JUNE 28, 2024
RUSSIA

Azichi Atatu Akuŵasaniya ndi Mulandu ku Republic of Kalmykia ku Russia

JULANI

Pa 24 June 2024, Khoti la Mutawuni ya Elista Republic of Kalmykia likumusaniya ndi mulandu Mzichi Tsagan Khalgaeva, Yekaterina Menkova ndipuso Kishta Tutinova. Tsagan ndi Yekaterina wosi ŵaŵi khoti likuŵayeruzga kuti angapalamulanga mulandu wewosi cha kwa vyaka viŵi. Kishta akumuyeruzga kuti wangapalamulanga mulandu wewosi cha kwa vyaka vitatu. Yiwu alutengi kujeri cha panyengu iyi

Vakukwaskana ndi Ŵanthu Yaŵa

Tsagan Khalgaeva

Chaka cho Wakuwiya: 1978 (Lagan, Republic of Kalmykia)

Mbiri Yaki: Wagwiranga ntchitu yakusona

Wangwenda kumatchalitchi ngakupambanapambana kuti wasaniyi kwamuka kwa mafumbu ngaki. Wangwamba kusambira ndi Akaboni aku Yehova ndipu wangusaniya kwamuka kwakukhorwesa kwa mafumbu ngaki mu Bayibolu

Wakubatizika mu 2004

Vo Wangumuka Wati Wafumbika

Kumbi ntchinthu wuli cho muwonga ukongwa panyengu yakusuzga yeniyi?

Ndiwonga ukongwa mapempheru ngo abali ndi azichi andipempheriyanga. Nyengu zinyaki asani ndaguŵa, vo ndachitanga nkhumuliriya waka Yehova mupempheru chifukwa ndaziŵanga cha kuti ndingakambanji. Kweni ndaziŵanga kuti ŵanthu anyaki so atindipemphere ndipu ndawonanga mo Yehova wamukiyanga mapempheru ngenanga. Venivi vandiwovyanga kuti ndiŵapempheriyengeku ŵanthu anyaki wo nawu akumananga ndi masuzgu. Kupemphere ŵanthu anyaki kweniso kuziŵa kuti atindipemphere kwandipembuzganga ukongwa. Venivi vitindikumbusa kuti tikoliyana asani tikunthiyapu masuzgu.

Yekaterina Menkova

Chaka cho Wakuwiya: 1982 (Tavn-Gashun, Republic of Kalmykia)

Mbiri Yaki: Wagwiranga ntchitu yakupima ŵanthu ndipuso kuphwere vipangizu vakuyezge ŵanthu kuchipatala

Wakuyirwa mu 2009. We ndi mwana yumoza

Iyu wangukondwa ukongwa kuwona mo Akaboni aku Yehova achitiya vinthu mwakukoliyana ndi Bayibolu kweniso mo fundu za mu Bayibolu zingusinthiya umoyu waki. Wakubatizika mu 2017

Vo Wangumuka Wati Wafumbika

Kumbi ndi lemba nili la mu Bayibolu lo lakuwovyani kuti mugomezgengi ukongwa Yehova?

Mazu ngo nge pa Masalimo 8:3, 4 ngandiwovya ukongwa: “Asani ndilereska kuchanya, ntchitu za vikumbu vinu, Mwezi ndipuso nyenyezi vo yimwi mukupanga, Kumbi munthu ndiyani kuti mumukumbukengi, Kweniso mwana wa munthu ndiyani kuti mumuphweriyengi?” Yapa Bayibolu likamba kuti, Yehova wangufiska kulenga chilengedu kweniso chechosi ndi vikumbu vaki. Kuŵanaŵaniya venivi kutindisimikiziya kuti Yehova we ndi nthazi ukongwa ndipu ndichita mantha cha ndi chechosi.

Kishta Tutinova

Chaka cho Wakuwiya: 1961 (Novolesnoy, Muchigaŵa Astrakhan)

Mbiri yaki: Wagwiranga ntchitu yakusona. We ndi ŵana ŵaŵi anthulumi ndipu watiŵalera yija

Wakuwiya mu banja la Chibuda. Kasitomala yo ndi Kaboni waku Yehova ndiyu wangumuwovya kuti wasambiri vakukwaskana ndi Bayibolu. Kishta wangukondwa ukongwa wati waziŵa mo wangasope Chiuta mwawanangwa kwambula midawuku kweniso angoza. Wakubatizika mu 2003

Vo Wangumuka Wati Wafumbika

Kumbi ntchinthu wuli cho chingukuwovyani kulutirizga kukondwa?

Pa nyengu yo ndachitanga ukayidi wa panyumba, ndakhumbikanga kuja panyumba kwa myezi yakujumpha yinayi. Venivi venga vakusuzga ukongwa chifukwa panyengu iyi ndajanga munyumba ya chipinda chimoza limoza ndi mwana wangu munthulumi kweniso banja laki. Tajangamu ŵanthu 7. Kuja munyumba yimana kweniso kukanizika kutuwapu venga vakusuzga ndipuso mo liŵavu langu lenge venga umampha cha. Kweni kuŵanaŵaniya lemba la Nthanthi 24:10 kungundiwovya. Likamba kuti: “Asani walopwa pa zuŵa la soka, Nthazi zaku zijengi zimana.” Ndinguwona kuti ndakhumbikanga kusankha kujaliya waka kuŵanaŵaniya masuzgu ngangu pamwenga kuŵanaŵaniya vinthu vamampha. Ndinguŵanaŵaniya chakuyeruzgiyapu chaku Yosefi. Panyengu yo wenga mujeri, wanguzomereza cha kuti vo wangukumana navu vimuweze vuli. Pavuli paki ndingusankha kuti ndiŵanaŵaniyengi vinthu vamampha vo vandichitikiya pa umoyu wangu kuchita viyo kungundiwovya kuti ndilutirizgi kukondwa.

Tiwonga ukongwa chifukwa cha vakuwoniyapu vamazuŵa nganu pankhani yakulongo chivwanu. Ndipu tikondwa ukongwa kuziŵa kuti Yehova wawona masuzgu ngosi ngo tikumana nangu ndipu wazamukumbuka chivwanu chidu.—Masalimo 37:18.

Nyengu Kweniso vo Vinguchitika

Pa 16 February 2023

Kishta angumujuliya mulandu
Pa 28 February 2023

Nyumba zingufufuzika. Kishta angumuŵika mujeri kulindiziya mulandu waki
Pa 1 March 2023

Tsagan angumulekesa ntchitu yo wagwiranga chifukwa ŵanthu anandi anguziŵa kuti wambikanga mulandu. Kishta angumutuzga mujeri mo walindiziyanga mulandu waki ndipu wachitanga ukayidi wa panyumba
Pa 21 July 2023

Kishta angufwatuwa pa ukayidi wa panyumba
Pa 19 December 2023

Yekaterina ndi Tsagan anguŵajuliya mulandu. Wosi ŵaŵi anguŵakaniza kuluta kumalu nganyaki
Pa 9 February 2024

Kishta angumukaniza kuluta kumalu nganyaki
Pa 1 April 2024

Atamba kumumba mulandu
Pa 24 June 2024

Angumuyeruzga ndipu angumukambiya kuti wangapalamulanga mulandu wewosi cha

NKHANI