MARCH 19, 2024 | MO VILIRI PASONU PANU: APRIL 23, 2024
RUSSIA

MO VILIRI PASONU PANU—BANJA AKULISANIYA NDI MULANDU | ‘Yehova Ndiyu Watindipembuzga’

JULANI

Pa 22 April 2024, Khoti la Mutawuni ya Petropavlovsk-Kamchatskiy lo le Muchigaŵa cha Kamchatka likupereka cheruzgu pa mulandu wa Mubali Sergey Chechulin ndi muwolu waki Yelena Chechulina. Khoti likuŵayeruzga kuti angapalamulanga mulandu wewosi cha kwa vyaka viŵi. Yiwu alutengi kujeri cha pa nyengu iyi.

Vakukwaskana ndi Ŵanthu Yawa

Sergey Chechulin

Chaka cho wakuwiya: 1968 (Ku Tymlat, Muchigaŵa cha Kamchatka)

Mo wakukuliya: Wakukuliya ku nyumba yo aleriyaku ŵana alanda. Wagwiranga ntchitu yakunozga vinthu vo vanangika pa kampani

Mubwezi waki yo wanguyambapu kusambira Bayibolu ndiyu wangumudana kuti alutiyi limoza ku maunganu nga Akaboni aku Yehova. Mafumbu nga ku Sergey ngangumukika umampha ukongwa. Ndipu wakubatizika mu 1995

Wakutolana ndi Yelena mu 2000. Yiwu ŵe ndi mwana yumoza munthulumi

Vo Sergey Wangumuka Wati Wafumbika

Kumbi pe lemba lelosi la mu Bayibolu lo lakuchiskani ukongwa yimwi ndi muwolu winu?

Akutikaniza kutuwa mucharu chidu, akutilonda galimotu kweniso akutijaliya ma akaunti ngidu ngaku banki. Kweni sonu tivwisa ukongwa mazu ngo nge pa Masalimo 55:22 ngo ngakamba kuti: “Muponye Yehova mphingu yaku, ndipu iyu wakuwovyengi. Iyu wazomerezengi cha kuti murunji wawi.” Yehova wakutilayizga kuti watipasengi nthazi. Ndi chovyu chenichi, masuzgu yanga ngatitideluwa nthazi cha. Mwaviyo, tilutirizga kumuthemba ukongwa Yehova kweniso abali ndi azichi ŵidu pacharu chosi. Ndipu tisimikiza mtima kuti tilutirizgengi kuchita vosi vo tingafiska pa kusopa iyu.

Yelena Chechulina

Chaka cho wakuwiya: 1978 (Petropavlovsk-Kamchatskiy)

Mo wakukuliya: Wagwira ntchitu ya udokotala

Anyina aku Yelena angwamba kusambira Bayibolu ndi Akaboni aku Yehova. Venivi vinguwovya Yelena kuziŵa kuti wakhumbika kusambira vakukwaskana ndi Chiuta ndipu wangupemba kuti wayambi kusambira Bayibolu. Ndipu wakubatizika mu 2000

Wakutolana ndi Sergey mu 2000

Vo Yelena Wangumuka Wati Wafumbika

Kumbi mwasambiranji vakukwaskana ndi Yehova pa vo vakuchitikiyani?

Ndawona kuti nditilivwisa umampha ukongwa Bayibolu asani vinthu visintha pa umoyu wangu. Mwakuyeruzgiyapu, chifukwa cha kutombozgeka uku, ndavwisa umampha mazu ngo Paulo wangulemba pa Aroma 8:38, 39 ngakuti: “Chifukwa ndasimikiza mtima kuti kwali ndi nyifwa, kwali mbumoyu, kwali mbangelu, kwali ndi maboma, kwali ndi vinthu vo vilipu sonu, kwali ndi vinthu vo vituza, kwali ndi nthazi, kwali mbutali wamuchanya, kwali mbutali wapasi, pamwenga chinthu chinyaki chechosi chakulengeka, chingatipatuska cha ku chanju chaku Chiuta cho che mwa Ambuyafwi, Khristu Yesu.” Yehova wakhumba kundilongo kuti watindiyanja ndipu palivi cho chingamutondekesa kuchita viyo. Iyu wachita viyo kuti ndileki kukayika kuti ndiyu watindipembuzga. Yehova waja waka cheti cha pamwenga kuleka kuŵalongo chanju ateŵeti ŵaki. Ndiziŵa kuti vo vandichitikiya vazakundiwovya kuti ndizikunthiyepu masuzgu ngengosi ngo ndingazikumana nangu.

Nge Sergey ndi Yelena, nasi tiwonga ukongwa mphasu yakufikapu ya Mazu ngaku Chiuta ngo ngatitipaska nthazi kweniso zeru zo tikhumbikiya kuti tilutirizgi kuja akugomezgeka chinanga kuti tikumana ndi masuzgu.—Masalimo 19:7.

Nyengu yo Vinguchitikiya

Pa 25 September 2022

Angumujuliya mulandu
Pa 17 October 2022

Angufufuza munyumba yawu
Pa 6 September 2023

Sergey angumukaniza kutuwa mucharu chaki
Pa 7 September 2023

Yelena angumukaniza kutuwa mucharu chaki
Pa 26 December 2023

Angwamba kumumba mulandu

NKHANI