Ŵanaŵaniyani Mtundu wa Munthu yo Mutenere Kuja
Ŵanaŵaniyani Mtundu Wa Munthu Yo Mutenere Kuja
“Kutenere imwi kuŵa ŵakutinji mu mendedu ngakhovu ndi mauwopa Chiuta.”—2 PET. 3:11.
KUMBI MUNGAMUKA WULI?
Kumbi mutenere kuja munthu wa mtundu wuli kuti muje wakuzomerezgeka ndi Chiuta?
Kumbi Satana wanyenga wuli ŵanthu?
Kumbi mungachitanji kuti ubwezi winu ndi Yehova uleki kumala?
1, 2. Kumbi titenere kuja ŵanthu a mtundu wuli kuti tije akuzomerezgeka ndi Chiuta?
ŴANTHU anandi akhumba kuziŵa mo anyawu atiŵawone. Nge Akhristu, kumbi tikhumbika cha kuŵanaŵaniya ukongwa mo Yehova watitiwone? Yehova ndi Mura ukongwa m’chilengedu chosi ndipu iyu ndiyu “chisimi cha umoyu.”—Sumu 36:9.
2 Pakukonkhoska mo ‘titenere kuŵiya’ pamasu paku Yehova, wakutumika Petro watitichiska kuti tiŵi ndi “mendedu ngakhovu ndi mauwopa Chiuta.” (Ŵerengani 2 Petro 3:11.) Kuti tije akuzomerezgeka ndi Chiuta, “mendedu” ngidu ngatenere kuja ngakupatulika, kung’anamuwa kuja ndi mijalidu, maŵanaŵanu ngamampha ndipuso kuja pa ubwezi wamampha ndi Chiuta. Kusazgiyapu pa fundu yeniyi, tikhumbika kuchita ‘vinthu vakulongo kuti ndisi akujipereka kwaku Chiuta’ mwaulemu ndi kuja akugomezgeka kwaku iyu. Kuti tije akuzomerezgeka tikhumbika kuja ndi jalidu lamampha kweniso kunozga umunthu widu wamkati. Yehova waziŵa asani mijalidu yidu njakutowa ndipuso asani titijipereka ndi mtima wosi kwaku iyu pamwenga cha, chifukwa iyu ‘watesa mitima.’—1 Mik. 29:17.
3. Kumbi tikhumbika kujifumba mafumbu nanga pa nkhani ya ubwezi widu ndi Chiuta?
3 Satana Diabolo wakhumba cha kuti tije akuzomerezgeka pamasu paku Chiuta. Iyu watesesa kutimbanyizga ubwezi widu ndi Yehova. Kanandi Satana wagwiriskiya nchitu boza ndi uryarya kuti watinyengi ndi kutilekeska kusopa Chiuta. (Yoh. 8:44; 2 Ŵakor. 11:13-15) Mwaviyo, tingachita umampha kujifumba kuti: ‘Kumbi Satana wanyenga wuli ŵanthu? Kumbi ndingachitanji kuti ubwezi wangu ndi Yehova uleki kumala?’
KUMBI SATANA WANYENGA WULI ŴANTHU?
4. Kumbi Satana walimbana ndi chinthu wuli kuti wanangi ubwezi widu ndi Chiuta, nanga nchifukwa wuli?
4 Wakutumika Yakobe wakulemba kuti: “Munthu weyosi wateseka, pakuguguzika ndi likhumbira laku yija. Pavuli penipo likhumbira lo, lati lakuwa, lipapa ulakwi, ndipu ulakwi wo wati wakuwa ukongwa, upapa nyifwa.” (Yak. 1:14, 15) Kuti watipambaniski ndi Chiuta, Satana walimbana ndi mtima widu wo utitichitiska kuti tikhumbirengi vinthu.
5, 6. (a) Nchinthu wuli cho Satana wagwiriskiya nchitu kuti watinyengi? (b) Kumbi ndi nyambu nizi zo Satana wagwiriskiya nchitu kuti mtima widu ukhumbirengi vinthu viheni, nanga watizigwiriskiya wuli nchitu mwalusu?
