Nge po mwawone pachithuzi kumaryi, ŵanthu anandi aŵanaŵana kuti pa Zuŵa la Cheruzgu, ŵanthu mabiliyoni nganandi azamukuma panthazi pa mpandu wa ufumu waku Chiuta kuti ayeruzgiki mwakukoliyana ndi vinthu vo achitanga, ndipu wo achitanga vamampha azamuluta kuchanya kweni wo achitanga viheni azamuluta kuhelu. Kweni Bayibolu lilongo kuti Zuŵa la Cheruzgu lazamuwovya kuti ŵanthu afwatuki ku vinthu vambula urunji. (Salimo 96:13) Chiuta wasankha Yesu kuti ndiyu waje Wakweruzga ndipu wazamunozga vinthu.—Ŵerengani Yesaya 11:1-5; Machitidu 17:31.

Munthu wakwamba Adamu wati wabuda, wanguyambuzgiyaku ŵana ŵaki ubudi, masuzgu ndipuso nyifwa. (Aroma 5:12) Kuti wanozgi vinthu vambula urunji venivi, Yesu wazamuyuska ŵanthu mabiliyoni nganandi. Buku la Chivumbuzi lilongo kuti venivi vazamuchitika mu ulamuliru waku Yesu Khristu wa vyaka 1,000.—Ŵerengani Chivumbuzi 20:4, 11, 12.

Ŵanthu wo azamuyuskika azamuyeruzgika mwakutore vo achitanga ŵeche amoyu cha. Kweni azamuyeruzgika mwakukoliyana ndi vo azamuchita pavuli pakusambira vo vikulembeka ‘mumipukutu’ yo yizumbulika mu Chivumbuzi chaputala 20. (Aroma 6:7) Wakutumika Paulo wangukamba kuti “ŵanthu arunji ndi ambula urunji” wosi azamukuŵa ndi mwaŵi wakuyusika ndi kusambira vakukwaskana ndi Chiuta.—Ŵerengani Machitidu 24:15.

Ŵanthu wo akufwa kweni akusambirapu cha vakukwaskana ndi Yehova Chiuta kuti amuziŵi ndipuso amuteŵetiyengi, azamupaskika mwaŵi wakuti asinthi ndi kuchita vamampha. Asani azamusintha nadi, mbwenu ndikuti ‘azamulonde umoyu.’ Kweni ŵanthu anyaki wo azamuyuskika, azamukana kusambira vakukwaskana ndi Yehova. Ŵanthu ŵenaŵa ‘azamuyeruzgika.’—Ŵerengani Yohane 5:28, 29; Yesaya 26:10; 65:20.

Asani Zuŵa la Cheruzgu lo nda vyaka 1,000 lifika ku limala, Yehova wazamukuŵa kuti waŵasintha ŵanthu kuti aje so akufikapu nge mo ŵenge pakwamba achilengeka waka. (1 Akorinto 15:24-28) Vinthu vakukondwesa venivi ndivu ŵanthu wosi akuvwiya alindizga! Pavuli paki, Chiuta wazamufwatuwa Satana Dyaboli kuchizenji ko wazamujaku kwa vyaka 1,000 kuti wayesi ŵanthu kakumaliya. Asani wazifwatulika, Satana wazamuyesesa kukopa ŵanthu kuti atuweku kwaku Yehova, kweni wo azakumususka azamukondwa ndi umoyu kwamuyaya pacharu.—Ŵerengani Yesaya 25:8; Chivumbuzi 20:7-9.

Bayibolu ligwiriskiya so ntchitu mazu ngakuti “zuŵa la cheruzgu” asani likonkhoska vo vazamuchitika pa nyengu yo Chiuta wazamunanga vinthu va mu nyengu yinu. Zuŵa la cheruzgu lenili lazamukuza mwamabuchibuchi nge mo venge ndi Chigumula chaku Nowa cho chingupeya ŵanthu wosi aheni. Kweni chakukondwesa ntchakuti asani “ŵanthu ambula kopa Chiuta’ azibayika pa zuŵa lenili lo lizengi pambula kuswera, Chiuta wazamujalikiska charu chifya “ndipu mwenumu mwazamuja urunji.”—Ŵerengani 2 Peturo 3:6, 7, 13.