Mungamuziŵa Chiuta asani musambira vakukwaskana ndi iyu ndi kuchitapu kanthu kuti mumukondwesi. Asani mwachita viyo, Chiuta “wanderengi kufupi ndi yimwi.” (Yakobe 4:8) Bayibolu lititisimikiziya kuti iyu “we kutali cha ndi weyosi waku isi.”—Machitidu 17:27.

•  Vo mungachita kuti mumuziŵi Chiuta

•  Fundu zaboza zakukwaskana ndi kuziŵa Chiuta

 Muŵerengengi Bayibolu

•  Vo Bayibolu likamba: “Malemba ngosi ngakukambirika ndi Chiuta.”—2 Timote 3:16.

•  Vo ling’anamuwa: Chiuta ndiyu wakulemba Bayibolu. Iyu waŵikanga mumaŵanaŵanu nga ŵanthu wo alembanga Bayibolu vinthu vo wakhumbanga kuti alembi. Kuziya mu buku laki lapade lenili, Chiuta wativumbuliya vinthu vo wakhumba kutichitiya. Kweniso wativumbuliya mijalidu yaki inandi kusazgapu, chanju, urunji kweniso lisungu.—Ekisodo 34:6; Dotoronome 32:4.

•  Vo mungachita: Muŵerengengi Bayibolu zuŵa lelosi. (Yoswa 1:8) Muŵanaŵaniyengepu pa vo mwaŵerenga ndipu mujifumbengi kuti: ‘Kumbi venivi vitindisambizanji vakukwaskana ndi mo Chiuta waliri?’—Masalimo 77:12.

   Mwakuyeruzgiyapu, ŵerengani Yeremiya 29: 11, ndipu pavuli paki jifumbeni kuti: ‘Kumbi Chiuta watindikhumbiyanji, chimangu pamwenga soka? Kumbi ndi Chiuta yo wawezi vinthu viheni pamwenga watindikhumbiya vinthu vamampha kunthazi?’

 Muzukumengi ndi chilengedu

•  Vo Bayibolu likamba: “Mijalidu [yaku Chiuta] yambula kuwoneka, yiwoneke umampha mu vinthu vo iyu wa kulenga.”—Aroma 1:20.

•  Vo ling’anamuwa: Vinthu vo Chiuta wakulenga vilongo mijalidu yo iyu wenayu, nge mo viŵiya kuti chithuzi chivumbuwa vinandi vakukwaskana ndi munthu yo wachijambula pamwenga njinga yivumbuwa vinandi vakukwaskana ndi munthu yo wakuyipanga. Mwakuyeruzgiyapu, mo wongu wa munthu ukupangikiya kweniso ukulu waki, uvumbuwa zeru zaku Chiuta. Kweniso nthazi yikulu ya lumwi ndi nyenyezi zinyaki, vilongo nthazi zaki.—Masalimo 104:24; Yesaya 40:26.

•  Vo mungachita: Musaniyengi nyengu ya kuwone vinthu vo Chiuta wakulenga ndipu musambirengepu kanthu. Pa nyengu yo muchita venivi, mujifumbengi kuti, ‘Kumbi vinthu vo vikulengeka mwakuziziswa vo tiwona, vilongonji vakukwaskana ndi Chiuta?’ a Chinanga kuti ve viyo, chilengedu chingatisambiza vinandi cha vakukwaskana ndi Mlengi widu. Ndichu chifukwa chaki iyu wakutipaska Bayibolu.

 Mugwiriskiyengi ntchitu zina laku Chiuta

•  Vo Bayibolu likamba: “Ndimuvikiliyengi chifukwa chakuti watiliziŵa zina langu. Wandidanengi ndipu ini ndimumukengi.”—Masalimo 91:14, 15.

•  Vo linga’anamuwa: Chiuta yo zina laki ndi Yehova, wakhazaku gutu laki ku ŵanthu wo aziŵa zina laki ndi kuligwiriskiya ntchitu mwaulemu. b (Masalimo 83:18; Malaki 3:16) Chiuta watitikambiya zina laki chifukwa wakhumba kuti timuziŵi. Iyu wakamba kuti: “Ini ndini Yehova. Lenili ndilu zina langu.”—Yesaya 42:8.

•  Vo mungachita: Mugwiriskiyengi ntchitu zina laku Yehova asani mukamba zaku iyu.

 Mukambiskanengi ndi Yehova mupempheru

•  Vo Bayibolu likamba: “Yehova we pafupi ndi wosi wo atimudana.”—Masalimo 145:18.

•  Vo ling’anamuwa: Yehova wandere kufupi ndi ŵanthu wo apemphera kwaku iyu ndi chivwanu. Pempheru ntchigaŵa cha kusopa cho tilongore kuti titimutumbika ukongwa Chiuta.