5 Nchinthu wuli cho Satana wagwiriskiya nchitu kuti walimbani ndi mtima widu? Bayibolo likamba kuti: “Charu chosi chira mu nthazi ya muheni yo.” (1 Yoh. 5:19) Vidya vo Satana wagwiriskiya nchitu visazgapu vinthu “va m’charu.” (Ŵerengani 1 Yohane 2:15, 16.) Kwa vyaka vinandi, Diabolo waja wachithya viŵana mwakugwiriskiya nchitu vinthu vo tiwona. Pakuti tija m’charu ichi, tikhumbika kuphwere ndi nthowa zauryarya zaku Satana.—Yoh. 17:15.
6 Satana wagwiriskiya nchitu nthowa zo zingachitiska kuti mtima widu ukhumbirengi vinthu viheni. Wakutumika Yohane wangulongo kuti Satana wagwiriskiya nchitu nyambu zitatu: (1) “chilakalaka cha nyama [chaliŵavu],” (2) “chilakalaka cha masu” ndipuso (3) “chitumbwa . . . cha umoyu.” Nyambu zenizi ndizu Satana wangugwiriskiya nchitu pakuyesa Yesu mu bozwa. Iyu waja wachizigwiriskiya nchitu kwa vyaka vinandi ndipu mazuŵa nganu watizigwiriskiya nchitu mwalusu mwakukoliyana ndi vo munthu watanja. Techendakambiskani vo tingachita kuti tikhwechi viŵana venivi, tiyeni tiwoni mo Diabolo wangugwiriskiya nchitu nyambu zinyaki pakunyenga Eva kweniso mo wangutondeke kunyenga Mwana waku Chiuta.
CHILAKALAKA CHALIŴAVU
7. Kumbi Satana wangugwiriskiya wuli nchitu “chilakalaka cha nyama” pamwenga kuti chilakalaka chaliŵavu pakunyenga Eva?
7 Ŵanthu akupangika kuti aryengi ndi chilatu chakuti ajengi ndi umoyu. Mulengi wakunozga charu kuti mumengi vakurya vinandi. Satana wangagwiriskiya nchitu khumbiru la chakurya lo tija nalu kuti tileki kuchita khumbu laku Chiuta. Tiyeni tiwoni mo wanguchitiya venivi ndi Eva. (Ŵerengani Chiyambo 3:1-6.) Satana wangukambiya Eva kuti wangafwa cha asani wangarya chipasu cha ‘mumuti wakuziŵiska umampha ndi uheni.’ Iyu wangukamba kuti asani warya wayananengi ndi Chiuta. (Chiy. 2:9) Diabolo wangulongo kuti, kuti Eva waje ndi umoyu vathembanga kuvwiya Chiuta cha. Lenili lenga boza likulu ukongwa! Fundu yeniyi yati yajalikika m’maŵanaŵanu ngaku Eva, iyu wakhumbikanga kusankha chimoza pa vinthu viŵi ivi: Watingi wakanengi vo Satana wangumukambiya pamwenga watingi walutirizgengi kuviŵanaŵana, vo vatingi vichitiskengi kuti wakhumbiri ukongwa chipasu cho. Mwambula kuphwere kanthu kuti Chiuta wanguŵakambiya kuti angarya vipasu va muvimiti vinyaki vosi, Eva wangusankha kulutirizga kuŵanaŵana vo Satana wangukamba, va chimiti cho chenga pakati pa munda ndipu “wanguto chipasu ndi wangurya.” Mwaviyo, Satana wanguchitiska kuti Eva wakhumbiri chinthu cho Mulengi waki wangumukanizga.
8. Kumbi Satana wangumuyesa wuli Yesu mwakugwiriskiya nchitu “chilakalaka cha nyama” nanga nchifukwa wuli wangutondeka kumuyesa?
