Yohane Mubatizi wenga mchimi waku Chiuta. (Luka 1:76) Iyu wanguwaku Yesu wechendaweku. Chiuta wangumupaska ntchitu yakunozga nthowa yaku Mesiya pamwenga Khristu. Yohane wanguchita venivi mwa kupharazga uthenga waku Chiuta kwa Ayuda ndi chilatu chakuti mitima yawu yiwere kwaku Chiuta.—Mariko 1:1-4; Luka 1:13, 16, 17.

 Uthenga waku Yohane watingi uwovyengi akuvwisiya kuziŵa kuti Yesu wa ku Nazareti wenga Mesiya wakulayizgika. (Mateyu 11:10) Yohane wanguchiska akuvwisiya kuti alapi maubudi ngawu ndikubatizika kulongo kuti alapa nadi. (Luka 3:3-6) Yohane wadanikanga kuti Mubatizi chifukwa chakuti wangubatiza ŵanthu anandi. Ubatizu wakukhumbika ukongwa wo Yohane wanguchita wenga wakubatiza Yesu. a—Mariko 1:9.

Mu nkhani iyi tikambiskanengi mafumbu yanga

•  Ntchinthu wuli cho chingumupangisa Yohane Mubatizi kuja wapade ukongwa?

•  Kumbi apapi aku Yohane Mubatizi ŵenga ayani?

•  Kumbi ndiyani yo wanguchitiska kuti Yohane Mubatizi wafwi?

•  Kumbi Yohane Mubatizi ndi Yesu alimbananga?

•  Kumbi mbanthulumi alinga wo azumbulika mu Bayibolu wo adanikanga kuti Yohane?

 Ntchitu yo wangugwira yingukambikiya limu: Kuziya mu ntchitu yaki yakupharazga, Yohane wangufiska uchimi wakukwaskana ndi mthenga waku Yehova. (Malaki 3:1; Mateyu 3:1-3) Iyu wangulongo kuti wenga “wakunozgeka kuti Yehova wamugwiriskiyi ntchitu pakunozgekeresa ŵanthu” mwakuwovya Ayuda anyaki kuti aje akunozgeka kulonde uthenga wakukwaskana ndi wakumiya Yehova Chiuta yo ndi Yesu Khristu.—Luka 1:17.

 Chihara: Yesu wangukamba kuti “pa ŵanthu wosi wo akubalika ndi anthukazi, palivi munthu mura kuluska Yohane Mubatizi, kweni munthu yo we ndi udindu umana ukongwa mu Ufumu wakuchanya ndi mura kuluska iyu.” (Mateyu 11:11) Chifukwa chakuti Yohane wenga waka mchimi pe cha kweni wenga so “mthenga” yo wangukambirika, palivi mteŵeti waku Chiuta yo wakujaku iyu wechendaweku, wangaŵa mura kuluska Yohane. Vo Yesu wangukamba vilongo so kuti Yohane wazamuja fumu cha mu Ufumu wakuchanya. b Mchimi wakugomezgeka mwenuyu wangufwa Khristu wechendajuli nthowa yakuti ŵanthu alutengi kuchanya (Aheberi 10:19, 20) Kweni, Yohane wazamuja pacharu chapasi mu Ufumu waku Chiuta ndipu wazamuja ndi umoyu wamuyaya mu paradayisu.—Salimo 37:29; Luka 23:43.

 Apapi aku Yohane ŵenga Zekariya ndi Elizabeti. Zekariya wenga wasembi wa Chiyuda. Yohane wanguwaku mwakuziziswa chifukwa chakuti anyina ŵenga chumba pamwenga kuti ŵenga ambula kubala. Kweniso Elizabeti ndi mulumu waki Zekariya “wosi ŵenga arara ukongwa.”—Luka 1:5-7, 13.

 Fumu Herodi Antipasi wangulamula kuti Yohane wadumuliki mutu. Iyu wanguchita venivi chifukwa muwolu waki Herodiya, wangumupempha kuziya mwa mwana waki munthukazi. Herodiya wamutinkhanga Yohane chifukwa chakuti Yohane wangukambiya Herodi yo wajidananga kuti ndi Myuda, kuti nthengwa yaku iyu ndi Herodi njambula kuzomerezeka mwakukoliyana ndi marangu nga Chiyuda.—Mateyu 14:1-12; Mariko 6:16-19.

 Mu Bayibolu palivi po palongo kuti Yohane walimbanga ndi Yesu. (Yohane 3:25-30) Kweni Yohane wanguziŵa kuti mbudindu waki kunozga nthowa yaku Mesiya ndipu wachitanga vinthu mwaphara cha ndi Yesu. Yohane wangukamba kuti: ‘Ndikuziya kuzibatiza mumaji . . . kuti iyu waziŵiki kwa Ayisirayeli.’ Iyu wangukamba so kuti: “Mwenuyu ndiyu Mwana waku Chiuta.” (Yohane 1:26-34) Yohane wangukondwa ukongwa kuvwa kuti uteŵeti waku Yesu wafiskika.