•  Vo mungachita: Mupempherengi kwaku Chiuta kaŵikaŵi. (1 Atesalonika 5:17) Mumukambiyengi vinthu vo vitikufipiskani mtima kweniso mo muvwiya.—Masalimo 62:8. c

 Jani ndi chivwanu mwaku Chiuta

•  Vo Bayibolu likamba: “Kwambula chivwanu vingachitika cha kukondwesa Chiuta.”—Aheberi 11:6.

•  Vo ling’anamuwa: Kuti tije pa ubwezi ndi Chiuta, tikhumbika kuja ndi chivwanu mwaku iyu. Mu Bayibolu, mazu ngakuti kuja ndi chivwanu, ngang’anamuwa vinandi kuluska waka kugomezga kuti Chiuta waliku. Kuja ndi chivwanu kung’anamuwa so kumuthemba ndi mtima wosi, kusazgapu kugomezga ndi mtima wosi kuti vo wakulayizga vazamufiskika nadi kweniso kuti marangu ngaki ngazeru. Mwaviyo, kuti munthu waje pa ubwezi wamampha ndi munthu munyaki, wakhumbika kumuthemba.

•  Vo mungachita: Chivwanu chayichu chithemba pa kuziŵa vinthu. (Aroma 10:17) Mwaviyo, musambirengi Bayibolu ndipu mulongongi pakumwija kuti mungamuthemba Chiuta kweniso ulongozgi waki. Akaboni aku Yehova angakondwa kusambira namwi Bayibolu. d

 Muchitengi vinthu vo vikondwesa Chiuta

•  Vo Bayibolu likamba: “Pakuti kwanja Chiuta kung’anamuwa kusunga marangu ngaki.”—1 Yohane 5:3.

•  Vo ling’anamuwa: Yehova we pafupi ndi wosi wo alongo kuti atimuyanja, mwakuyesesa kuchita vosi vo angafiska kuti avwiyengi marangu ngaki.

•  Vo mungachita: Pa nyengu yo musambira Bayibolu, muwonengi vinthu vo Chiuta watanja kweniso vo watinkha. Mujifumbengi kuti: ‘Kumbi ndikhumbika kusintha vinthu nivi kuti ndikondwesengi Mlengi wangu?’—1 Atesalonika 4:1.

 Mugwiriskiyengi ntchitu ulongozgi waku Chiuta kuti muwonengi kuti iyu watikuphweriyani

•  Vo Bayibolu likamba: “Vo uziŵa vingakuwovya kuwona kuti [Chiuta] ngwamampha.”—Masalimo 34:8, The Bible in Basic English.

•  Vo ling’anamuwa: Chiuta watikudanani kuti mujiwone mwija mo iyu walongore kuti ngwamampha. Asani mwawona kuti Chiuta watikuyanjani kweniso kukuwovyani, mukhumbengi kundere kufupi ndi iyu.

•  Vo mungachita: Asani muŵerenga Bayibolu, mugwiriskiyengi ntchitu ulongozgi waku Chiuta ndipu wonani mo muyanduliya chifukwa chakuchita venivi. (Yesaya 48:17, 18) Kweniso musambirengi vinthu chayivu vo vinguchitikiyapu ŵanthu anyaki, wo mwakuwovyeka ndi Chiuta angumalana ndi masuzgu ngo akumananga nangu, akusintha umoyu wawu kweniso wa mabanja ngawu ndipu akusaniya likondwa chayilu. e

 Fundu yaboza: Tingamuziŵa cha Chiuta chifukwa iyu ngwambula kuvwisisika.

 Fundu yauneneska: Vinthu vinyaki vakukwaskana ndi Chiuta vakusuzga kuvivwisa. Mwakuyeruzgiyapu fundu yakuti iyu ndi Mzimu wambula kuwoneka. Chinanga kuti ve viyo, tingamuziŵa mbwenu Chiuta. Mwakuti Bayibolu likamba kuti, tikhumbika kuziŵa Chiuta kuti tizisaniyi umoyu wamuyaya. (Yohane 17:3) Mu Bayibolu mwe mazu ngo ngangatiwovya kuvwisa vakukwaskana ndi Mlengi widu, mijalidu yaki, vinthu vo wakhumba kuchitiya ŵanthu, charu chapasi ndipuso marangu ngaki. (Yesaya 45:18, 19; 1 Timote 2:4) Ndipu nge mo tawone kali, Bayibolu livumbuwa so zina laku Chiuta. (Masalimo 83:18) Mwaviyo, tingamuziŵa Chiuta kweniso kundere kufupi ndi iyu.—Yakobe 4:8.