NKHANI YA PAPEJI LAKWAMBA | MUNGAJA PA UBWEZI WAKUKHO NDI CHIUTA
Kumbi Mwe pa Ubwezi Wakukho ndi Chiuta?
“Kuja pa ubwezi wakukho ndi Chiuta kutovya kuti wamunthu ujengi wakuvikilirika, wakukondwa kweniso wambula mantha. Uwona nge kuti Chiuta ngwakunozgeka kukuwovya kuti vinthu vikuyendiyengi umampha.”—CHRISTOPHER, WAMPUPUKA WA KU GHANA.
“Chiuta wawona masuzgu ngaku ngosi ndipu watikuwovya mwachanju kuluska mo uŵanaŵaniya.”—HANNAH WA VYAKA 13, WA KU ALASKA, U.S.A.
“Asani we pa ubwezi wakukho ndi Chiuta uja wakukondwa ukongwa!”—GINA, MUNTHUKAZI WA KU JAMAICA WA VYAKA VA M’MA 40.
Christopher, Hannah, ndi Gina ndiwu pe cha wo akamba viyo. Ŵanthu anandi pacharu chosi akondwa ukongwa kuziŵa kuti Chiuta watiŵawona nge mabwezi. Kumbi namwi muwona viyo? Kumbi muwona kuti mwe pa ubwezi wakukho ndi Chiuta? Pamwenga, kumbi mungayanja kuja nayu pa ubwezi wakukho? Panyaki mutijifumba kuti, ‘Kumbi vingachitika kuti munthu waje pa ubwezi wakukho ndi Chiuta Wanthazizosi? Nanga wangachita wuli?’
MUNGAJA PA UBWEZI WAKUKHO NDI CHIUTA
Bayibolo lilongo kuti ŵanthu angaja pa ubwezi wakukho ndi Chiuta. Ndipu likamba kuti Chiuta wangudana Abrahamu kuti “bwezi langu.” (Yesaya 41:8) Awonani so vo Chiuta wakamba pa Yakobe 4:8, watiti: “Ndereni kufupi kwaku Chiuta, ndipu wanderengi kufupi kwinu.” Fundu iyi yilongo kuti namwi mungaja pa ubwezi wakukho ndi Chiuta. Sonu pakuti Chiuta titimuwona cha, kumbi mungandere wuli kufupi ndi iyu ndi kuja nayu pa ubwezi wakukho?
Kuti timuki fumbu ili, ŵanaŵaniyani vo vichitika kuti ŵanthu ayambi kwanjana. Chinthu chakwamba, aziŵana dankha mazina. Ndipu ubwezi wawu ukuwa ukongwa asani akambiskana kaŵikaŵi ndi kumalirana vakukhosi. Kweniso asani atesesa kovyana, ubwezi wawu ulutirizga kuja wakukho. Ivi ndivu munthu wangachita asani wakhumba kuja pa ubwezi wakukho ndi Chiuta. Kumbi venivi vingachitika wuli? Tiyeni tiwoni.
Mungayanja Kuŵerenga so Nkhani Izi
CHIGONGWI CHA MLINDA
Kumbi Zina Laku Chiuta Mutiliziŵa ndi Kuligwiriskiya Nchitu?
Chiuta wakhumba kuti mumuziŵi ndipu kuporote m’Bayibolo wakamba kuti: “Ndini Ambuya [“Yehova,” NW], lo ndilu zina langu.”