8 Satana wangugwiriskiya so nchitu nyambu yeniyi po wayesanga Yesu mu bozwa. Yesu wati waja kwambula kurya mazuŵa 40 musana ndi usiku, Satana wangumuyesa mwakugwiriskiya nchitu khumbiru lo wenga nalu lachakurya. Iyu wangukamba kuti: “Asani we Mwana waku Chiuta, unene mwa uwu kuti uŵi chiŵandi.” (Luka 4:1-3) Yesu wakhumbikanga kusankha chinthu chimoza pa vinthu viŵi ivi: Iyu watingi wasankhengi kukana kugwiriskiya nchitu nthazi zaki mwakuziziswa kuti wamaliski nja yo wenga nayu pamwenga watingi wazomerezgengi kuzigwiriskiya nchitu. Yesu waziŵanga kuti wakhumbikanga cha kugwiriskiya nchitu nthazi zaki kuti wafiski vo wakhumbanga mu nthowa yambula kwenere. Chinanga kuti wenga ndi nja, ubwezi waki ndi Yehova wenga wakukhumbika ukongwa kuluska kumaliska nja. Yesu wangumuka kuti: “Kwalembeka, ‘Munthu kuti wakajanga ndi umoyu ndi chiŵandi pe cha, kweni ndi nenedu losi likutuwa mu mulomu waku [Yehova] Chiuta.’”—Mat. 4:4.
“CHILAKALAKA CHA MASU”
9. Kumbi mazu ngakuti “chilakalaka cha masu” ngalongonji, nanga Satana wanguchigwiriskiya wuli nchitu kuti wanyengi Eva?
9 Yohane wangukamba so nyambu yinyaki ya “chilakalaka cha masu.” Mazu ngenanga ngalongo kuti munthu wangayamba kukhumbira chinthu asani wachilereska. Pa nkhani yaku Eva, Satana wangugwiriskiya nchitu chilakalaka cha masu po wangukamba kuti: “Masu nginu ngakajurikanga.” Chifukwa chakuti Eva wachilereskanga ukongwa chipasu chakukanizgika, vinguchitiska so kuti wachikhumbiri ukongwa. Iyu wanguwona kuti chimiti cho ‘chenga chamanyanda mu masu.’
10. Kumbi Satana wangugwiriskiya wuli nchitu “chilakalaka cha masu” pakuyesa Yesu, nanga Yesu wangumuka wuli?
10 Nanga pa nkhani yaku Yesu? Satana “wangurongo [Yesu] maufumu ngosi nga uzengi mu kamphindi ka nyengu. Ndipu Diabolo yo wanguti kwaku iyu, ‘Kwaku iwi ndipaskengi mtufu uwu wosi, ndi unkhankhu waku vo.’” (Luka 4:5, 6) Yesu wanguwona maufumu chayingu cha kweni chenga chiwona cha unkhankhu wa maufumu ngosi ndipu Satana waŵanaŵananga kuti Yesu wakopekengi ndi unkhankhu wenuwu. Satana wangukamba mwambula soni kuti: “Asani iwi ulambiyengi pa chisku changu, vosi viŵengi vaku.” (Luka 4:7) Yesu wangukana kuja munthu yo Satana wakhumbanga. Iyu wangumuka mwaliŵi kuti: “Kwalembeka, ‘Ulambiyengi Mbuya [Yehova] Chiuta waku, ndipu iyu pe yija umusopengi.’”—Luka 4:8.
“CHITUMBWA . . . CHA UMOYU”
11. Kumbi Eva wangunyengeka wuli ndi Satana?
11 Yohane wanguzumbuwa “chitumbwa . . . cha umoyu” pakukamba za vinthu va charu. Po Adamu ndi Eva ŵenga pacharu chapasi pengavi ŵanthu anyaki, mwaviyo yiwu atingi ajiwonesengi cha chifukwa cha vinthu vo ŵenga navu. Kweni yiwu angulongo kuti ŵenga akujikuzga. Pa nyengu yo Satana wayesanga Eva, wangumuchitiska kugomezga kuti penga chinthu chinyaki chamampha cho wakhumbikanga kuja nachu kweni Chiuta wangumunola. Diabolo wangumukambiya kuti asani wangarya chipasu cha ‘mumuti wakuziŵiska umampha ndi uheni,’ watingi ‘waŵengi uli ndi Chiuta, wakuziŵa umampha ndi uheni.’ (Chiy. 2:17; 3:5) Mwaviyo, Satana wakhumbanga kuti Eva waŵanaŵanengi kuti wangajimiya pakuyija kwambula Yehova. Kujikuzga kunguchitiska kuti Eva wagomezgi boza laku Satana. Iyu wangurya chipasu cho wangukanizgika chifukwa wagomezganga kuti wafwengi nadi cha. Eva, wangunangiska ukongwa!
