Ŵanthu anandi mutawuni iyi aŵetanga ng’ombi za mkaka. Mwaviyo, ng’ombi zenga zinandi kuluska ŵanthu.

Banja lidu lenga m’chisopa chinyaki m’tawuni yeniyi. Pa Sabata mulenji wewosi, ambuya andipolichiyanga sapatu , pavuli paki ndalutanga ku tchalitchi. Pakuluta, ndapinganga Kabayibolo katuŵa ko angundipaska ambuya anthukazi. Ini, mvurwa wangu kweniso mzichi wangu tingusambizika kugwira nchitu mwaphamphu, kutumbika ŵanthu, kuŵawovya kweniso kuti tiwongengi.

Ndati ndakuwa, ndingutuwapu panyumba ndipu ndingwamba nchitu ya usambizi. Ndenga ndi mafumbu nganandi ngakukwaskana ndi Chiuta ndipuso umoyu. Anyaki mwa ŵana wo ndasambizanga ŵenga azeru ukongwa kweni anyaki ŵenga azeru kamanavi. Anyaki ŵenga akupunduka kweni anyaki ŵengavi suzgu yeyosi. Ivi vandidandawulisanga ukongwa ndipu ndawonanga kuti Chiuta watanjiya. Nyengu zinyaki apapi a ŵana wo ŵenga ndi suzgu akambanga kuti, “Chiuta wakulembe limu kuti mwana wangu waje viyo.” Mwaviyo, ndajifumbanga kuti, ‘Nchifukwa wuli Chiuta wazomerezga kuti ŵana anyaki abalikengi ndi vilema chinanga kuti palivi chechosi cho akunanga?’

Ndajifumbanga so kuti, ‘Kumbi nchinthu wuli chakuzirwa cho ndikhumbika kuchita pa umoyu wangu?’ Ndawonanga kuti umoyu wangu wenga ufupi. Ndingukuliya m’banja lamampha ukongwa, ndingusambira sukulu zapachanya kweniso ndagwiranga ntchitu yo ndayiyanjanga ukongwa. Kweni ndawonanga kuti umoyu wangu wengavi chilatu chechosi. Ndakhumbanga so kuyirwa, kuja ndi ŵana, nyumba yamampha, kulutirizga kugwira ntchitu mpaka po ndatingi ndilekiyengi, pavuli paki kuchija kumalu ngakusungiyaku ŵanthu akukota. Kweni ndakhumbanga chinthu chinyaki pa umoyu wangu.

Tinguchifika ku malikulu nga matchalichi nge ku Westminster Abbey, Notre-Dame de Paris, Vatican  ndipuso matchalitchi nganyaki ngambula kutchuka. Ndafumbanga mafumbu kosi ko ndayendanga. Ndati ndawere kwidu ku Sloatsburg, New York, ndingwenda so m’matchalitchi nganandi. Kweni pengavi yo wangumuka mafumbu ngangu mwakuvwika umampha.

Zuŵa linyaki, msungwana wavyaka 12 yo ndamusambizanga wangundifumba mafumbu ngatatu. Chakwamba, wangundifumba asani ndiziŵa kuti iyu ndi Kaboni waku Yehova. Ndinguzomera kuti ndiziŵa. Chachiŵi, wangundifumba asani ndingayanja kuziŵa vinandi vakukwaskana ndi Akaboni aku Yehova. Ndinguzomera so. Chachitatu, wangundifumba ko ndija. Ndati ndamukambiya, wanguwona kuti tajanga pafupi. Ndinguziŵa cha kuti mafumbu ngatatu ngenanga ngasinthengi umoyu wangu wosi.

Pavuli paki, wanguza kunyumba kwangu panjinga ndipu wangwamba kusambira nani Bayibolo. Ndingumufumba so mafumbu ngo ndafumbanga alongozgi anandi a visopa. Mwakupambana ndi alongozgi ŵenaŵa, msungwana uyu wangundimuka mafumbu ngosi mwakuvwika umampha kutuliya m’Bayibolo. Kenga kakwamba kuvwa vo wangumuka.

