Ku South Africa, ŵanthu wo atovya ŵanthu ambula kuvwa awonga Akaboni aku Yehova pakovya ŵanthu ambula kuvwa kuti vinthu pa umoyu wawu viyendengi umampha mwa kunozga mavidiyo ngapachanya ukongwa mu Chineneru Chamanja cha ku South Africa (SASL). Ŵanthu yaŵa akamba venivi chifukwa cha kutuzgika kwa buku la Agalatiya ndi Aefeso la mu Bayibolu la Charu Chifya la Malemba nga Chigiriki Ngachikhristu mu Chineneru cha SASL. Mabuku yanga ngakutuzgika pa 15 November 2021. Venivi vachitiska kuti mabuku 10 nga mu Bayibolu la Chineneru Chamanja cha ku South Africa ngatuzgiki. Mabuku nganyaki nganayi ngatuzgikengi mu April 2022. Mabuku ngosi nga mu Bayibolu ngenanga ngasanirika pa jw.org ndipuso pa JW Library Sign Language app.

Minna Steyn, kaswiri pa vamasambiru kweniso mlongozgi wa wupu wa Western Cape Government, wangukamba vakukwaskana ndi Akaboni kuti: “Nditanja kuwonere mavidiyo nga ŵanthu a chineneru chamanja ndipu ndikhumba kuŵawonga kweniso kuwonga gulu lenili chifukwa cha mavidiyo ngamampha nga chineneru chamanja.”

Bongani Makama, mura wa wupu wa Federation of the Disabled ku Eswatini, wangukamba kuti: “Titiŵawonga ukongwa Akaboni aku Yehova pakuchitiska kuti ŵanthu ambula kuvwa aje ndi vinthu vo ŵanthu wo atuvwa ŵenavu. [Ŵanthu ambula kuvwa] akhumbikiya Bayibolu mu chineneru chawu. Ndichu chifukwa chaki titiŵawonga ukongwa Akaboni aku Yehova pakupereka mabuku nga Bayibolu ku ŵanthu ambula kuvwa mu chineneru cho chitiŵafika pamtima. Tilindizga kuzija ndi mabuku ngosi 66 nga mu Bayibolu mu chineneru cha manja.”

Wanthu pafufupi 450,000 ku South Africa agwiriskiya ntchitu Chineneru Chamanja cha ku South Africa. Ku South Africa, kwe apharazgi ambula kuvwa pamwenga wo asuzgika kuvwa akukwana 283. Chifukwa cha phamphu lo Akaboni ŵe nalu, “ŵanthu amitundu yosi” aziŵa umampha uneneska, kusazgapu ŵanthu ambula kuvwa muchigaŵa cha ofesi ya nthambi ku South Africa.—1 Timote 2:4.