12. Kumbi Satana wangugwiriskiya nchitu nthowa yinyaki niyi pakuyesa Yesu, nanga Yesu wangumuka wuli?
12 Mwakupambana ndi Eva, Yesu wangulongo kuti wenga wakujiyuyuwa ukongwa! Satana wanguyesa so kunyenga Yesu mu nthowa yinyaki kweni iyu wangukana kuchita vinthu vo anyaki atingi azukumengi navu kweniso vo vatingi viyesengi Chiuta. Kuchita viyo kwatingi kuŵengi kujikuzga. Mwaviyo, Yesu wangumuka mwakuvwika umampha ndipuso mwambula kubisa kuti: “Kwaneneka, ‘Ungamuyesanga cha Mbuya [Yehova] Chiuta waku.’”—Ŵerengani Luka 4:9-12.
MO TINGAVIKILIYA UBWEZI WIDU NDI YEHOVA
13, 14. Konkhoskani mo Satana wagwiriskiya nchitu nyambu zinyaki mazuŵa nganu.
13 Mazuŵa nganu, Satana wagwiriskiya nchitu nyambu zakuyanana ndi zo wangugwiriskiya nchitu pakuyesa Eva ndi Yesu. Diabolo wagwiriskiya nchitu “chilakalaka cha nyama” kuchitiska ŵanthu kuja ndi mijalidu yiheni kweniso kurya ndi kumwa mwakujumpha mwesu. Iyu wagwiriskiya so nchitu “chilakalaka cha masu” kuti ŵanthu awoneriyengi vinthu vakusikuwa, ukongwa pa Intaneti. Ŵanthu wo atijikuzga ndipuso wo atanja kujiwonesa chifukwa cha vinthu vo ŵenavu, udindu ndipuso kutchuka angayeseka.
14 Vinthu “va m’charu” ve nge nyambu zo mulovi wagwiriskiya nchitu pakuŵeja somba. Nyambu ziwoneka zakukopa kweni mukati muja mbeja. Satana nayu wagwiriskiya nchitu vinthu vo ŵanthu awona kuti vakukhumbika pa umoyu wawu wa zuŵa ndi zuŵa kuti achitengi vinthu vakususkana ndi marangu ngaku Chiuta. Iyu wagwiriskiya nchitu vinthu vakusuzga kuviziŵa venivi kuti vitimbanyizgi maŵanaŵanu ndipuso vinangi mtima widu. Chifukwa cha vinthu venivi, tingayamba kugomezga kuti kujiphwere ndipuso umoyu wamampha, vakukhumbika ukongwa kuluska kuchita khumbu laku Chiuta. Kumbi nasi tingayeseka ndi vinthu venivi?
15. Kumbi tingakana wuli mayeseru ngaku Satana nge mo Yesu wanguchitiya?
15 Chinanga kuti Eva wanguthera ku mayeseru ngaku Satana kweni Yesu wanguthera cha. Nyengu yeyosi yo Yesu wayesekanga wamukanga kutuliya m’Malemba kuti: “Kwalembeka” pamwenga “kwaneneka.” Asani tisambira Bayibolo mwaphamphu tingaziŵengi umampha Malemba ndipu vitiwovyengi kukumbuka mavesi ngo ngangatiwovya kuti tiŵanaŵani umampha pa nyengu yo titeseka. (Sumu 1:1, 2) Kukumbuka nkhani za m’Malemba za ŵanthu wo ŵenga akugomezgeka kwaku Chiuta, kungatiwovya kuti tilondongi vo achitanga. (Ŵar. 15:4) Asani titumbika Yehova mwakutuliya pasi pa mtima, titanja vo iyu watanja kweniso titinkha vo iyu watinkha, vitiwovyengi kukana mayeseru.—Sumu 97:10.
16, 17. Nchinthu wuli chingachitika asani tigwiriskiya nchitu ‘vinjeru’ vidu?