Vo ndingusambira m’Bayibolo vingundikondwesa ukongwa. Ndingukondwa so ukongwa ndati ndaŵerenga lemba la 1 Yohane 5:19 lo likamba kuti: “Charu chosi chira [chigona] mu nthazi ya muheni yo.” Ndinguzizwa kuziŵa kuti ndi Chiuta cha yo wachitiska masuzgu pacharu kweni ndi Satana. Chiuta walayizga kuti watuzgengepu viheni vosi. (Chivumbuzi 21:3, 4) Ndinguwona so kuti fundu za m’Bayibolo zivwika asani zakonkhoskeka umampha. Ndinguwona kuti vo ndasambiranga m’Baibolo venga vauneneska chinanga kuti yo wandisambizanga wenga mwana wavyaka 12.

Ndakhumbanga so kuziŵa asani Akaboni aku Yehova achita nadi vo asambiza. Mwakuyeruzgiyapu, msungwana yo wangundikonkhoske kuti Akhristu auneneska atenere kuja akuzizipizga ndipuso aulemu. (Ŵagalatia 5:22, 23) Ndakhumbanga kuwona asani iyu wachita nadi vo wandisambizanga. Zuŵa linyaki ndinguswere dala. Ndajifumbanga kuti: ‘Kumbi ndakumusaniya weche kundilindizga? Asani ndingachimusaniya, kumbi wakundikwiyiya chifukwa chakuti ndaswera?’ Ndepafupi kufika panyumba, ndingumuwona wachindilindizga pakhondi. Wangunditchimbiliya ndipu wangukamba kuti: “Ndakhumbanga kuluta kunyumba kuchiŵakambiya ama kuti ambiyi foni kupolisi ndipuso kuchipatala kuti tifumbi asani mwe umampha chifukwa mundaswerepu viyo. Ndingufipa mtima ukongwa!”

Zuŵa linyaki so ndingumufumba fumbu lo ndaŵanaŵananga kuti mwana wa vyaka 12 wangalimuka cha. Ndakhumbanga kuti ndimuwoni asani wandimukengi va m’mutu waki. Ndati ndamufumba, wangundilereska ndipu wangundikambiya kuti: “Fumbu ili ndakusuzga ukongwa. Ndililembengi kuti nkhafumbi apapi ŵangu.” Ulendu wakulondopu wanguza ndi Chigongwi cha Alinda cho mwenga kwamuka kwa fumbu langu. Ndingwamba kwanja Akaboni chifukwa m’mabuku ngawu mwenga fundu za m’Bayibolo zo zamukanga mafumbu ngangu. Ndingulutirizga kusambira ndi msungwana mwenuyu, ndipu pati pajumpha chaka ndingubatizika kuti ndije Kaboni waku Yehova. a

Ndati ndasaniya kwamuka kwakuvwika umampha ndakhumbanga so kuwovyaku ŵanthu anyaki. (Mateyu 12:35) Pakwamba, abali ŵangu asuskanga ukongwa vo ndagomezganga. Kweni pavuli paki, angwamba kusintha. Ama angwamba kusambira Bayibolo. Ndisimikizga kuti angusankha kuteŵete Yehova chinanga kuti akutayika ŵechendabatiziki.

Mu 1978 ndingutorana ndi Elias Kazan, yo wenga Kaboni waku Yehova. Ndipu mu 1981 ini ndi Elias tingudanika kuti tikateŵetiyengi pa Beteli ya ku United States. b Kweni Elias wangutayika tati tateŵete kwa vyaka vinayi pe. Ndingulutirizga kuteŵete pa Beteli chinanga kuti ndenga ndija ndipu ivi vingundichiska.

Mu 2006, ndingutorana so ndi Richard Eldred yo wateŵete so pa Beteli. Ini ndi Richard tikondwa limu kuteŵete limoza pa Beteli. Sonu ndiziŵa uneneska wakukwaskana ndi Chiuta, ndikusaniya kwamuka kwa mafumbu ngo ndenga nangu ndipuso ndikusaniya chilatu cha umoyu. Vosi ivi nchifukwa cha mafumbu ngatatu ngo msungwana wavyaka 12 wangundifumba.