti muziŵi vinandi vakukwaskana ndi mauchimi nga mu Bayibolu ngo ngalongo kuti Yesu ndi Mesiya, wonani pamutu wakuti: “Kumbi Mauchimi Ngasimikizgiya Kuti Yesu Wenga Nadi Mesiya?”

c Mabuku nganayi ngakwamba mu Malemba nga Chigiriki Ngachikhristu ngo kanandi ngadanika kuti Chipanganu Chasonu, ndingu ngadanika kuti Uthenga wamampha. Mabuku ngenanga ndingu ngakonkhoska umoyu waku Yesu ndi uteŵeti waki.