Hulda Wangufiska Chilatu Chaki
VYAKA vo vajumpha asani munguluta pachirwa cha Sangir Besar, ku Indonesia, mwatingi muwonengi azichi atatu ŵe mumphepeti mwa nyanja. Yiwu aziŵikanga ukongwa pachirwa chenichi chifukwa awovyanga ŵanthu kusambira Bayibolu. Kweni nyengu zinyaki yiwu achitanga vinthu vinyaki pachirwa chenichi.
Chirwa cha Sangir Besar kunkhondi kwa Indonesia
Chakwamba yiwu aserenga mumaji, kutondo mya yikuluyikulu ndi kuluta nayu kumtunda. Yinyaki mwa mya yeniyi yaŵanga yikulu nge bola. Pavuli paki yiwu aphwanyanga mya yeniyi ndi nyundu kuti yije yimanayimana. Asani ayiphwanya ayiŵikanga mumapelu ndi kuluta nayu kunyumba kwawu. Pavuli paki, ayipakilanga mumathumba ngakulungakulu ndipu ayigulisanga kuti yikagwiriskikiyi ntchitu pakupanga misewu.
Hulda, wawunjika mya kumutunda
Yumoza mwa azichi ŵenaŵa wenga Hulda. Iyu wenga ndi nyengu yakukwana yakugwiriya ntchitu yeniyi kuphara azichi anyaki. Kanandi iyu wagwiriskiyanga ntchitu ndalama zaki zosi kuti wawovyi banja laki. Kweni nyengu yinyaki wangwamba kusunga ndalama zinyaki kuti wachiti chinthu chinyaki. Iyu wakhumbanga kuzigula tabuleti kuti waziŵikemu JW Library®. Hulda waziŵanga kuti mavidiyo kweniso vinthu vinyaki va pa JW Library® vazakumuwovya mu uteŵeti ndipuso pakusambira Bayibolu.
Ndi mlenji wewosi, Hulda waphwanyanga mya kwa maola ngaŵi. Ndipu wanguchita venivi kwa mwezi umoza ndi hafu kuti wazazisi kalori kamana. Pakumaliya wangusaniya ndalama zakukwana zakuguliya tabuleti.
Hulda we ndi tabuleti yaki
Hulda wangukamba kuti: “Chinanga kuti ndavukanga ukongwa kweniso ndenga ndi vilonda vo ndajipwetekanga pa kuphwanya mya, ndinguswera cha kuluwa urwirwi kweniso fuvu la vimya, ndati ndayamba kugwiriskiya ntchitu tabuleti yangu mu uteŵeti kweniso pakunozgeke maunganu.” Iyu wangukamba so kuti tabuleti yeniyi yingumuwovya kuti wachitengi maunganu kweniso kupharazga limoza ndi mpingu pa nyengu ya mulili. Tikondwa nayu ukongwa Hulda chifukwa chakuti wangufiska chilatu chaki.