16 Wakutumika Paulo watitichiska kuti tigwiriskiyengi nchitu umampha ‘vinjeru’ vidu kuti tilongozgekengi ndi maŵanaŵanu ngaku Chiuta m’malu mwakulongozgeka ndi maŵanaŵanu nga charu. (Ŵar. 12:1, 2) Paulo wangukamba kuti tikhumbika kuphwere ukongwa vo tiŵanaŵana, iyu wanguti: ‘Tibwanganduwa zimphindanu ndi chiguŵisku chosi chakujitumphuska kumikana ndi mziŵiru waku Chiuta, ndikuto maŵanaŵanu ngosi kungagumizgiya mu umkoli kuti ngavwiyi Khristu.’ (2 Ŵakor. 10:5) Maŵanaŵanu ngidu ngakwaska ukongwa wunthu widu, mwaviyo tikhumbika ‘kulutirizga kuŵanaŵananga’ vinthu vakuchiska.—Ŵaf. 4:8, NW.
17 Tingaja akupaturika cha asani tiŵanaŵana ndipuso tikhumbira vinthu viheni. Tikhumbika kwanja Yehova ndi “mtima ukhovu [wakutowa].” (1 Tim. 1:5) Kweni mtima ngwakunyenga ndipu panyaki tingaziŵa cha mo vinthu “va m’charu” vititikwaskiya. (Yer. 17:9) Mwaviyo, tikhumbika kulutirizga ‘kujiyesa, vinu te ŵakukoleze chivwanu cho, tijirozge taŵeni’ pamwenga kuti tijisandi kuti te ŵanthu a mtundu wuli kutuliya pasi pa mtima, mwakukoliyana ndi vo tisambira m’Bayibolo.—2 Ŵakor. 13:5.
18, 19. Nchifukwa wuli tikhumbika kuyesesa kuja munthu yo Yehova wakhumba kuti tije?
18 Fundu yinyaki yo yingatiwovya kuti tikani vinthu “va m’charu,” nkhukumbuka mazu ngo Yohane wangukambirika kuti walembi. Iyu wanguti: “Charu chikungunuka, ndi chilakalaka chaki; kweni mweniyo wachita khumbu laku Chiuta, wajaririya muyaya.” (1 Yoh. 2:17) Charu ichi chaku Satana, chiwoneka nge kuti chijaliriyengi mpaka muyaya kweni zuŵa limoza chazamumala. M’charu chaku Satana ichi mulivi chinthu cho chijengi mpaka muyaya. Kukumbuka fundu yeniyi, kutiwovyengi kuti tileki kunyengeka ndi nyambu zaku Diabolo.
19 Wakutumika Petro watitichiska kuti titenere kuja ndi mijalidu yamampha kuti tije akuzomerezgeka ndi Chiuta pa nyengu yo ‘tilereze ndi kupamphukiya ku uzi wa zuŵa lo laku Chiuta, mwenimo machanya, ngakukole motu, ngakasongonokanga, ndipuso vinthu vazamusongonoka.’ (2 Pet. 3:12) Zuŵa laku Yehova lizengi pambula kuswera yapa ndipu iyu wazamubwanganduwa chigaŵa chechosi cha charu chaku Satana. Satana walutirizgeni mbwenu kugwiriskiya nchitu vinthu “va m’charu” kutiyesa nge mo wanguyesa Eva ndi Yesu mpaka pa nyengu yeniyo. Tikhumbika cha kuja nge Eva ndipuso kulondo vosi vo mtima widu ukhumba. Asani tingachita viyo ndikuti tizomerezga kuti Satana ndi chiuta widu. Tikhumbika kuja nge Yesu, tikanengi mayeseru chinanga kuti Satana wangangachitiska kuwoneka kuti ngamampha. Tiyeni tosi tiyesesi kuja munthu yo Yehova wakhumba kuti tije.
[Mafumbu]
[Chithuzi papeji 23]
[Chithuzi papeji 24]
Satana wangugwiriskiya nchitu chilakalaka chaliŵavu kuti wanyengi Eva (Wonani pandimi 7)
[Chithuzi papeji 25]
Yesu wanguzomerezga chechosi cha kuti chimutimbanyizgi (Wonani pandimi 8)
[Vithuzi papeji 26]
Kumbi ndi fundu nizi za m’Malemba zo mutenere kukumbuka pa vinthu ivi? (Wonani ndimi 13, 14)
