Kumbi mukujifumbapu mafumbu ngenanga? Asani ndi viyo, ndimwi pe cha. Ŵanthu anandi apenja kwamuka kwa mafumbu ngakusuzga ngenanga. Kumbi mungasaniya kwamuka?

Ŵanthu anandi angamuka kuti, “Hinya!” Chifukwa wuli? Chifukwa chakuti akusaniya kwamuka kwakukondwesa kutuliya m’Bayibolo. Kumbi mungayanja kuziŵa vo Bayibolo likamba? Mungayanduwa ukongwa asani mungasambira Bayibolo ndi Akaboni aku Yehova. a

Pa nkhani yakusambira Bayibolo, anyaki akamba kuti: “Ndilivi nyengu.” “Ndakusuzga.” “Ndingaleka cha vo ndigomezga.” Kweni anyaki akamba viyo cha. Yiwu azomera kusambira Bayibolo. Tiyeni tiwoni vakuwoniyapu ivi:

• Gill wa ku England wangukamba kuti: “Ndayenda muvisopa vinandi nge cha Katolika, Chipulotensitanti, Chisikhi, Chibuda ndipuso ndasambiranga vauliska ku yunivesite yinyaki. Kweni mafumbu ngangu ngakukwaskana ndi Chiuta ngamukikanga cha. Zuŵa linyaki, Kaboni wangufika panyumba pangu ndipu wangumuka mafumbu ngosi kutuliya m’Bayibolo. Mwaviyo, ndinguzomera kusambira Bayibolo.”

• Koffi wa ku Benin wangukamba kuti: “Ndenga ndi mafumbu nganandi ngakukwaskana ndi umoyu, kweni vo aliska andimukanga vandifikanga pamtima cha. Kaboni waku Yehova ndiyu wangumuka mafumbu ngangu kutuliya m’Bayibolo. Ivi vinguchitiska kuti ndizomeri kusambira nayu Bayibolo.”

• José wa ku Brazil wangukamba kuti: “Ndakhumbisiskanga kuziŵa vo vichitika asani munthu wafwa. Ndagomezganga kuti munthu wakufwa, wangasuzga ŵanthu amoyu. Mwaviyo, ndingwamba kusambira Bayibolo ndi munyangu yo wenga Kaboni kuti ndiziŵi uneneska pa nkhani iyi.”

• Dennize wa ku Mexico wangukamba kuti: “Chinanga kuti ndaŵerenganga Bayibolo kweni ndalivwisisanga cha. Pavuli paki, ndingukumana ndi Akaboni ndipu angundikonkhoske mauchimi nganandi nga m’Bayibolo, mwakuti ndakhumbanga kuziŵa so nganyaki.”

• Anju wa ku Nepal wangukamba kuti: “Ndakayikanga ukongwa kuti Chiuta watindiŵanaŵaniya. Mwaviyo, ndinguromba kwaku iyu. Mawa laki, Akaboni anguza kunyumba kwangu ndipu ndinguzomera kusambira Bayibolo.”

Vakuchitika ivi vititikumbuska vo Yesu wangukamba. Iyu wanguti: “Mbakutumbikika asauchi mu mzimu.” (Mateyu 5:3) Ŵanthu wosi ŵe ndi mtima wakukhumba kuziŵa Chiuta. Mwaviyo, iyu ndiyu wangaŵawovya kuti amuziŵi umampha kuziya m’Mazu ngaki, Bayibolo.

Kumbi sambiru la Bayibolo lichitika wuli? Nanga lingakuwovyani wuli? Mafumbu yanga ngamukikengi m’nkhani yakulondopu.