Mu vyaka 30 vo vajumpha, ŵanthu anandi awonanga kuti vinthu venga umampha pacharu kweniso kuti vilutiriyengi kuja umampha ukongwa. Kweni vo vachitika pambula kuswera yapa, valongo kuti wenuwu ungaŵa uneneska cha.

•   “Ŵanthu afipa mtima kuti nkhondu ya ku Gaza yikwaskengi vyaru vinyaki chifukwa chakuti ŵanthu a ku Israel ndi gulu la Hezbollah ayamba kupumana pa boda ya ku Lebanon.”—Reuters, January 6, 2024.

•   “Magulu ngo nge pasi pa charu cha Iran ngayukiya muvigaŵa vinandi ndipu charu cha Iran chayamba so kupanga vidya va nyukiliya. Kusazgapu yapa, charu cha Russia ndi China vakoliyana ndi charu cha Iran. Vosi venivi vichitiska kuti vyaru va kuzambwi vifipengi mtima.”—The New York Times, January 7, 2024.

•   “Charu cha Russia chilutirizga kunanga vinthu vinandi mucharu cha Ukraine.”—UN News, January 11, 2024.

•   “Chuma cha charu cha China chisazgikiyaku kweniso asilikali ndi vivya va nkhondu mucharu chenichi navu visazgikiyaku. Ŵanthu anandi ku Taiwan atanja kweniso avikiliya ukongwa charu chawu. Ndipu kuleka kukoliyana ko kulipu pakati pa charu cha China ndi United States kungachitiska kuti viwawa viyambiki kwambula kusuzga.”—The Japan Times, January 9, 2024.

 Kumbi Bayibolu likukambapu chechosi pa nkhani ya viwawa vo vichitika pacharu chosi mazuŵa nganu? Kumbi venivi vingayambisa nkhondu ya pacharu chosi?

 Bayibolu likukambiya limu cha kuti charu chakuti ndi chakuti vazamupumana. Kweni likukambiya limu vakukwaskana ndi nkhondu kuti ntchisimikizu cha mazuŵa ngakumaliya ndipu ‘zituzgapu chimangu pacharu chapasi.’—Chivumbuzi 6:4.

 Buku la Daniyeli likukambiya limu kuti “mu nyengu ya umaliru,” maufumu nganthazi ‘ngazamulimbananga’ pamwenga kuti ngazamulimbiyana udindu wakulamuliya charu chosi chapasi. Kulimbana kwenuku kusazgapu kujiwonesa kuti nge ndi asilikali ndi vidya vanthazi vankhondu kweniso kujiwonesa kuti nge ndi “chuma” pamwenga ndalama zinandi.—Daniyeli 11:40, 42, 43.

 Bayibolu lilongo kuti vinthu mucharu ichi vinangikengi ukongwa vechendasinthi kuti vije umampha. Yesu wangukambiya limu kuti “kwazamukuŵa chisuzgu chikulu cho chechendachitikepu kutuwa po charu chikulengeke.” (Mateyu 24:21) “Chisuzgu chikulu” chenichi chazamumala pa nkhondu Aramagedoni, yo yikonkhoskeka kuti ndi “nkhondu ya zuŵa likulu laku Chiuta Wanthazizosi.”—Chivumbuzi 16:14, 16.

 Kweni nkhondu ya Aramagedoni yazamutaska ŵanthu. Chiuta wazamugwiriskiya ntchitu nkhondu yeniyi kuti wamalisi maulamuliru nga ŵanthu ngo ngazisa nkhondu zinandi zo zibaya ŵanthu. Kuti muziŵi mo nkhondu ya Aramagedoni yazamuzisiya chimangu chambula kumala, ŵerengani nkhani izi:

•   “Kumbi Nkhondu ya Aramagedoni ndi Nkhondu Wuli?”

•   “Aramagedoni Mbuthenga Wamampha!”