Chaka chechosi tisindikiza ndipuso kugaŵiya Mabayibolu ndi mabuku mamiliyoni nganandi. Tizenga maofesi nga nthambi ndipuso nyumba zakusindikiziyaku mabuku pacharu chosi. Mipingu yinandi yiwungana mu Nyumba za Ufumu zakuwoneka umampha. Kumbi ndiyani yo wapereka ndalama zo tigwiriskiya ntchitu?

Ntchitu iyi yitendeskeka ndi ndalama zo ŵanthu apereka mwakukhumba kwawu. (2 Ŵakorinte 9:7) Mu 1879, Magazini yachiŵi ya Chigongwi cha Alinda yo panyengu yo yaziŵikanga kuti “‘Zion’s Watch Tower’ yingukamba kuti: Tikayikiya cha kuti YEHOVA ndiyu walongozga ntchitu yakupanga magazini iyi. Mwaviyo, tazamupemphapu ŵanthu cha pamwenga kuchondere kuti atiwovyi pa ntchitu yeniyi.” Kutuliya nyengu yeniyi tikupemphesapu nadi cha ndalama.

Ŵanthu atumiza ndalama ku maofesi nga Akaboni aku Yehova pamwenga aŵika mutimabokosi ta vakupereka to tisanirika mu Nyumba za Ufumu za Akaboni aku Yehova. Kweni tipereka chatchumi cha, titendesa mbali ya mpasku cha pamwenga kutchaja ŵanthu mtengu wa mabuku pamwenga kulipirisa ntchitu yidu yakupharazga. Tilipirika cha asani tipharazgiya ŵanthu, tisambiza mumpingu, pamwenga asani tizenga malu ngakusopiyamu. Yesu wangukamba kuti: “Mukulonde kwawezi, pasani kwawezi.” (Mateyu 10:8) Wosi wo ateŵete m’maofesi ngidu kweniso wo ateŵete ku likulu lidu, kusazgapu wo ateŵete mu Wupu Wakulongozga wa Akaboni aku Yehova alonde malipiru cha asani mwezi wamala.

M’nyengu ya akutumika Akhristu akondwanga ukongwa kuwovya ŵanthu wo akumana ndi suzgu. (Ŵaroma 15:26) Mazuŵa nganu, ndalama zo ŵanthu apereka zigwira so ntchitu yakuwovye ŵanthu wo akumana ndi masoka ngachilengedu. Ŵanthu wo akumana ndi masoka ngachilengedu titiŵazenge nyumba, malu ngakusopiyapu ndipuso titiŵapasa vakurya, vakuvwala kweniso munkhwala.